ເປີດຂະບວນການແຂ່ງຂັນກິລາຊິງຂັນປະທານປ້ອງກັນຊາດ-ປ້ອງກັນຄວາມສະຫງົບນະຄອນ ຫຼວງພະບາງ

ໃນອາທິດຜ່ານມານີ້ ທີ່ສະໂມສອນ ກິລາບານເຕະບຸນທະວີ ໄດ້ຈັດການແຂ່ງຂັນກິລາບານເຕະຊິງຂັນປະທານປ້ອງກັນຊາດ ປ້ອງກັນຄວາມສະຫງົບ ນະຄອນ ຫຼວງພະບາງ ແຂວງຫຼວງພະບາງ ເພື່ອຮັບຕ້ອນກອງປະຊຸມໃຫຍ່ 3 ຂັ້ນຂອງພັກ ແລະ ວັນສ້າງຕັ້ງກໍາລັງປ້ອງກັນຄວາມສະຫງົບ ວັນທີ່ 5 ເມສາ ຄົບຮອບ 63 ປີ ໂດຍເປັນປະທານຂອງ ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ ປະທານປ້ອງກັນຊາດ-ປ້ອງກັນຄວາມສະຫງົບນະຄອນ ຫຼວງພະບາງ, ມີທ່ານ ພັນໂທ ຫຸມພັນ ອິນທະວົງ ຫົວໜ້າກອງບັນຊາການປ້ອງກັນຄວາມສະຫງົບ ນະຄອນ, ພ້ອມດ້ວຍຄະນະ, ແຂກຮັບເຊີນ, ກຳມະການ ແລະນັກກິລາ ຊາຍ-ຍິງ ເຂົ້າຮ່ວມ.
ທ່ານ ພັນໂທ ບຸນຄົງ ອຳພອນ ຮອງຫົວໜ້າກອງບັນຊາການ ປກສ ນະຄອນ ຫຼວງພະບາງ ໄດ້ຜ່ານບົດລາຍງານການກະກຽມການແຂ່ງຂັນວ່າ: ການແຂ່ງຂັ້ນໄດ້ຈັດຂຶ້ນ ມີ 3 ປະເພດຄື: ບານເຕະ, ເປຕັງ ແລະ ຍີງປືນ ໂດຍໄດ້ກໍານົດເອົາແຕ່ນັກກິລາພາຍໃນກໍາລັງ ປກສ ນະຄອນ ເຂົ້າແຂ່ງຂັນ. ສະເພາະກິລາບານເຕາະແມ່ນແຂ່ງຮູບແບບ 8 ຄົນ (ເຕະ 7 ຮັບ 1) ມີທັງຊາຍ ແລະ ຍິງ. ໃນນັ້ນ, ທີມທີ່ຊະນະເລີດຈະໄດ້ຮັບຂັນໜຶ່ງໜ່ວຍ ພ້ອມເງິນສົດ 3 ລ້ານກີບ, ທີ 2 ຈະໄດ້ຮັບຂັນ 1 ໜ່ວຍ ພ້ອມເງິນສົດ 2 ລ້ານກີບ, ທີ 3 ຈະໄດ້ຮັບຂັນ 1 ໜ່ວຍ ພ້ອມເງິນສົດ 1 ກີບ ແລະ ທີ 4 ຈະໄດ້ຮັບລາງວັນຊົມເຊີຍ ເປັນເງິນສົດ 5 ແສນກີບ. ສ່ວນກິລາເປຕັງ ແລະກິລາຍີງປືນ ຈະດຳເນີນການແຂ່ງຂັນຕາມຕາຕະລາງ ແລະ ທັງ 3 ປະເພດກິລາ ຈະໃຫ້ສໍາເລັດໃນວັນທີ່ 5 ເມສາທີ່ຈະມາເຖີງ.
(ຂ່າວ: ສົມພອນ ວິໄລຜົນ).