ເປີດສະຖາບັນການເງິນຈຸລະພາກ ທີ່ຮັບເງິນຝາກ ຊັບໝັ້ນຄົງ ຈໍາກັດ

 ຫົວໜ້າກົມຄຸ້ມຄອງສະຖາບັນການເງິນ ທີ່ບໍ່ແມ່ນທະນາຄານ ທະນາຄານແຫ່ງ ສປປ ລາວ, ທ່ານ ຄໍາສະຫວັນ ໂຄດໄຊ ຮອງເຈົ້າເມືອງໄຊເສດຖາ, ໂດຍມີທ່ານ ສຸລະເດດ ປັນທຸລະອຳພອນຜູ້ອໍານວຍການໃຫຍ່ສະຖາບັນການເງິນຈຸລະພາກ ທີ່ຮັບເງິນຝາກຊັບໝັ້ນຄົງ ຈຳກັດ, ທ່ານ ນາງ ວິລະຄໍາ ສະຫວັນວາລີ ຄະນະຜູ້ຖືຮຸ້ນສະຖາບັນການເງິນ ຈຸລະພາກ ທີ່ຮັບເງິນຝາກ ຊັບໝັ້ນຄົງ ຈໍາກັດ, ມີຜູ້ບໍລິຫານ,ພະນັກງານວິຊາການທີ່ກ່ຽວຂ້ອງ, ພ້ອມດ້ວຍແຂກທີ່ຖືກເຊີນເຂົ້າຮ່ວມ.

ໃນພິທີ, ທ່ານ ສຸລະເດດ ປັນທຸລະອຳພອນໄດ້ກ່າວເຖິງພາບລວມຂອງສະຖາບັນວ່າ: ສະຖາບັນການເງິນຈຸນລະພາກ ຖືກສ້າງຕັ້ງຂຶ້ນດ້ວຍທຶນຈົດທະບຽນ 30 ຕື້ກີບຊຶ່ງເປັນສະຖາບັນການເງິນໜຶ່ງທີ່ຢູ່ພາຍໃຕ້ການຄຸ້ມຄອງຈາກທະນາຄານ ແຫ່ງ ສປປ ລາວ ແລະ ປະຕິບັດຕາມວິໄສທັດຂອງສະຖາບັນການເງິນຈຸລະພາກຂອງພວກເຮົາທີ່ໄດ້ວາງໄວ້ຄື:ມຸ່ງສູ່ການບໍລິການທີ່ເປັນເລີດທາງດ້ານການເງິນຈຸລະພາກ,ສະໜັບສະໜູນໃຫ້ລູກຄ້າເຕີບໃຫຍ່ທາງດ້ານການເງິນ ແລະ ຍົກລະດັບຄຸນນະພາບຊີວິດລູກຄ້າໃຫ້ດີຂຶ້ນຢ່າງຍືນຍົງ ຄວບຄຸມທົ່ວປະເທດ ເຮັດໃຫ້ເປັນສະຖາບັນການເງິນຊັ້ນນຳໃນ ສປປ ລາວ ແລະ ສືບຕໍ່ຍົກລະດັບມາດຕະຖານການບໍລິການດ້ວຍເຕັກໂນໂລຊີທີ່ທັນສະໄໝຂອງຍຸກດີຈີຕອນ4.0.ນອກນັ້ນ, ຍັງພັດທະນາຜະລິດຕະພັນໃຫ້ທັນສະໄໝ, ເຂົ້າເຖິງງ່າຍ, ວ່ອງໄວ ກົງກັບຄວາມຕ້ອງການຂອງລູກຄ້າຢ່າງສ້າງສັນ ແລະ ມີຄຸນຄ່າ, ສ້າງມູນຄ່າໃຫ້ແກ່ຜູ້ຖືຮຸ້ນດ້ວຍການສ້າງຄວາມສົມດູນລະຫວ່າງຜູ້ຖືຮຸ້ນພະນັກງານລູກຄ້າ ແລະ ຄູ່ຮ່ວມທຸລະກິດຢ່າງຍຸຕິທຳ ແລະ ໂດຍຢູ່ພາຍໃຕ້ລະບຽບກົດໝາຍຂອງທະນາຄານ ແຫ່ງ ສປປ ລາວ ແລະ ຂະແໜງການທີ່ກ່ຽວຂ້ອງວາງອອກຢ່າງເຂັ້ມງວດ.

