 |
ການລົງນາມໃນຄັ້ງນີ້, ເປັນການຮ່ວມມືລະຫວ່າງພາກລັດ ແລະ ເອກະຊົນ ໃນການຈັດຕັ້ງປະຕິບັດວຽກງານຄວາມປອດໄພ ແລະ ສຸຂະພາບແຮງງານ ໂດຍສະເພາະ ແມ່ນການໃຫ້ບໍລິການກວດສຸຂະພາບປະຈຳປີ ຂອງຜູ້ອອກແຮງງານໃຫ້ເປັນໄປຕາມກົດໝາຍ, ລະບຽບການ ແລະ ຫຼັກການດ້ານວິຊາການຢ່າງມີປະສິດທິພາບ ແລະ ປະສິດທິຜົນສູງ. ຄວາມສຳຄັນຂອງການກວດສຸຂະພາບແຮງງານ ວຽກງານນີ້ຖືກກຳນົດໄວ້ໃນກົດໝາຍວ່າດ້ວຍແຮງງານ ແລະ ດຳລັດວ່າດ້ວຍຄວາມປອດໄພ ແລະ ສຸຂະພາບແຮງງານ. ພາກລັດມີພາລະບົດບາດໃນການສ້າງນິຕິກຳ ແລະ ຕິດຕາມຊຸກຍູ້, ຂະນະທີ່ຜູ້ໃຊ້ແຮງງານມີໜ້າທີ່ຮັບຜິດຊອບໂດຍກົງພາຍໃຕ້ກົດໝາຍໃນການນຳພາຜູ້ອອກແຮງງານໄປກວດສຸຂະພາບປະຈຳປີ ຫຼື ກວດຕາມປັດໃຈສ່ຽງຂອງໜ້າວຽກ ເພື່ອຮັບປະກັນສຸຂະພາບທີ່ດີ ແລະ ປ້ອງກັນພະຍາດອາຊີບ. ການຮ່ວມມືກັບໂຮງໝໍສາກົນຄຳມ່ວນ ຈະຊ່ວຍໃຫ້ພາກລັດສາມາດຕິດຕາມ ແລະ ບັນທຶກຂໍ້ມູນ ສາມາດເກັບກຳປະຫວັດການເຮັດວຽກ ແລະ ຂໍ້ມູນສຸຂະພາບແຮງງານລາວ ແລະ ຕ່າງປະເທດຢູ່ ສປປ ລາວ ຢ່າງເປັນລະບົບ ນັບຕັ້ງແຕ່ມື້ເຂົ້າເຮັດວຽກ.
 |
ເພື່ອເປັນບ່ອນອີງໃນການວິເຄາະຫາສາ ເຫດການເຈັບປ່ວຍ ຫຼື ເສຍຊີວິດ ແລະ ຢັ້ງຢືນການເປັນພະຍາດອາຊີບ ທັງເປັນຂໍ້ມູນພື້ນຖານໃຫ້ພາກລັດວາງນະໂຍບາຍການປິ່ນປົວ ແລະ ການຊົດເຊີຍຕ່າງໆ ທີ່ເປັນຄວາມຮັບຜິດຊອບຂອງຜູ້ໃຊ້ແຮງງານ ຫຼື ກອງທຶນປະກັນສັງຄົມ. ຮ່ວມລົງນາມໂດຍທ່ານ ນາງ ບົວວັນ ປັນຍາວົງ ຮອງຫົວໜ້າກົມຄຸ້ມຄອງແຮງງານ ແລະ ທ່ານ ຖັງ ຈິນປິງ ປະທານໂຮງໝໍສາກົນຄຳມ່ວນ ໂດຍມີບັນດາແຂກຖຶກເຊີນເຂົ້າຮ່ວມເປັນສັກຂີພິຍານ.
ຂ່າວ: ແດງສະຫວັດ
ຄໍາເຫັນ