ຮອງລັດຖະມົນຕີກະຊວງການຕ່າງປະເທດ ທັງເປັນເຈົ້າໜ້າທີ່ອາວຸໂສອາຊຽນຂອງ ສປປ ລາວ. ໃນໂອກາດນີ້, ທ່ານ ໂພໄຊ ໄຂຄຳພິທູນຮອງເຈົ້າແຂວງສະຫວັນນະເຂດ ກໍໄດ້ໃຫ້ກຽດເຂົ້າຮ່ວມ ແລະ ກ່າວຄຳເຫັນໃນພິທີເປີດກອງປະຊຸມ. ກອງປະຊຸມຄັ້ງນີ້ ມີຜູ້ຕາງໜ້າຈາກບັນດາກະຊວງ ແລະ ຈຸດປະສານງານອາຊຽນ ແລະ ພະແນກການກ່ຽວຂ້ອງຂອງບັນດາແຂວງພາກກາງ ແລະ ພາກໃຕ້ ເຂົ້າຮ່ວມຫຼາຍກວ່າ 120 ທ່ານ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເຜີຍແຜ່ກ່ຽວກັບການເຄື່ອນໄຫວວຽກງານການຕ່າງປະເທດຂອງ ສປປ ລາວ ໃນໄລຍະໜຶ່ງປີທີ່ຜ່ານມາ, ໂດຍສະເພາະ ຜົນສໍາເລັດຂອງການເປັນປະທານອາຊຽນຂອງ ສປປ ລາວ ໃນປີ 2024, ສະພາບການພົ້ນເດັ່ນຂອງພາກພື້ນ ແລະ ສາກົນ, ການເຄື່ອນໄຫວວຽກການຕ່າງປະເທດໃນຂົງເຂດຕ່າງໆ ເປັນຕົ້ນແມ່ນວຽກງານການພົວພັນຄົນເຊື້ອຊາດລາວຢູ່ຕ່າງປະເທດ, ວຽກງານຊາຍແດນ, ວຽກງານກົງສູນ ແລະ ວຽກງານການຄຸ້ມຄອງອົງການຈັດຕັ້ງສາກົນທີ່ບໍ່ສັງກັດລັດຖະບານ ໂດຍມີບັນດາວິທະຍາກອນຈາກກະຊວງການຕ່າງປະເທດ, ກະຊວງອຸດສາຫະກຳ ແລະ ການຄ້າ ແລະ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຂຶ້ນນຳສະເໜີ ແລະ ແລກປ່ຽນບົດຮຽນໃນກອງປະຊຸມ.
ໃນພິທີເປີດກອງປະຊຸມ, ທ່ານ ທອງຜ່ານ ສະຫວັນເພັດ ໄດ້ແຈ້ງໃຫ້ທີ່ປະຊຸມຊາບກ່ຽວກັບການດຳເນີນການເປັນປະທານອາຊຽນຂອງ ສປປ ລາວ ໃນປີ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”, ສະພາບການພົ້ນເດັ່ນທີ່ເກີດຂຶ້ນໃນພາກພື້ນ ແລະ ສາກົນ ແລະ ບັນດາສິ່ງທ້າທາຍຕ່າງໆ ໃນໄລຍະທີ່ ສປປ ລາວ ຮັບໜ້າທີ່ເປັນປະທານອາຊຽນ ໃນປີ 2024 ຈົນເຖິງປັດຈຸບັນ. ພ້ອມນີ້, ທ່ານຮອງລັດຖະມົນຕີ ຍັງໄດ້ຕີລາຄາສູງຕໍ່ຜົນສໍາເລັດໃນການເປັນປະທານອາຊຽນ ຂອງ ສປປ ລາວ, ໂດຍສະເພາະການປະກອບສ່ວນອັນສໍາຄັນຂອງບັນດາອະນຸກໍາມະການຕ່າງໆ ພາຍໃຕ້ຄະນະກຳມະການຊີ້ນຳລະດັບຊາດ ເພື່ອກະກຽມ ແລະ ດຳເນີນການເປັນປະທານອາຊຽນຂອງ ສປປ ລາວ, ລວມທັງບັນດາແຂວງທົ່ວປະເທດ ໂດຍພາຍໃຕ້ການຊີ້ນໍາ-ນໍາພາຢ່າງໃກ້ຊິດຂອງການນຳພັກ-ລັດ ທີ່ໄດ້ກະກຽມຄວາມພ້ອມ ແລະ ຮ່ວມກັນເປັນເຈົ້າພາບທີ່ດີ ໃນຖານະການເປັນປະທານອາຊຽນ ຈົນເຮັດໃຫ້ໄດ້ຮັບຜົນສໍາເລັດຢ່າງຈົບງາມ.