ທ່ານ ສຸລະເດດ ປັນທຸລະອຳພອນ ກ່າວຕື່ມວ່າ: ສະຖາບັນການເງິນຈຸລະພາກຂອງພວກເຮົາແມ່ນເຮັດ 3 ໜ້າທີ່ຕົ້ນຕໍຄື: 1. ເຮັດໜ້າທີ່ຮັບເງິນຝາກຈາກສັງຄົມທົ່ວໄປລວມທັງບຸກຄົນ ແລະ ນິຕິບຸກຄົນ ຊຶ່ງມີປະເພດເງິນຝາກປະຢັດ, ຝາກມີກຳນົດໄລຍະສັ້ນ, ໄລຍະກາງ, ໄລຍະຍາວດ້ວຍອັດຕາດອກເບັ້ຍສົມເຫດສົມຜົນຕາມກົນໄກຕະຫຼາດໂດຍປະຕິບັດຕາມລະບຽບການທີ່ທາງການວາງອອກເປັນແຕ່ລະໄລຍະ;2.ເຮັດໜ້າທີ່ປ່ອຍເງິນກູ້ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງສັງຄົມພາຍໃນປະເທດ ແລະ ເຫັນໄດ້ຄວາມຈຳເປັນໃນການຊຸກຍູ້ສົ່ງເສີມທຸລະກິດຂະໜາດນ້ອຍ ແລະ ກາງໃຫ້ມີບາດກ້າວຂະຫຍາຍ ຕົວຢ່າງຕໍ່ເນື່ອງໃນສະເພາະໜ້າ ແລະ ຍາວນານ ໂດຍສະເພາະນັກທຸລະກິດໃນຂະແໜງການຄ້າ-ການບໍລິການ, ຂະແໜງອຸດສາຫະກຳ-ຫັດຖະະກຳ, ຂະແໜງກະສິກຳ ແລະ ຂະແໜງການອື່ນໆ ທີ່ຕ້ອງການແຫຼ່ງທຶນເພື່ອດໍາເນີນທຸລະກິດ ຫຼື ຂະຫຍາຍທຸລະກິດຕາມຄວາມຕ້ອງການຂອງຕົນ,ການປ່ອຍເງິນກູ້ຈະມີທັງໄລຍະສັ້ນ,ໄລຍະກາງ ແລະ ໄລຍະຍາວໂດຍອີງຕາມປະເພດທຸລະກິດຂອງລູກຄ້າດ້ວຍການບໍລິການທີ່ວ່ອງໄວ, ປອດໄພ, ມີຄວາມຊັດເຈນສູງ ແລະ ເປັນກັນເອງ; 3. ເຮັດໜ້າທີ່ເປັນຊື່ກາງໃນການຊຳລະສະສາງ,ການໂອນເງິນລະຫວ່າງທະນາຄານທຸລະກິດພາຍໃນປະເທດດ້ວຍກັນຢ່າງສະດວກສະບາຍ ແລະ ມີຄວາມປອດໄພສູງ.

ການເປີດສຳນັກງານຢ່າງເປັນທາງການໃນມື້ນີ້, ຖືເປັນການແຈ້ງໃຫ້ສັງຄົມຮັບຊາບຢ່າງຖົ່ວເຖິງ ບໍ່ວ່າໃນເຂດຕົວເມືອງ ກໍຄືເຂດຊົນນະບົດ ເພື່ອໃຫ້ລູກຄ້າຜູ້ທີ່ຕ້ອງການຝາກເງິນ ຫຼື ຕ້ອງການເງິນກູ້ທີ່ຢາກເຂົ້າຫາການບໍລິການ ດ້ານການເງິນທີ່ເປັນກັນເອງ, ຮັບປະກັນຄວາມປອດໄພ ແລະ ໝັ້ນຄົງອີກດ້ວຍ.

ຈາກນັ້ນ, ທ່ານ ສຸລະເດດ ປັນທຸລະອຳພອນ, ທ່ານ ວິສອນ ໄຊສົງຄາມ ແລະ ທ່ານ ນາງ ວິລະຄໍາ ສະຫວັນວາລີ ໄດ້ໃຫ້ກຽດຂຶ້ນກົດປຸມ ເພື່ອເປັນສິຣິມຸງຄຸນເປີດສະຖາບັນການເງິນຈຸລະພາກ ທີ່ຮັບເງິນຝາກ ຊັບໝັ້ນຄົງ ຈໍາກັດ ຢ່າງເປັນທາງການ.