ເພື່ອຮັບໃຊ້ງານບຸນປະວໍລະນາ - ອອກພັນສາ, ຊ່ວງເຮືອປະເພນີ ປະຈໍາປີ 2024 ຢູ່ນະຄອນປາກເຊ ທັງເປັນການສ້າງຜົນງານ, ສ້າງຂະບວນການ ຂໍ່ານັບຮັບຕ້ອນກອງປະຊຸມໃຫຍ່ ອົງຄະນະພັກນະຄອນ ແລະ ອົງຄະນະພັກແຂວງຈຳປາສັກ ທີ່ຈະໄຂຂຶ້ນໃນປີ 2025. ໂດຍການເຂົ້າຮ່ວມຂອງ ທ່ານ ອາລຸນໄຊ ສູນນະລາດ ເຈົ້າແຂວງໆຈໍາປາສັກ ພ້ອມພັນລະຍາ, ທ່ານ ບົວລີ ເພັດສົງຄາມ ເຈົ້ານະຄອນປາກເຊ ພ້ອມດ້ວຍການນໍາແຂວງ, ການນໍາ 9 ເມືອງ, ການນໍານະຄອນປາກເຊ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໃນພິທີ, ທ່ານ ບົວລີ ເພັດສົງຄາມ ໄດ້ລາຍງານຄວາມຄືບໜ້າ ແລະ ແຜນຈັດຕັ້ງປະຕິບັດການສ້ອມແປງລະບົບໄຟສາທາລະນະໃນນະຄອນປາກເຊ, ໂດຍອີງຕາມການພັດທະນາໃນໄລຍະຜ່ານມາ ທົ່ວນະຄອນປາກເຊ ໄດ້ສໍາເລັດໃນການກໍ່ສ້າງປັບປຸງພື້ນຖານໂຄງລ່າງຕົວເມືອງ ໂດຍສະເພາະເສັ້ນທາງ ແລະ ສິ່ງອໍານວຍຄວາມສະດວກ, ທົ່ວນະຄອນ ມີລະບົບໄຟເຍືອງທາງທີ່ໄດ້ຕິດຕັ້ງ ຕິດພັນກັບການກໍ່ສ້າງຍົກລະດັບ ທາງສາຍເອກ (ທາງຫຼວງແຫ່ງຊາດ ເລກທີ 13 ໃຕ້ ແລະ ທາງເລກທີ 16 ຕາເວັນອອກ), ທາງສາຍຫຼັກ ໃນເທດສະບານ ທັງໝົດ ຈໍານວນ 14 ເສັ້ນ ຊຶ່ງໄດ້ມີການກໍ່ສ້າງໃນຕົ້ນ ປີ 2000 (2000-2005).
ສໍາລັບປີ 2024 ນີ້ ຊຶ່ງເປັນປີທ່ອງທ່ຽວລາວ, ອົງການປົກຄອງແຂວງຈໍາປາສັກ ໄດ້ອະນຸມັດງົບປະມານຈໍານວນໜຶ່ງ ແລະ ລະດົມທຶນສົມທົບຈາກສັງຄົມ ຊ່ວຍເຫຼືອໃນການສ້ອມແປງ ແລະ ຕິດຕັ້ງເພີ້ມເຕີມຈໍານວນໜຶ່ງຄື: ໂຄງການສ້ອມແປງ ໄຟເຍືອງທາງສາຍຫຼັກ ແລະ ໄຟເທດສະບານ ຈໍານວນ 8 ຈຸດ ຄື: ເສັ້ນທາງຂົວສຸພານຸວົງ ຫາ ວົງວຽນວັດພູ, ເສັ້ນທາງແຕ່ຂົວສຸພານຸວົງ ຫາ ວົງວຽນຂັນໂມງໃຫຍ່, ເສັ້ນທາງແຍກສະໜາມບິນ, ເສັ້ນທາງ 13B ແຕ່ຂົວເຊໂດນ 2 (ຂົວມິດຕະພາບລາວ - ລັດເຊຍ) ຝັ່ງທ່າຫີນ ຫາ ສາມແຍກສະໜາມບິນ (ວົງວຽນຂັນໂມງໃຫຍ່), ເສັ້ນທາງເລກ 1 ສາຍຫ້ອງວ່າການແຂວງ, ແຕ່ວົງວຽນວັດພູ ຫາ ເສັ້ນທາງແຄມຂອງ, ແຍກເສັ້ນທາງສຸພານຸວົງ ຈຸດຫົວຂົວສຸພານຸວົງ ຜ່ານໜ້າໂຮງໝໍແຂວງ ຫາ ປົດ 17 (ເສັ້ນທາງແຄມຂອງ), ແຍກເສັ້ນທາງສຸພານຸວົງ ຈຸດໜ້າວັດຫຼວງ ຫາ ພະແນກການເງິນ ເສັ້ນທາງເລກ 1, ເສັ້ນທາງເບຕົງ ເລກທີ 13 ໃຕ້ ແຕ່ວົງວຽນວັດພູ ຫາ ກອງບັນຊາການທະຫານແຂວງ ແລະ ແຕ່ໜ້າກອງບັນຊາການທະຫານແຂວງ ຫາ ຈຸດສາມແຍກ ສູນສັດຕະວະແພດ ຫຼັກ 7 ລວມມູນຄ່າ 1,466 ລ້ານກວ່າກີບ.
ທ່ານ ບົວລີ ເພັດສົງຄາມ ລາຍງານຕື່ມວ່າ: ນອກນີ້ ຍັງໄດ້ຕິດຕັ້ງສ້ອມແປງໄຟປະດັບຫົວເສົາ (ໄຟປິ່ງປ້ອງ) ທາງສຸພານະວົງ ແຕ່ວົງວຽນວັດພູ (ກິໂລສູນ) ຮອດ 3 ແຍກບ້ານທ່າຫີນ (ຜ່ານຂົວເຊໂດນ 1) ຈໍານວນ 38 ຕົ້ນ, ມູນຄ່າ 82 ລ້ານກີບ ແລະ ຕິດຕັ້ງໄຟຟ້າໂຊລາເຊວ ຕາມຈຸດຕ່າງໆທົ່ວນະຄອນ ເພື່ອສ້າງນະຄອນປາກເຊ ເປັນເມືອງໜ້າຢູ່ ຕາມທິດ 8 ສ, ໂດຍສະເພາະ ສ ສະຫວ່າງ ໃຫ້ປະກົດເປັນຈິງ.
ໂອກາດນີ້, ທ່ານ ເຈົ້າແຂວງໆຈໍາປາສັກ ພ້ອມການນໍາແຂວງ ໄດ້ຮ່ວມກັນຕັດແຖບຜ້າ ແລະ ກົດປຸ່ມເປີດນໍາໃຊ້ໄຟເຍືອງທາງຢ່າງເປັນທາງການ.
(ຂ່າວ-ພາບ: ທູນທອງໃຈ)
ຄໍາເຫັນ