ເນື່ອງໃນໂອກາດສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວຄົບຮອບ 69 ປີ (22/3/1955-22/3/2024), ສະຫາຍແກ້ວລັດຕະນະ ສີຫາວົງ ຄະນະປະຈໍາພັກແຂວງຮອງປະທານສະພາປະຊາຊົນແຂວງຈຳປາສັກໄດ້ສະແດງຄວາມຮູ້ສຶກຜ່ານໜັງສືພິມປະຊາຊົນວ່າ: ທົ່ວອົງຄະນະພັກແຂວງ, ທົ່ວກໍາລັງປະກອບອາວຸດແລະ ທົ່ວປວງຊົນຊາວແຂວງຈໍາປາສັກ ມີຄວາມຊື່ນຊົມຍິນດີ ແລະ ຂ້າພະເຈົ້າໃນນາມການນໍາ ແຂວງຈໍາປາສັກ ຂໍສະແດງຄວາມຂໍ່ານັບຊົມເຊີຍ ຕໍ່ວັນທີ່ມີຄວາມໝາຍສໍາຄັນທາງປະຫວັດສາດ ຂອງພັກ ກໍຄືຂອງຊາດລາວເຮົາ.
ດ້ວຍຄວາມເອກອ້າງທະນົງໃຈ ແລະ ຄວາມເຊື່ອໝັ້ນຕໍ່ແນວທາງອັນຖືກຕ້ອງ ສະຫຼາດ ສ່ອງໃສຂອງພັກ ກໍຄື ອະນາຄົດອັນສະຫວ່າງສະໄຫວຂອງປະເທດຊາດ, ພວກເຮົາຍິ່ງຄິດຄໍານຶງ ແລະ ຈົດຈໍາຄຸນງາມຄວາມດີ ຜົນງານອັນໃຫຍ່ຫຼວງຂອງ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປະຊາຊົນບັນດາເຜົ່າ ວິລະບູລຸດແຫ່ງຊາດລາວຍຸກສະໄໝ ແລະ ບັນດາຜູ້ນໍາ ພັກ-ລັດ ຕະຫຼອດເຖິງພະນັກງານ-ສະມາຊິກພັກ, ນັກຮົບ, ປະຊາຊົນລາວບັນດາເຜົ່າ ທີ່ອຸທິດຊີວິດ ເພື່ອປະເທດຊາດ, ເພື່ອພາລະກິດປະຕິວັດ ແລະ ເພື່ອຄວາມສົມບູນພູນສຸກຂອງປະຊາຊົນ ບັນດາເຜົ່າ.
ເມື່ອຫວນຄືນເຖິງປະຫວັດສາດ ແຫ່ງການກໍາເນີດ, ການຄົງຕົວຂອງພັກເຮົາ ຕະຫຼອດໄລຍະທີ່ຜ່ານມາ ພວກເຮົາມີຄວາມເອກອ້າງທະນົງໃຈທີ່ເຫັນວ່າ: 69 ປີ ແຫ່ງການກໍາເນີດເຕີບໃຫຍ່ ຂະຫຍາຍຕົວ ກໍຄື 69 ປີ ແຫ່ງການນໍາພາຂອງພັກປະຊາຊົນປະຕິວັດລາວ, ພັກເຮົາໄດ້ແບກຫາບ ພາລະກໍາປະຫວັດສາດອັນຍິ່ງໃຫຍ່ ໃນແຕ່ລະໄລຍະທີ່ແຕກຕ່າງກັນ, 69 ປີ ຜ່ານໄປບັນດາສະຫາຍສະມາຊິກພັກ, ນັກຮົບປະຕິວັດຜູ່ຍິ່ງໃຫຍ່ ຫລາຍຄົນໄດ້ຄຽງບ່າຄຽງໄຫຼ່ຮ່ວມຂະບວນການ ແລະ ອຸທິດຕົນໃນແປວໄຟປະຕິວັດ, ມາຮອດມື້ນີ້ ກໍຍັງມີຊີວິດຢູ່ ແລະ ບາງຄົນກໍໄດ້ເສຍຊີວິດໄປແລ້ວ; ເພື່ອສືບທອດພາລະກໍາປະຫວັດສາດອັນສະຫງ່າອົງອາດ, ເພື່ອພາລະກິດປະຕິວັດ ອັນຍິ່ງໃຫຍ່, ເພື່ອຄວາມຢູ່ດີກິນດີຂອງປະຊາຊົນບັນດາເຜົ່າ, ເພື່ອນໍາເອົາແຂວງຈໍາປາສັກຂອງພວກເຮົາກ້າວຂຶ້ນ ປະກອບສ່ວນຢ່າງສົມກຽດ ເຂົ້າໃນການສ້າງສາພັດທະນາປະເທດຊາດໃຫ້ຫຼຸດພົ້ນອອກຈາກຄວາມທຸກຍາກ ແລະ ສະຖານະພາບດ້ອຍພັດທະນາ.
ເພື່ອສືບຕໍ່ພາລະກິດຂອງພັກ ຂ້າພະເຈົ້າພ້ອມດ້ວຍໝູ່ຄະນະ ການຈັດຕັ້ງທຸກຂັ້ນຈະສືບຕໍ່ຢຶດໝັ້ນໃນແນວຄິດທິດສະດີມາກ-ເລນິນ ກໍຄື ຈຸດໝາຍສັງຄົມນິຍົມ ຢ່າງໜັກແໜ້ນ, ບໍ່ຄໍາພິຕາຍຕົວ, ຕ້ອງປະດິດສ້າງ ໝູນໃຊ້ທິດສະດີ ແລະ ບົດຮຽນດ້ານຕ່າງໆ ໃຫ້ເຂົ້າກັບເງື່ອນໄຂ ຕົວຈິງ ແລະ ສະພາບຈຸດພິເສດຂອງພວກເຮົາ, ມີການສະຫຼຸບ-ຖອດຖອນບົດຮຽນຈາກພຶດຕິກໍາ ແລະ ປັບປຸງໃຫ້ສອດຄ່ອງ.
