ເປີດກອງປະຊຸມ ຄັ້ງທີ 9 ຄະນະບໍລິຫານງານສູນກາງພັກ ຊຸດທີ XIII

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 16 ພຶດສະພາ ຜ່ານມາ, ກອງປະຊຸມຄັ້ງທີ 9 ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ XIII ໄດ້ເປີດຂຶ້ນຢ່າງສົມກຽດ ຢູ່ ຮ່າໂນ້ຍ. ໂດຍການເປັນປະທານຂອງ ທ່ານ ຫງວຽນຝູຈ້ອງ ເລຂາທິການໃຫຍ່ ພັກກອມມູນິດ ຫວຽດນາມ. ໃນກອງປະຊຸມຄັ້ງນີ້, ຄະນະບໍລິຫານງານສູນກາງພັກ ຫວຽດນາມ ໄດ້ປຶກສາຫາລືກ່ຽວກັບໂຄງຮ່າງບັນດາເອກະສານກອງປະຊຸມໃຫຍ່ຊຸດທີ XIV ຂອງພັກ; ກະກຽມວຽກງານຊີ້ນຳດຳເນີນກອງປະຊູມໃຫຍ່ອົງຄະນະພັກທຸກຂັ້ນ ກ້າວໄປເຖິງກອງປະຊຸມໃຫຍ່ຊຸດທີ XIV ຂອງພັກ ແລະ ບາງບັນຫາສຳຄັນອື່ນໆ.
       ທ່ານ ຫງວຽນຝູຈ້ອງ ກ່າວຄຳເຫັນເປີດກອງປະຊຸມວ່າ: ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIV ຂອງພັກ ຈະດຳເນີນໃນຕົ້ນປີ 2026. ບັນດາຮ່າງເອກະສານ, ບົດລາຍງານການເມືອງ ຕ້ອງມີລັກສະນະສັງເຂບກວມລວມບັນດາບັນຫາທີ່ເປັນທັດສະນະ, ແນວທາງ, ແຜນນະໂຍບາຍ, ນະໂຍບາຍຂອງພັກໃນບັນດາຂົງເຂດຂອງຊີວິດສັງຄົມ: ບົດລາຍງານເສດຖະກິດ - ສັງຄົມ, ບົດລາຍງານກໍ່ສ້າງພັກ ແລະ ດຳເນີນກົດລະບຽບຂອງພັກ ແມ່ນບັນດາບົດລາຍງານຕາມຫົວຂໍ້ສະເພາະ, ລົງເລິກ ກ່ຽວກັບການປະຕິບັດໜ້າທີ່ພັດທະນາເສດຖະກິດ - ສັງຄົມ ແລະ ກໍ່ສ້າງ, ປັບປຸງພັກ, ແມ່ນຫຼັກຖານອັນລະອຽດເພື່ອພິສູດໃຫ້ແກ່ຄວາມຖືກຕ້ອງຂອງບັນດາຂໍ້ສັງເກດ, ຕີລາຄາສະພາບການ ແລະ ເຊື່ອມຊຶມ, ຫັນບັນດາການກຳນົດທິດໃຫຍ່ກ່ຽວກັບແຜນນະໂຍບາຍ, ນະໂຍບາຍ, ມາດຕະການທີ່ໄດ້ລວບລວມໃນບົດລາຍງານການເມືອງ ເປັນລະອຽດ. ຕ້ອງມີຄວາມເໝາະສົມ, ສອດຄ່ອງ, ສະເໝີຕົ້ນສະເໝີປາຍກັບທັດສະນະ, ກຳນົດທິດໃຫຍ່ທີ່ໄດ້ຍົກອອກໃນບົດລາຍງານການເມືອງ.