ຂຶ້ນຢ່າງເປັນທາງການ, ໃນວັນທີ 28 ຕຸລານີ້ ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງ ອຸດສາຫະກຳ ແລະ ການຄ້າ, ທ່ານ ນາງ ນາລີ ສີສຸລິດ ປະທານຄະນະທີ່ປຶກສາ ສະມາຄົມ ຫັດຖະກຳລາວ ແລະ ແຂກຖືກເຊີນເຂົ້າຮ່ວມ.
ທ່ານ ພູທອງ ໄຊສະນິດ ຮອງປະທານສະມາຄົມຫັດຖະກຳລາວ ໄດ້ລາຍງານວ່າ: ງານມະຫະກຳສີມືຫັດຖະກຳລາວຄັ້ງທີ 23 ປະຈຳປີ 2024 ຈັດຂຶ້ນພາຍໃຕ້ຄໍາຂວັນ: ສີໄມ້ລາຍມື ຄື ອຸທິຍານແຫ່ງການທ່ອງທ່ຽວ “ເຊື່ອມໂຍງມໍລະດົກຜ້າແພພື້ນເມືອງອາຊຽນ” ແລະ ຈຸດປະສົງຫຼັກ ຂອງການຈັດງານຄັ້ງນີ້ ແມ່ນເພື່ອສະເຫຼີມສະຫຼອງ “ວັນຫັດຖະກຳລາວ ວັນທີ 1 ພະຈິກ, ເພື່ອສ້າງຂະບວນການຂ່ຳນັບຮັບຕ້ອນການເປັນເຈົ້າພາບ ຈັດກອງປະຊຸມສໍາມະນາການຕໍ່າແຜ່ນແພພື້ນເມືອງອາຊຽນ ຄັ້ງທີ 9 (The 9th ASEAN Traditional Textiles Symposium) ຊຶ່ງຈະໄດ້ຈັດຂຶ້ນໃນວັນທີ 4-6 ພະຈິກ ປີ 2024 ທີ່ ນະຄອນຫຼວງວຽງຈັນ, ເພື່ອສ້າງຂະບວນການຕ້ອນຮັບປີທ່ອງທ່ຽວລາວ ປີ 2024 ເປັນສະຖານທີ່ທ່ອງທ່ຽວດ້ານຫັດຖະກຳ ດັ່ງຄໍາຂວັນ "ສີໄມ້ລາຍມື ຄື ອຸທິຍານແຫ່ງການທ່ອງທ່ຽວ", ສະເຫຼີມສະຫຼອງ "ຫັດຖະກຳພູມປັນຍາການຕໍ່າລາຍນາກຂອງຊຸມຊົນເຊື້ອຊາດລາວ” ໄດ້ຮັບເປັນມໍຣະດົກໂລກ ຈາກອົງການ UNESCO, ເພື່ອສ້າງກາລະໂອກາດໃຫ້ຊຸມຊົນ ແລະ ລູກຄ້າ ຜູ້ມາທ່ຽວຊົມ ໄດ້ພົບ-ໄດ້ເຫັນ ຄວາມຫຼາກຫຼາຍຂອງເຄື່ອງຫັດຖະກຳລາວ, ສ້າງຄວາມປະທັບໃຈ ແລະ ຫຼົງໄຫຼ ໃນຄວາມມະຫັດສະຈັນຂອງສີໄມ້ລາຍມືຂອງນາຍຊ່າງຫັດຖະກຳລາວເຮົາ, ເພື່ອເຕົ້າໂຮມຄວາມສາມັກຄີ ບັນດາຊາວຊ່າງຫັດຖະກຳທຸກໆທ້ອງຖິ່ນໃນທົ່ວປະເທດ ພ້ອມກັນອະນຸລັກ ແລະ ສົ່ງເສີມເຄື່ອງຫັດຖະກຳ ທີ່ມີລັກສະນະເປັນມູນເຊື້ອ, ສົ່ງເສີມພູມປັນຍາ, ຂຸດຄົ້ນທ່າແຮງທາງດ້ານຫັດຖະກຳຢູ່ທຸກທ້ອງຖິ່ນ ປະກອບສ່ວນເຂົ້າໃນການ ສ້າງລາຍຮັບ ແລະ ພັດທະນາຊີວິດການເປັນຢູ່ ຂອງປະຊາຊົນທ້ອງຖິ່ນໃຫ້ນັບມື້ດີຂຶ້ນ, ເພື່ອໃຫ້ບັນດາຊາວຊ່າງ ແລະ ຜູ້ປະກອບການ ດ້ານຫັດຖະກຳ ໄດ້ມີໂອກາດເຂົ້າເຖິງຕະຫຼາດ (ຫຼື ມີບ່ອນຂາຍ) ຜະລິດຕະພັນຫັດຖະກຳຂອງຕົນ ພ້ອມທັງ ໄດ້ມີໂອກາດພົບປະແລກປ່ຽນບົດຮຽນ, ປະສົບການທາງດ້ານການຜະລິດ, ການວາງສະແດງ ແລະ ການຂາຍ, ເພື່ອສະໜັບສະໜູນນະໂຍບາຍຂອງລັດຖະບານໃນການແກ້ໄຂຄວາມທຸກຍາກຂອງປະຊາຊົນ ແລະ ເພື່ອສ້າງສາຍສຳພັນກັບບັນດາ ປະເທດສະມາຊິກອາຊຽນດ້ານສິລະປະຫັດຖະກຳ.
