ໄດ້ຈັດຂຶ້ນໃນຕອນບ່າຍວັນທີ 4 ກຸມພາຜ່ານມາ ໂດຍການໃຫ້ກຽດເຂົ້າຮ່ວມຕັດແຖບຜ້າ, ເປີດປ້າຍ ພ້ອມທັງລັ່ນຄ້ອງ 9 ບາດ ເປີດນຳໃຊ້ຂົວບ້ານນາຮັງນ້ອຍຢ່າງເປັນທາງການຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ແລະ ທ່ານ ໂຄອິຊຶມິ ຊຶໂຕະມຸ ເອກອັກຄະລັດຖະທູດແຫ່ງປະເທດຍີ່ປຸ່ນ ປະຈໍາ ສປປ ລາວ, ພ້ອມດ້ວຍອຳນາດການປົກຄອງບ້ານ ແລະ ພໍ່ແມ່ປະຊາຊົນຊາວບ້ານນາຮັງນ້ອຍ ແລະ ບ້ານໃກ້ຄຽງທີ່ໄດ້ຊົມໃຊ້ຂົວດັ່ງກ່າວເຂົ້າຮ່ວມ.
ທ່ານ ສີວິໄລ ສີທຳມະວັນ ຮອງເຈົ້າເມືອງອາດສະພອນ ໄດ້ລາຍງານໃຫ້ຮູ້ວ່າ: ໂຄງການກໍ່ສ້າງຂົວເບຕົງເສີມເຫຼັກອັດແຮງບ້ານນາຮັງນ້ອຍ ມີຄວາມຍາວ 20 ແມັດ, ກວ້າງ 4 ແມັດ, ມີ 4 ຊ່ວງ, ມີເສົາກາງ 3 ຄູ່, ມີມູນຄ່າການກໍ່ສ້າງທັງໝົດ 71,500 ໂດລາສະຫະລັດ ດ້ວຍທຶນຊ່ວຍເຫຼືອລ້າຈາກລັດຖະບານຍີ່ປຸ່ນ, ໂດຍແມ່ນບໍລິສັດ ໜູຄໍາກໍ່ສ້າງຈຳກັດຜູ້ດຽວເປັນຜູ້ຮັບເໝົາການກໍ່ສ້າງ, ຊຶ່ງມີກຳນົດເວລາກໍ່ສ້າງ 6 ເດືອນ ນັບແຕ່ມື້ເຊັນສັນຍາ (22 ຕຸລາ 2023) ແລະ ໄດ້ສຳເລັດການກໍ່ສ້າງ 100% ໃນວັນທີ 16 ມີນາ 2024. ໃນນີ້, ຍັງມີວຽກຊຸມຊົນປະກອບສ່ວນຕື່ມອີກຄື: ຖົມດິນຫົວຂົວ, ຖົມທາງເຂົ້າຫົວຂົວສອງສົ້ນຈຳນວນ 175 ລົດ ແລະ ເຮັດປ້າຍໂຄງການ, ພ້ອມຕິດຕັ້ງລວມມູນຄ່າທັງໝົດ 53 ລ້ານກວ່າກີບ. ໂຄງການດັ່ງກ່າວ, ສາມາດແກ້ໄຂການສັນຈອນໄປມາຂອງພໍ່ແມ່ປະຊາຊົນໄດ້ 18 ບ້ານ, ມີ 19,406 ຄົນ ໃຫ້ທຽວໄປມາໄດ້ສະດວກສະບາຍ.
ທ່ານ ໂຄອິຊຶມິ ຊຶໂຕະມຸ ໄດ້ມີຄຳເຫັນພ້ອມທັງກ່າວມອບໂຄງການກໍ່ສ້າງຂົວດັ່ງກ່າວ ຢ່າງເປັນທາງການ. ຈາກນັ້ນ, ທ່ານເຈົ້າແຂວງສະຫວັນນະເຂດໄດ້ຕາງໜ້າຄະນະນຳຂັ້ນແຂວງ ແລະ ເມືອງກ່າວຮັບ ແລະ ມອບຕໍ່ໃຫ້ອຳນາດການປົກຄອງເມືອງອາດສະພອນ ກໍຄືບ້ານນາຮັງນ້ອຍເປັນຜູ້ຄຸ້ມຄອງ-ນຳໃຊ້ຕໍ່ໄປ.
ທ່ານເຈົ້າແຂວງ ໄດ້ກ່າວສະແດງຄວາມຂອບໃຈຕໍ່ທ່ານເອກອັກຄະລັດຖະທູດຍີ່ປຸ່ນ ທີ່ໄດ້ໃຫ້ການສະໜັບສະໜູນຊ່ວຍເຫຼືອທີ່ມີຄຸນຄ່າຕໍ່ປະຊາຊົນບັນດາເຜົ່າຂອງພວກເຮົາ, ຊຶ່ງໂຄງການກໍ່ສ້າງຂົວແຫ່ງນີ້ແມ່ນໂຄງການທີ່ມີຄວາມສຳຄັນຫຼາຍ, ເພື່ອແກ້ໄຂການສັນຈອນໃຫ້ທຽວໄດ້ 2 ລະດູຂອງພໍ່ແມ່ປະຊາຊົນໃນ 18 ບ້ານຂອງເມືອງອາດສະພອນໃຫ້ການຂົນສົ່ງສິນຄ້າມີຄວາມສະດວກສະບາຍ, ເຮັດໃຫ້ການພັດທະນາເສດຖະກິດ-ສັງຄົມມີການຂະຫຍາຍຕົວ ແລະ ສ້າງປະຖົມປັດໄຈໃນການຫຼຸດພົ້ນອອກຈາກເມືອງທຸກຍາກ ແລະ ກ້າວສູ່ການຫຼຸດພົ້ນອອກຈາກປະເທດດ້ອຍພັດທະນາໃນປີ 2026.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