ເປີດການຢອດສານມາກເກີຢູ່ດ່ານສາກົນຂົວມິດຕະພາບນໍ້າເຫືອງ ເມືອງແກ່ນທ້າວ

ທ່ານ ເພັດສະຫວັນ ລັດຕະນະທົງໄຊ ຫົວໜ້າກົມຄຸ້ມຄອງພະລັງງານ ພ້ອມດ້ວຍທີມງານ ໄດ້ລົງເຜີຍແຜ່ ຂໍ້ຕົກລົງ ວ່າດ້ວຍການນໍາໃຊ້ສານມາກເກີ ຢອດໃສ່ນໍ້າມັນເຊື້ອໄຟ ແລະ ແນະນໍາການນໍາໃຊ້ສານມາກເກີຢອດໃສ່ນໍ້າມັນເຊື້ອໄຟທີ່ນໍາເຂົ້າ, ຜະລິດ, ປະສົມ ແລະ ປຸງແຕ່ງ ເພື່ອນໍາມາຈໍາໜ່າຍ ຊົມໃຊ້ ພາຍໃນປະເທດ ແລະ ເປີດການຢອດສານມາກເກີຢູ່ດ່ານສາກົນຂົວມິດຕະພາບນໍ້າເຫືອງ ເມືອງແກ່ນທ້າວ ແຂວງໄຊຍະບູລີ. ເປັນກຽດເຂົ້າມີທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ, ທ່ານ ຄໍາເພັດ ພົມມະລາດ ຫົວໜ້າພະແນກພະລັງງານ ແລະ ບໍ່ແຮ່ແຂວງໄຊຍະບູລີ, ມີບັນດາຫ້ອງການກ່ຽວຂ້ອງພາຍໃນເມືອງເຂົ້າ.
    ການນໍາໃຊ້ສານມາກເກີຢອດໃສ່ນໍ້າມັນເຊື້ອໄຟ ແມ່ນການນໍາໃຊ້ສານເຄມີ ທີ່ໄດ້ຈາກສານໄຮໂດກາກບອນ, ສານເຄມີອື່ນ ຢອດໃສ່ນໍ້າມັນເຊື້ອໄຟທີ່ຜະລິດ, ປຸງແຕ່ງພາຍໃນປະເທດ ແລະ ນໍາເຂົ້າມາຈາກຕ່າງປະເທດ ເພື່ອເປັນສັນຍາລັກ ຫຼື ເຄື່ອງໝາຍຢັ້ງຢືນຄວາມຖືກຕ້ອງໃນການຕິດຕາມ, ກວດກາ ແລະ ປະຕິບັດພັນທະຕ່າງໆໃຫ້ລັດ. ແນ່ໃສ່ປົກປ້ອງຜົນປະໂຫຍດຂອງລັດ, ຜູ້ປະກອບການດໍາເນີນທຸລະກິດ, ຜູ້ນໍາໃຊ້ນໍ້າມັນເຊື້ອໄຟ ແລະ  ປ່ຽນແທນການກໍານົດສານສີໃນນໍ້າມັນເຊື້ອໄຟ ເພື່ອປະກອບສ່ວນໃນການພັດທະນາເສດຖະກິດ-ສັງຄົມຂອງຊາດ.
    ສໍາລັບ ດ່ານສາກົນຂົວມິດຕະພາບນໍ້າເຫືອງ ຈະເລີ່ມດໍາເນີນການຢອດສານມາກເກີ ໃສ່ນໍ້າມັນເຊື້ອໄຟ ເລີ່ມປະຕິບັດແຕ່ວັນທີ 6 ກຸມພາ 2024 ເປັນຕົ້ນໄປ. 
(ຂ່າວ: ແກ່ນທ້າວ).