ປະຊາກອນເດັກນ້ອຍ ຂອງຍີ່ປຸ່ນ ຫຼຸດລົງ 43 ປີຕິດຕໍ່ກັນ

ຂ່າວຕ່າງປະເທດລາຍງານ ທ້າຍອາທິດຜ່ານມາວ່າ: ກະຊວງພາຍໃນ ແລະ ການສື່ສານຂອງຍີ່ປຸ່ນ ເປີດເຜີຍໂຕເລກການຄາດຄະເນຈຳນວນປະຊາກອນເດັກນ້ອຍຂອງປະເທດ ມີ 14,01 ລ້ານຄົນ ເມື່ອນັບເຖິງວັນທີ 1 ເມສາ ຜ່ານມາ ຊຶ່ງຫຼຸດລົງຕິດຕໍ່ກັນ 43 ປີ.
ລາຍງານລະບຸວ່າ: ຈຳນວນເດັກນ້ອຍອາຍຸບໍ່ເກີນ 14 ປີ ຊຶ່ງລວມເຖິງເດັກນ້ອຍຕ່າງປະເທດ ຫຼຸດລົງຈາກປີກ່ອນ 330.000 ຄົນ ຈົນຮອດລະດັບຕໍ່າເປັນສະຖິຕິ ນັບຕັ້ງແຕ່ມີຂໍ້ມູນປຽບທຽບໄດ້ໃນປີ 1950 ໂດຍອັດຕາສ່ວນເດັກນ້ອຍຕໍ່ປະຊາກອນທັງໝົດຂອງຍີ່ປຸ່ນ ມີ 11,3% ຊຶ່ງຫຼຸດລົງ 0,2 ຈຸດ ແລະ ຖືເປັນລະດັບຕໍ່າທີ່ສຸດນັບຕັ້ງແຕ່ປີ 1950 ສະທ້ອນໃຫ້ເຫັນເຖິງການຫຼຸດລົງຕິດຕໍ່ກັນ 50 ປີ.
ຫາກແຍກຕາມເພດ, ຈຳນວນປະຊາກອນເດັກນ້ອຍຜູ້ຊາຍ ມີ 7,18 ລ້ານຄົນ ແລະ ຈຳນວນປະຊາກອນເດັກນ້ອຍຜູ້ຍິງ ມີ 6,83 ລ້ານຄົນ, ຖ້າແບ່ງຕາມໄລຍະອາຍຸ ຈຳນວນເດັກນ້ອຍອາຍຸ 12-14 ປີ ມີ 3,17 ລ້ານຄົນ ແລະ ຈຳນວນເດັກນ້ອຍອາຍຸ 0-2 ປີ ມີ 2,35 ລ້ານຄົນ ຊຶ່ງບົ່ງບອກເຖິງທ່າອ່ຽງເດັກເກີດໃໝ່ຍັງຄົງນ້ອຍລົງຢ່າງຕໍ່ເນື່ອງ.
ທັງນີ້, ຈຳນວນປະຊາກອນເດັກນ້ອຍຂອງຍີ່ປຸ່ນ ເຄີຍຢູ່ໃນລະດັບສູງທີ່ສຸດໃນປີ 1954 ດ້ວຍຈຳນວນ 29,89 ລ້ານຄົນ, ໂດຍໄລຍະທີ່ມີເດັກນ້ອຍເກີດໃໝ່ຫຼາຍກວ່າສອງລ້ານຄົນຕໍ່ປີ (second baby boom) ແມ່ນໃນລະຫວ່າງປີ 1971-1974 ກ່ອນທີ່ຈຳນວນປະຊາກອນເດັກນ້ອຍຂອງຍີ່ປຸ່ນຈະຄ່ອຍໆຫຼຸດລົງຢ່າງຕໍ່ເນື່ອງຕັ້ງແຕ່ປີ 1982 ເປັນຕົ້ນມາ.