 |
ສະຫາຍ ເລຂາພັກແຂວງສະຫວັນນະເຂດ ໄດ້ກ່າວເປີດກອງປະຊຸມເຜີຍແຜ່ເຊື່ອມຊຶມບາງນິຕິກຳຂອງສູນກາງພັກ ແລະ ແນະນຳກ່ຽວກັບພາລະບົດບາດ, ສິດ, ໜ້າທີ່ ແລະ ແບບແຜນວິທີເຮັດວຽກຂອງສະຫາຍເລຂາ, ຮອງເລຂາພັກເມືອງ, ຊຶ່ງສະຫາຍໄດ້ຍົກໃຫ້ຮູ້ເຖິງບາງເນື້ອສຳຄັນຂອງເອກະສານ, ເພື່ອໃຫ້ໄດ້ຮັບຮູ້, ເຂົ້າໃຈເລິກເຊິ່ງ ແລະ ມີຄວາມເປັນເອກະພາບຮ່ວມກັນ, ແນໃສ່ເຮັດໃຫ້ການຈັດຕັ້ງເຄື່ອນໄຫວວຽກງານຕົວຈິງຢູ່ໃນຂັ້ນຮາກຖານຂອງບັນດາສະຫາຍເລຂາ-ຮອງເລຂາພັກເມືອງໄດ້ຮັບຜົນສຳເລັດ ແລະ ຖືກຕ້ອງສອດຄ່ອງຕາມສິດ, ໜ້າທີ່ ແລະ ພາລະບົດບາດທີ່ຄະນະພັກຂັ້ນເທິງໄດ້ກຳນົດໄວ້. ຈາກນັ້ນ, ກໍໄດ້ເຜີຍແຜ່ເຊື່ອມຊຶມຄຳສັ່ງຂອງຄະນະປະຈຳພັກແຂວງ ວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂປະກົດການກຍໍ້ທໍ້ໃນສັງຄົມທົ່ວແຂວງສະຫວັນນະເຂດ, ເນື່ອງຈາກວ່າ ໃນປັດຈຸບັນ, ສະພາບປະກົດການຫຍໍ້ທໍ້ໃນສັງຄົມຂອງແຂວງເຫັນວ່າມີທ່າອ່ຽງເພີ່ມຂຶ້ນ ແລະ ແຜ່ລາມກວ້າງອອກເປັນຕົ້ນ: ການຂຸດຄົ້ນຊັບພະຍາກອນທຳມະຊາດແຮ່ທາດຕ່າງໆເຊັ່ນ: ແຮ່ຄຳຕົກຂ້ອນ, ຄຳເຄົ້າ ແລະ ອື່ນໆ. ການລັກລອບຂຸດຄົ້ນໄມ້, ຊື້-ຂາຍໄມ້, ການບຸກລຸກຈັບຈອງທີ່ດິນລັດ, ບັນຫາຢາເສບຕິດ, ປຸ້ນຈີ້ຊິງຊັບ, ຂີ້ລັກງັດແງະ, ການມົ້ວສຸມ, ການນຳເຂົ້າ ແລະ ນຳໃຊ້ພາຫະນະບໍ່ຖືກຕ້ອງຕາມລະບຽບກົດໝາຍ, ເຮັດໃຫ້ສັງຄົມບໍ່ມີຄວາມສະຫງົບ ແລະ ເປັນການກົດໜ່ວງຖ່ວງດຶງການພັດທະນາເສດຖະກິດ-ສັງຄົມຂອງແຂວງ, ສົ່ງຜົນກະທົບຕໍ່ບົດບາດ ແລະ ອິດທິພົນຂອງການຊີ້ນຳ-ນຳພາຂອງຄະນະພັກພວກເຮົາໃນແຕ່ລະຂັ້ນ.
