ເປີດງານ “ບຸນກາເຟ ບ້ານເຮົາ” ເພື່ອສົ່ງເສີມກາເຟລາວ ແລະ ສ້າງລາຍຮັບໃຫ້ຊາວກະສິກອນ

 ຫຼື “ບຸນກາເຟ ບ້ານເຮົາ” ຂຶ້ນເມື່ອບໍ່ດົນມານີ້ຢູ່ສູນການຄ້າວຽງຈັນເຊັນເຕີ, ນະຄອນຫຼວງວຽງຈັນ ເພື່ອເປັນການສົ່ງເສີມກາເຟລາວ ໃຫ້ກ້າວໄປສູ່ການປະຕິບັດແບບຍືນຍົງ ແລະ ຊ່ວຍສ້າງລາຍຮັບໃຫ້ຊາວສວນກາເຟຊຶ່ງງານດັ່ງກ່າວດຳເນີນໄປແຕ່ວັນທີ 27-29 ກັນຍາຜ່ານມາແລະ ມີ 40 ກວ່າຮ້ານຈາກທົ່ວປະເທດມາວາງສະແດງຜະລິດຕະພັນກາເຟ.
ທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ ກະຊວງກະສິກຳ ແລະ ປ່າໄມ້ ກ່າວວ່າ: ວັນກາເຟສາກົນ (1 ຕຸລາ) ມີການສະເຫຼີມສະຫຼອງຫຼາຍກວ່າ 70 ປະເທດທົ່ວໂລກ; ສປປ ລາວ ໄດ້ຈັດຂຶ້ນທຸກໆປີ ນັບແຕ່ປີ 2018 ເປັນຕົ້ນມາ ແລະ ໄດ້ກາຍເປັນບ່ອນພົບປະຂອງຄົນຮັກກາເຟ ເພື່ອຍົກໃຫ້ເຫັນເຖິງຄວາມສຳຄັນຂອງກາເຟລາວ ທັງພາຍໃນ ແລະ ຕ່າງປະເທດ, ທັງສະແດງໃຫ້ເຫັນເຖິງການຮ່ວມມື ເພື່ອການພັດທະນາແບບຍືນຍົງ. ກາເຟລາວຜະລິດຢູ່ໃນເນື້ອທີ່ປະມານ 98,000 ເຮັກຕາ, ຄາດຄະເນຜົນຜະລິດໃນແຕ່ລະປີແມ່ນຢູ່ທີ່ 150,000 ໂຕນ, ສ່ວນຫຼາຍແມ່ນມາຈາກບັນດາແຂວງພາກໃຕ້. ຊາວກະສິກອນຫຼາຍກວ່າ 300,000 ຄົນມີລາຍໄດ້ຈາກອຸດສາຫະກໍາກາເຟ, ຊຶ່ງແຕ່ລະປີ ລາວໄດ້ສົ່ງອອກກາເຟ ເມັດຫຼາຍກວ່າ 100,000 ໂຕນ ມີມູນຄ່າຫຼາຍກວ່າ 100 ລ້ານໂດລາ.
ໃນໂອກາດນີ້, ທ່ານ ນາງ ຈັນທະຄອນ ບົວລະພັນ, ຮອງລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ເນັ້ນວ່າ: ກາເຟ ແມ່ນໜຶ່ງໃນສິນຄ້າກະສິກຳ ທີ່ສຳຄັນຂອງ ສປປ ລາວ, ເປັນສິນຄ້າສົ່ງອອກສຳຄັນ ທີ່ປະກອບສ່ວນເຂົ້າໃນເສດຖະກິດຂອງລາວ, ໄດ້ຊ່ວຍສ້າງລາຍຮັບໃຫ້ຊາວສວນຂະໜາດນ້ອຍ ແລະ ປະກອບສ່ວນເຂົ້າໃນລາຍຮັບແຫ່ງຊາດຂອງປະເທດ ແລະ ມີຫຼາຍພາກສ່ວນພວມພະຍາຍາມຮ່ວມມືກັນ ສົ່ງເສີມກາເຟລາວ ໃຫ້ກ້າວໄປສູ່ການປະຕິບັດແບບຍືນຍົງ ໃນການຊຸກຍູ້ການພັດທະນາສີຂຽວ.
(ຂ່າວ: ກະສິກຳ)