ບັນດາວິທະຍາກອນ ທີ່ຕາງໜ້າຈາກ 3 ເສົາຄໍ້າປະຊາຄົມອາຊຽນ ຄື: ເສົາຄໍ້າປະຊາຄົມການເມືອງ-ຄວາມໝັ້ນຄົງອາຊຽນ, ເສົາຄໍ້າປະຊາຄົມເສດຖະກິດອາຊຽນ ແລະ ເສົາຄໍ້າປະຊາຄົມວັດທະນະທຳ-ສັງຄົມອາຊຽນ ກໍໄດ້ນຳສະເໜີກ່ຽວກັບຜົນສໍາເລັດການດຳເນີນການເປັນປະທານອາຊຽນຂອງ ສປປ ລາວ ປີ 2024 ພາຍໃຕ້ແຕ່ລະເສົາຄໍ້າ, ໝາກຜົນຂອງກອງປະຊຸມສຸດຍອດອາຊຽນ ຄັ້ງທີ 44 ແລະ ຄັ້ງທີ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ. ນອກຈາກນີ້, ວິທະຍາກອນຈາກບັນດາກົມກ່ຽວຂ້ອງຂອງກະຊວງການຕ່າງປະເທດ ໄດ້ນຳສະເໜີກ່ຽວກັບການເຄື່ອນໄຫວວຽກງານການຕ່າງປະເທດພາຍໃຕ້ໜ້າວຽກຮັບຜິດຊອບຂອງຕົນ ເປັນຕົ້ນແມ່ນວຽກງານການພົວພັນຄົນເຊື້ອຊາດລາວຢູ່ຕ່າງປະເທດ, ວຽກງານຊາຍແດນ, ວຽກງານກົງສູນ ແລະ ການຄຸ້ມຄອງອົງການຈັດຕັ້ງສາກົນທີ່ບໍ່ສັງກັດລັດຖະບານ ຊຶ່ງເປັນວຽກທີ່ຕິດພັນກັບການປະສານງານ ລະຫວ່າງສູນກາງ ແລະ ທ້ອງຖິ່ນ. ບັນດາຫົວຂໍ້ດັ່ງກ່າວ ແມ່ນໄດ້ຮັບຄວາມສົນໃຈຈາກບັນດາຜູ້ເຂົ້າຮ່ວມ ຈາກພະແນການຕ່າງໆ ຂອງບັນດາແຂວງພາກກາງ ແລະ ພາກໃຕ້ ແລະ ມີການປະກອບຄໍາຄິດເຫັນຢ່າງມີເນື້ອໃນ ແລະ ກົງໄປກົງມາ ພ້ອມທັງແລກປ່ຽນຂໍ້ສະດວກ, ຂໍ້ຫຍຸ້ງຍາກ ແລະ ບັນດາຂໍ້ສະເໜີໃນການເຄື່ອນໄຫວວຽກງານການຕ່າງປະເທດຂອງຕົນ.
(ຂ່າວ: ກຕທ)
ຄໍາເຫັນ