 |
ດັ່ງນັ້ນ, ເພື່ອເຮັດໃຫ້ການແກ້ໄຂສະພາບການຫຍໍ້ທໍ້ທີ່ເກີດຂຶ້ນໄດ້ຮັບການແກ້ໄຂຕາມກົດໝາຍ ແລະ ນິຕິກໍາໃຕ້ກົດໝາຍຢ່າງເດັດຂາດເຂັ້ມງວດ, ຄະນະປະຈຳພັກແຂວງຈຶ່ງໄດ້ອອກຄໍາສັ່ງ, ຊຶ່ງມີເນື້ອໃນບາງຕອນສຳຄັນວ່າ: ມອບໃຫ້ຄະນະປະຈຳພັກເມືອງ-ນະຄອນ, ຄະນະພັກກອງບັນຊາການ ປກຊ-ປກສ ແຂວງ, ເລຂາຄະນະພັກຮາກຖານ, ເລຂາໜ່ວຍພັກຮາກຖານພະແນກການ, ອົງການທຽບເທົ່າໃນຂອບເຂດທົ່ວແຂວງ ເປີດຂະບວນການແກ້ໄຂປະກົດການຫຍໍ້ທໍ້ໃນສັງຄົມ ແລະ ພາຍໃນການຈັດຕັ້ງຕົນຢ່າງເປັນເຈົ້າການ, ມອບໃຫ້ຄະນະພັກ ປກຊ-ປກສ ແຂວງ ສົມທົບຄະນະປະຈຳພັກເມືອງ-ນະຄອນ ດຳເນີນການແກ້ໄຂບັນຫາຢາເສບຕິດຕາມກົດໝາຍໂດຍສະເພາະບັນຫາມົ້ວສຸມຢາເສບຕິດ (ລໍລາເຈັ້ນ, ຢາສູບໄຟຟ້າ, ນ້ຳກະທ້ອມ) ແລະ ມອບໃຫ້ຄະນະພັກກອງບັນຊາການ ປກສ ແຂວງ ສົມທົບກັບອົງການໄອຍະການປະຊາຊົນແຂວງເຂັ້ມງວດຕໍ່ກັບຄະດີລັກຊັບຂອງລັດ-ລວມໝູ່.
ຄຽງຄູ່ນີ້, ການຕິດຕາມຊຸກຍູ້ບຸກຄົນທີ່ຄອບຄອງອາວຸດເສິກ, ອາວຸດລ່າເນື້ອ, ທາດລະເບີດ,ທາກແຕກທີ່ບໍ່ຖືກຕ້ອງຕາມກົດໝາຍໃຫ້ສຶກສາອົບຮົມນຳເອົາມາມອບໃຫ້ເຈົ້າໜ້າທີ່, ມອບໃຫ້ຄະນະພັກກອງບັນຊາການ ປກສ-ປກຊ. ແຂວງສົມທົບ ຄະນະພັກເມືອງ-ນະຄອນ, ຫັນເອົາກຳລັງເປົ້າໝາຍລົງກໍ່ສ້າງຮາກຖານປະຈຳການຢູ່ແຕ່ລະທ້ອງຖິ່ນ, ບ້ານ-ກຸ່ມບ້ານ ເພື່ອຊ່ວຍໜູນ ແລະ ແກ້ໄຂປະກົດການຫຍໍ້ທໍ້ຢູ່ບໍລິເວນຊາຍແດນໃຫ້ຄວາມສະຫງົບປອດໄພໂດຍພື້ນຖານ, ໃຫ້ຄະນະກອງບັນຊາການ ປກຊ ແຂວງ, ກອງຮ້ອຍທະຫານຊາຍແດນ ເຄື່ອນໄຫວກວດກາລາດຕະເວນເຂດລຽບຕາມຊາຍແດນທີ່ຫຼໍ່ແຫຼມ, ຖ້າພົບເຫັນແມ່ນໃຫ້ໃຊ້ມາດຕະການເດັດຂາດ. ທັງນີ້, ກໍເພື່ອເປັນການສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ້ທີ່ເກີດຂຶ້ນໃນສັງຄົມໃຫ້ຫຼຸດໜ້ອຍຖອຍ ແລະ ໝົດໄປຈາກສັງຄົມເທື່ອລະກ້າວ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