ຢຶດໝັ້ນ ແລະ ປະຕິບັດຢ່າງຖືກຕ້ອງບັນດາຫຼັກການພື້ນຖານ ການຈັດຕັ້ງ ແລະ ການເຄື່ອນໄຫວຂອງພັກ, ນັ້ນຄືຫຼັກການລວມສູນປະຊາທິປະໄຕ, ຕ້ອງໄຈ້ແຍກໃຫ້ໄດ້ອັນໃດຄວນລວມສູນ, ອັນໃດຄວນມີປະຊາທິປະໄຕ; ຖ້າມີແຕ່ລວມສູນຈົນເກີນໄປກໍຈະຂາດປະຊາທິປະໄຕ, ຖ້າມີແຕ່ປະຊາທິປະໄຕຫຼາຍໂພດກໍຂາດການລວມສູນ ກາຍເປັນອະນາທິປະໄຕ, ອາດຍາສິດ, ເຈົ້າໂຄດ, ...; ສະນັ້ນ ຕ້ອງຖືສໍາຄັນການເສີມຂະຫຍາຍຄວາມສາມັກຄີເປັນກະພາບ ບົນພື້ນຖານແນວທາງນະໂຍບາຍຂອງພັກ, ຖືສໍາຄັນການເສີມຂະຫຍາຍປະຊາທິປະໄຕ ໄປຄຽງຄູ່ກັບການປະຕິບັດກົດລະບຽບຂອງພັກ ແລະ ລະບອບດໍາເນີນຊີວິດການເມືອງຕໍານິສົ່ງຂ່າວຊ່ວຍເຫຼືອກໍ່ສ້າງກັນ.
ຢຶດໝັ້ນໃນທາດແທ້ຊົນຊັ້ນ ແລະ ຄວາມຈົງຮັກພັກດີ ຕໍ່ຜົນປະໂຫຍດລວມຂອງຊາດ, ຂອງປະຊາຊົນ; ຖືການສະໜັບສະໜູນຂອງປະຊາຊົນ ເປັນສິ່ງສໍາຄັນຕັດສິນບົດບາດນໍາພາ ແລະ ການກໍາອໍານາດຂອງພັກ; ຈາກນັ້ນ ແມ່ນຄວາມເປັນເຈົ້າການປັບປຸງແບບແຜນວິທີນໍາພາຂອງພັກ, ເຄື່ອນໄຫວຕິດແທດກັບປະຊາຊົນ, ເຄົາລົບສິດເປັນເຈົ້າຂອງປະຊາຊົນ, ເຮັດທຸກສິ່ງທຸກຢ່າງ ເພື່ອຄວາມຮັ່ງມີຜາສຸກຂອງປະຊາຊົນ ແລະຄວາມມັ່ງຄັ່ງເຂັ້ມແຂງຂອງປະເທດຊາດ.
ຢຶດໝັ້ນ ຈິດໃຈຊາດເອກະລາດ, ເປັນເຈົ້າຕົນເອງ, ເພິ່ງຕົນເອງ, ສ້າງຄວາມເຂັ້ມແຂງ ດ້ວຍຕົວເອງຕັ້ງໜ້າເສີມຂະຫຍາຍກໍາລັງແຮງພາຍໃນ ສົມທົບກັບການພົວພັນຮ່ວມມືກັບພັກປະເທດເພື່ອນມິດຍຸດທະສາດ ແລະ ຍາດແຍ່ງເອົາການສະໜັບສະໜູນຊ່ວຍເຫຼືອຈາກພາຍນອກ ຢ່າງມີຫຼັກການສ້າງເປັນກໍາລັງແຮງເຂົ້າໃນພາລະກິດປົກປັກຮັກສາ ແລະ ພັດທະນາສ້າງສາປະເທດຊາດ.
ບັນຫາສໍາຄັນ, ຈະສືບຕໍ່ໂຄສະນາສຶກສາອົບຮົມການເມືອງ, ນໍາພາແນວຄິດ ສະມາຊິກພັກ, ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ໃຫ້ເຊື່ອມຊຶມ, ກໍາແໜ້ນແນວທາງນະໂຍບາຍຂອງພັກ, ກົດໝາຍຂອງລັດ ເວົ້າລວມເວົ້າສະເພາະ ແມ່ນເນື້ອໃນ ຈິດໃຈບັນດາມະຕິໃນສະໄໝທີ XI ຂອງສູນກາງພັກ ແລະ ບັນດາມະຕິ ໃນສະໄໝທີ VIII ຂອງແຂວງ; ເອົາໃຈໃສ່ຈັດຕັ້ງໂຄສະນາ-ປາຖະກະຖາ ເລົ່າມູນເຊື້ອວັນສໍາຄັນຕ່າງຂອງພັກ, ຂອງຊາດ, ຂອງທ່ານຜູ່ນໍາ ແລະ ວັນສໍາຄັນອື່ນໆ ຕິດພັນກັບຂະບວນ“ການແຂ່ງຂັນ ແລະ ການພັດທະນາ” ໃຫ້ກວ້າງຂວາງ ແລະ ຟົດຟື້ນ.
ຄໍາເຫັນ