ປະທານສູນກາງແນວລາວສ້າງຊາດເຂົ້າຮ່ວມພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງກອງທັບ ຄົບຮອບ 75 ປີ

ວິທະຍາຄານເຕັກນິກການທະຫານໄດ້ຈັດພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ75 ປີ(20 ມັງກອນ1949-20 ມັງກອນ 2024) ຂຶ້ນໃນວັນທີ 30 ມັງກອນ ນີ້,ໂດຍເປັນກຽດເຂົ້າຮ່ວມຂອງ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ; ມີທ່ານ ພົນຈັດຕະວາ ສາຍສະໝອນ ໄຊພູບານ ຮອງຫົວໜ້າກົມໃຫຍ່ເຕັກນິກກອງທັບ, ມີບັນດາຄະນະພັກ- ຄະນະອຳນວຍການ, ບັນດາກົມກອງອ້ອມຂ້າງ, ອຳນາດການປົກຄອງຂັ້ນຕ່າງໆເມືອງໄຊທານີ ແລະ ແຂກຖືກເຊີນ ຕະຫຼອດຮອດນາຍແລະພົນທະຫານເຂົ້າຮ່ວມຢ່າງພ້ອມພຽງ.
ໃນພິທີ, ກ່ອນອື່ນແມ່ນໄດ້ຮັບຊົມການສະແດງສິລະປະວັນນະຄະດີ, ຫຼັງຈາກນັ້ນກໍໄດ້ຮັບຟັງການຫວນຄືນປະຫວັດການກຳເນີດ, ເຕີບໃຫຍ່ຂະຫຍາຍຕົວ ແລະ ມູນເຊື້ອອັນສະຫງ່າລາສີຂອງກອງທັບປະຊາຊົນລາວ ຕະຫຼອດໄລຍະ 75 ປີຜ່ານມາໂດຍຫຍໍ້ ແລະ ການເຕີບໃຫຍ່ຂະຫຍາຍຕົວ ແລະ ຜົນງານທີ່ຜົ້ນເດັ່ນຮອບດ້ານຂອງວິທະຍາຄານເຕັກນິກການທະຫານ ໃນໄລຍະ 10 ປີຜ່ານມາ(20 ທັນວາ 2013 – 20 ທັນວາ 2023).
ໃນໂອກາດທີ່ມີຄວາມໝາຍສຳຄັນນີ້, ທ່ານປະທານສູນກາງແນວລາວສ້າງຊາດໄດ້ມີຄຳເຫັນວ່າ: ໃນນາມຕາງໜ້າກົມການເມືອງສູນກາງພັກ, ແນວລາວສ້າງຊາດ-ອົງການຈັດຕັ້ງມະຫາຊົນ ແລະ ປະຊາຊົນລາວບັນດາເຜົ່າ ສະແດງຄວາມຊົມເຊີຍຜົນງານອັນໃຫຍ່ຫຼວງຂອງກອງທັບປະຊາຊົນລາວ ຕະຫຼອດໄລຍະ 75 ປີ ໂດຍສະເພາະສະແດງຄວາມຍ້ອງຍໍຊົມເຊີຍຕໍ່ຜົນງານຕ່າງໆທີ່ວິທະຍາຄານເຕັກນິກການທະຫານຍາດມາໄດ້ໃນຕະຫຼອດໄລຍະທີ່ຜ່ານມາ ແລະ ທ່ານໄດ້ມີຄຳເຫັນເນັ້ນຕື່ມບາງວຽກງານທີ່ສຳຄັນວ່າ: ໃຫ້ຄະນະພັກ, ຄະນະບັນຊາແຕ່ລະຂັ້ນ ແລະ ຄູອາຈານ ພ້ອມກັນສືບຕໍ່ຮັກສາໝາກຜົນການປະຕິວັດ, ສືບຕໍ່ຮັກສາ ແລະ ເສີມຂະຫຍາຍມູນເຊື້ອອັນດີງາມຂອງກອງທັບປະຊາຊົນລາວ, ສືບຕໍ່ປັບປຸງແບບແຜນການສອນ-ການຮຽນໃຫ້ມີວິທະຍາສາດ,ສືບຕໍ່ພົວພັນຮ່ວມມືກັບເພື່ອນມິດສາກົນເພື່ອແລກປ່ຽນບົດຮຽນນຳກັນ ເພື່ອເຮັດໃຫ້ວິທະຍາຄານມີຄວາມກ້າວໜ້າ. ພ້ອມກັນນັ້ນ, ໃຫ້ພ້ອມກັນຄົ້ນຄວ້າຮ່ຳຮຽນແນວທາງຂອງພັກ, ນິຕິກຳຂອງລັດ ໂດຍສະເພາະໃຫ້ພ້ອມກັນເຂົ້າໃຈໃຫ້ເລິກເຊິ່ງໃນການຫັນປ່ຽນໃໝ່ຕາມມະຕິກອງປະຊຸມໃຫຍ່ຂອງພັກວາງອອກ, ພ້ອມກັນປະຕິບັດລັດຖະທຳມະນູນ ແຫ່ງ ສປປ ລາວ ກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບ. 
ໃນໂອກາດນີ້, ທ່ານປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ມອບຄອມພິວເຕີ 1 ຊຸດ ແລະເຄື່ອງກິລາຈຳນວນໜຶ່ງໃຫ້ວິທະຍາຄານເຕັກນິກການທະຫານ ຕື່ມອີກ.
ຂ່າວ-ພາບ: ເຢ