ເປີດຊຸດອົບຮົມ-ຫັດແອບ ການທະຫານ

 ມີຄະນະພັກ-ຄະນະບັນຊາ, ບັນດາແຂກຖືກເຊີນຈາກກົມກອງອ້ອມຂ້າງ ພ້ອມດ້ວຍພະນັກງານ-ນັກຮົບທົ່ວກອງພັນໃຫຍ່ 11 ເຂົ້າຮ່ວມ.

ສະຫາຍ ພັນໂທ ອັບດາລາ ຈັນທະວົງ ຫົວໜ້າຂະແໜງອົບຮົມ ກອງພັັນໃຫຍ່ 11 ໄດ້ຜ່ານແຜນການອົບຮົມ-ຫັດແອບ ການທະຫານ, ການເມືອງ, ພະລາທິການ ແລະ ເຕັກນິກ ປະຈຳປີ 2025. ໂດຍປະຕິບັດຕາມເນື້ອໃນຄຳສັ່ງຂອງກົມໃຫຍ່ເສນາທິການກອງທັບ ແລະ ຄຳສັ່ງແນະນຳຂອງກົມອົບຮົມກ່ຽວກັບການຈັດຕັ້ງອົບຮົມ-ຫັດແອບການທະຫານ,ການເມືອງ, ພະລາທິການ ແລະ ເຕັກນິກ ປະຈຳປີ 2025 ລົງສູ່ກົມກອງໃຫ້ເປັນຮູບປະທຳ ແລະ ມີຄຸນນະພາບສູງ. ອົບຮົບ-ຫັດແອບ, ປັບປຸງລະບຽບແບບແຜນ, ຝຶກຝົນກໍາລັງແຮງກາຍໃຫ້ນາຍ ແລະ ພົນທະຫານ ໃຫ້ມີແນວຄິດການເມືອງໜັກແໜ້ນ, ມີຄວາມຮູ້ຄວາມສາມາດໃນລະດັບທີ່ແນ່ນອນ ໂດຍຖືເອົາຄຸນນະພາບເປັນຕົ້ນຕໍ. ສຳລັບເນື້ອໃນອົບຮົມ-ຫັດແອບ, ລະບຽບຂໍ້ກຳນົດ, ລະບຽບຮູບແຖວ 15 ວັນ, ກິລາການທະຫານ 8 ວັນ, ສິນລະປະຍຸດເຫຼົ່າຮົບ 8 ວັນ, ຍຸດທະວິທີເຫຼົ່າຮົບ 8 ວັນ, ຄວາມຮູ້ພື້ນຖານກ່ຽວກັບເຫຼົ່າຮົບ 1 ວັນ, ອົບຮົມວຽກງານເສນາທິການໃຫ້ຜູ້ບັນຊາ 5 ວັນ, ວຽກງານການເມືອງຮັບໃຊ້ສູ້ຮົບ 15 ວັນ, ວຽກງານພະລາທິການຮັບໃຊ້ສູ້ຮົບ 10 ວັນ, ວຽກງານເຕັກນິກຮັບໃຊ້ສູ້ຮົບ 10 ວັນ, ສິນລະປະຍຸດທະຫານຮາບ 40 ວັນ ແລະ ອົບຮົມຍຸດທະວິທີທະຫານຮາບ 60 ວັນ. ການອົບຮົມ-ຫັດແອບ ແມ່ນຈະໄດ້ດໍາເນີນເປັນເວລາ 180 ວັນຊຶ່ງໄດ້ແບ່ງອອກເປັນ 2 ໄລຍະຄື: ໄລຍະທີ I ເລີ່ມແຕ່ເດືອນກຸມພາ ຫາ ພຶດສະພາ 2025 ແລະ ໄລຍະທີ II ເລີ່ມແຕ່ເດືອນມິຖຸນາ ເຖິງ ເດືອນຕຸລາ 2025ຊຶ່ງມີຈຳນວນພົນເຂົ້າຮ່ວມທັງຫມົດ 1,899 ສະຫາຍ. ໃນພິທີຍັງໄດ້ຜ່ານເນື້ອໃນຂໍ້ແຂ່ງຂັນ ໃນບັ້ນອົບຮົມຫັດແອບ ຂອງກອງພັນໃຫຍ່ 11 ເພື່ອພ້ອມກັນນຳໄປຈັດຕັ້ງປະຕິບັດໃຫ້ມີປະສິດທິຜົນສູງ ແລະ ສໍາເລັດຕາມແຜນການ.

ໂອກາດນີ້, ສະຫາຍ ພົນຕີ ພັນແສງ ບຸນພັນ ໄດ້ມີຄຳເຫັນໂອ້ລົມຕໍ່ພິທີ, ສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດທີ່ຄະນະພັກ-ຄະນະບັນຊາແຕ່ລະຂັ້ນຍາດມາໄດ້ໃນໄລຍຜ່ານມາ, ກໍຄືການຫ້າງຫາກະກຽມເນື້ອໃນດ້ານຕ່າງໆ ໃຫ້ແກ່ການເປີດຊຸດອົບຮົມໃນຄັ້ງນີ້, ພ້ອມທັງເນັ້ນໜັກໃຫ້ຄະນະພັກ-ຄະນະບັນຊາ ຕ້ອງເອົາໃຈໃສ່ວຽກງານອົບຮົມ-ຫັດແອບເປັນບັນຫາສໍາຄັນ ລົງໃກ້ຊິດຕິດແທດກັບພະແນກການກົມກອງ ໃນການຈັດຕັ້ງຫັດແອບ, ເປັນເຈົ້າການເຕົ້າໂຮມຄວາມສາມັກຄີໃຫ້ແໜ້ນແຟ້ນ, ພະນັກງານສະມາຊິກພັກ-ນັກຮົບແຕ່ລະສະຫາຍຕ້ອງຕື່ນຕົວເຂົ້າຮ່ວມການຫັດແອບໃຫ້ເປັນຂະບວນການຟົດຟື້ນ ແລະ ມີຄຸນນະພາບສູງ ພ້ອມທັງຮັບປະກັນໃຫ້ໄດ້ຄວາມປອດໄພ 100%.

ໃນຕອນທ້າຍ, ຍັງໄດ້ຮັບຊົມການເດີນຂະບວນສວນສະໜາມ ຈາກບັນດາກ້ອນກຳລັງຂອງເຫຼົ່າຮົບ ແລະ ຊົມສະແດງຂອງກົມກອງຊຶ່ງໄດ້ສະແດງເຖິງຄວາມເຕີບໃຫຍ່ເຂັ້ມແຂງ ແລະ ທັນສະໄໝ ຂອງເຫຼົ່າຮົບທະຫານຮາບຍານເກາະທີ 11 ໃນປັດຈຸບັນ.