ທ່ານ ນິພາ ສາຫະພັນ ປະທານບໍລິຫານ ບໍລິສັດ ເອສ ໂອ ເອ ຈຳກັດຜູ້ດຽວ ກ່າວວ່າ: ອາຄານລ້ານຊ້າງ ຫຼື Lanexang Building ອອກແບບໂດຍທີມງານທະນາຄານ ລາວ-ຝຣັ່ງ ຈາກຕ່າງປະເທດ ມີການອອກແບບໃຫ້ໄດ້ມາດຕະຖານສາກົນ ໃນການກໍ່ສ້າງ ມີລະບົບຮັກສາຄວາມປອດໄພສູງ ຊຶ່ງໄດ້ກໍ່ສ້າງສຳເລັດແຕ່ປີ 2019, ອາຄານແຫ່ງນີ້ ແບ່ງອອກເປັນ 10 ຊັ້ນ ມີການຈັດສັນພື້ນທີ່ໃຫ້ເປັນ Co-Working Space ຢູ່ທີ່ຊັ້ນ5 ເໝາະສຳລັບນັກທຸລະກິດ Start Up ຫຼື SME ໃໝ່ໆ ທີ່ຕ້ອງການພື້ນທີ່ເຮັດວຽກ ໃນໃຈກາງເມືອງນະຄອນຫຼວງວຽງຈັນ ພ້ອມກັນນັ້ນ ພາຍໃນອາຄານລ້ານຊ້າງ ຍັງມີສູນບໍລິການ Canon ຊຶ່ງເປັນໂຊຣູມທີ່ໃຫຍ່ ແລະ ທັນສະໄໝທີ່ສຸດໃນ ສປປ ລາວ ເນື່ອງຈາກທາງບໍລິສັດ ເອສ ໂອ ເອ ຈຳກັດຜູ້ດຽວ ໄດ້ເປັນຕົວແທນຈຳໜ່າຍ Canon ແຕ່ຜູ້ດຽວ ໃນ ສປປ ລາວ ອີກດ້ວຍ.
ພາຍໃນ Showroom ຍັງມີການວາງສະແດງນະວັດຕະກຳຈາກຜະລິດຕະພັນກ້ອງ ແລະ ປຣິນເຕີ ພ້ອມທັງການບໍລິການໃຫ້ຄຳແນະນຳ ແລະ ອັບເດດເຕັກໂນໂລຊີ ໂດຍລູກຄ້າສາມາດທົດລອງ ແລະ ສຳ ຜັດກັບສິນຄ້າກ່ອນການຕັດສິນໃຈເລືອກຊື້.
ທ່ານ Hiroshi Yokota ປະທານບໍລິສັດ ແລະ ປະທານກຳມະການບໍລິຫານ ບໍລິສັດ ແຄນນອນ ມາເກັດຕິ້ງ (ປະເທດໄທ) ຈຳກັດ ກ່າວວ່າ: ຮູ້ສຶກເປັນກຽດ ແລະ ຍິນດີຢ່າງຍິ່ງ ທີ່ທາງບໍລິສັດ ແຄນນອນ ມາເກັດຕິ້ງ (ປະເທດໄທ) ຈຳກັດ ໄດ້ຮ່ວມເປັນພັນທະມິດກັບບໍລິສັດ ເອສໂອເອ ຈຳກັດຜູ້ດຽວ ໃນປະເທດລາວ ຊຶ່ງນອກຈາກງານໃນຄັ້ງນີ້ ຈະເປັນການເປີດ Canon Showroom By SOA ຢ່າງເປັນທາງການແລ້ວ ຍັງເປັນການສະເຫຼີມສະຫຼອງຄວາມສຳພັນເປັນພັນທະມິດຂອງທັງສອງທຸລະກິດທີ່ມີມາຢ່າງຍາວນານ ໂດຍຫວັງວ່າ ໃນອະນາຄົດທັງສອງບໍລິສັດຈະຮ່ວມກັນສ້າງຄວາມປະທັບໃຈ ແລະ ສ້າງຄວາມເຊື່ອໝັ້ນ ລວມໄປເຖິງມອບສິ່ງທີ່ດີໃຫ້ກັບສັງຄົມລາວຕໍ່ໆໄປ.
ພິທີດັ່ງກ່າວຈັດຂຶ້ນໃນວັນທີ 12 ກໍລະກົດຜ່ານມາ ທີ່ອາຄານລ້ານຊ້າງ (ຂ້າງທະນາຄານ ລາວ-ຝຣັ່ງ) ໂດຍມີທ່ານ ນິພາ ສາຫະພັນ ທ່ານ Hiroshi Yokota ແລະ ທ່ານ ຄຳຂັນ ນະພາວົງ ອະດີດຫົວໜ້າຫ້ອງການ ກະຊວງອຸດສາຫະກໍາ ແລະ ການຄ້າ ພ້ອມດ້ວຍແຂກຜູ້ມີກຽດຈາກ ບໍລິສັດ ແຄນນອນ ມາເກັດຕິ້ງ (ປະເທດໄທ) ຈຳກັດ ແລະ ແຂກຈາກທາງພາກລັດ ແລະ ເອກະຊົນ ທັງລາວ ແລະ ໄທ ເຂົ້າຮ່ວມ.
ອາຄານລ້ານຊ້າງ ແລະ Canon Showroom By SOA ໄດ້ເລີ່ມເປີດໃຫ້ບໍລິການຕັ້ງແຕ່ວັນນີ້ເປັນຕົ້ນໄປ ໂດຍເປີດໃຫ້ທຸກໆທ່ານເຂົ້າຢ້ຽມຊົມໄດ້ທຸກມື້ ທ່ານສາມາດຕິດຕໍ່ລາຍລະອຽດເພີ່ມເຕີມໄດ້ທີ່ເບີ 020 55511878 020 99999903 020 56539788.
ຂ່າວ: ແສງຈັນ
ຄໍາເຫັນ