ທ່ານກ່າວຕື່ມວ່າ: ງານມະຫາກຳສີມືຫັດຖະກຳລາວໄດ້ຈັດຂຶ້ນທີ່ສູນວາງສະແດງສິນຄ້າ ລາວ-ໄອເຕັກ ເປັນເວລາ 9 ວັນ, ເລີ່ມແຕ່ວັນທີ 26 ຕຸລາ ຫາ ວັນທີ 3 ພະຈິກ 2024 ຊຶ່ງມີການວາງສະແດງ-ຂາຍສິນຄ້າຫັດຖະກຳ ຂອງຫຼາຍພາກສ່ວນຄື: ແຜ່ນແພ (ຜ້າໄໝ ຜ້າຝ້າຍ); ເຄື່ອງປະດັບ (ເງິນ, ຄໍາ, ແກ້ວປະເສີດ); ເຄື່ອງຈັກສານ (ຫວາຍ-ໄມ້ປ່ອງ); ຜະລິດຕະພັນວັດທະນະທໍາ (ເຄື່ອງປັ້ນດິນເຜົາ, ໄມ້ແກະສະຫຼັກ, ເຄື່ອງດົນຕີ ພື້ນເມືອງ ແລະ ອື່ນໆ...); ເຟີນີເຈີ; ອາຫານສໍາເລັດຮູບພື້ນເມືອງ; ສະໝຸນໄພ ແລະ ອື່ນໆ, ລວມທັງໝົດ 243 ຮ້ານ.
ພາຍໃນງານຍັງມີກິດຈະກຳສຳມະນາຫົວຂໍ້: ປັບປຸງເຕັກນິກການຕໍ່າຜ້າຝ້າຍ, ເຜີຍແຜ່ການນໍາໃຊ້ກາໝາຍຫັດຖະກຳແຫ່ງຊາດ ແລະ ຫົວຂໍ້ສົ່ງເສີມການເຂົ້າເຖິງຕະຫຼາດເອີຣົບ (ໂຄງການ USAID-CBI) ແລະ ກິດຈະກຳປະກວດການແຂ່ງຂັນຜະລິດຕະພັນດີເດັ່ນ, ກິດຈະກຳສາທິດຂັ້ນຕອນການຜະລິດສິນຄ້າຫັດຖະກຳ, ການເດີນແບບອາພອນ ແລະ ອື່ນໆ.
ໃນໂອກາດດັ່ງກ່າວ, ທ່ານ ກິແກ້ວ ໄຂຄຳພິທູນ ໄດ້ໃຫ້ກຽດຕັດແຖບຜ້າ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນໃຫ້ແກ່ການເປີດງານດັ່ງກ່າວຢ່າງເປັນທາງການ, ຈາກນັ້ນບັນດາແຂກທີ່ເຂົ້າຮ່ວມໄດ້ໄປຢ້ຽມຊົມບັນດາບໍລິສັດ, ຫ້າງຮ້ານ ທີ່ນຳເອົາສິນຄ້າມາສະແດງໃນງານອີກດ້ວຍ.
(ຂ່າວ-ພາບ: ສຳນານ)
ຄໍາເຫັນ