ເຜີຍແຜ່ການເຊື່ອມໂຍງກົນໄກການຮ່ວມມືທາງດ້ານກົດໝາຍຂອງບັນດາປະເທດແມ່ນໍ້າຂອງ-ແມ່ນໍ້າລ້ານຊ້າງການແກ້ໄຂບັນຫາອາຊະຍາກໍາຂ້າມຊາດ

ທ່ານ ອານຸພາບ ວົງໜໍ່ແກ້ວ ໄດ້ກ່າວເປີດກອງປະຊຸມວ່າ: ເພື່ອສ້າງຄວາມຮັບຮູ້ ແລະ ເຂົ້າໃຈໃຫ້ພະນັກງານ ແລະ ເຈົ້າໜ້າທີ່ທີ່ກ່ຽວຂ້ອງຂອງບັນດາແຂວງພາກກາງກ່ຽວກັບກົນໄກການຮ່ວມມືຂອງບັນດາປະເທດແມ່ນໍ້າຂອງ-ແມ່ນໍ້າລ້ານຊ້າງ, ພາກພື້ນ ແລະ ສາກົນ ທີ່ກ່ຽວຂ້ອງກັບວຽກງານຮ່ວມມືລະຫວ່າງປະເທດທາງອາຍາໃນການແກ້ໄຂບັນຫາອາຊະຍາກຳຂ້າມຊາດທີ່ມີການຈັດຕັ້ງ ໂດຍການແລກປ່ຽນຂໍ້ມູນຂ່າວສານ ແລະ ບົດຮຽນປະສົບການຊຶ່ງກັນ ແລະ ກັນຕາມທີ່ໄດ້ກໍານົດໄວ້ໃນກົດໝາຍພາຍໃນ ແລະ ສົນທິສັນຍາທີ່ກ່ຽວຂ້ອງເປັນຕົ້ນສົນທິສັນຍາ ສປຊ ວ່າດ້ວຍການຕ້ານອາຊະຍາກຳຂ້າມຊາດທີ່ມີການຈັດຕັ້ງ ແລະ ອະນຸສັນຍາເພີ່ມເຕີມ (UNTOC), ສົນທິສັນຍາທີ່ກ່ຽວຂ້ອງກັບການຕ້ານການກໍ່ການຮ້າຍ, ສົນທິສັນຍາວ່າດ້ວຍການຊ່ວຍເຫຼືອຊຶ່ງກັນ ແລະ ກັນທາງດ້ານກົດໝາຍໃນບັນຫາອາຍາ (ASEAN MLAT) ແລະ ສົນທິສັນຍາອື່ນໆທີ່ກ່ຽວຂ້ອງລວມທັງສົນທິສັນຍາສອງຝ່າຍທີ່ ສປປ ລາວ ເປັນພາຄີລວມທັງຮ່ວມກັນປືກສາຫາລືກ່ຽວກັບການເສີມຂະຫຍາຍການປະຕິບັດວຽກງານຮ່ວມມືລະຫວ່າງປະເທດທາງອາຍາຢູ່ສູນກາງ ແລະ ທ້ອງຖິ່ນໃຫ້ສອດຄ່ອງກັບຫຼັກການຂອງກົດໝາຍພາຍໃນ ແລະ ສາກົນ ແນໃສ່ເພີ່ມທະວີວຽກງານການຕ້ານ ແລະ ສະກັດກັ້ນກໍຄືການດຳເນີນຄະດີ ແລະ ການນຳເອົາຜູ້ກໍ່ອາຊະຍາກໍາຂ້າມຊາດທີ່ມີການຈັດຕັ້ງເຂົ້າສູ່ຂະບວນການຍຸຕິທຳຢ່າງມີປະສິດທິພາບ ແລະ ປະສິດທິຜົນສູງຂຶ້ນເທື່ອລະກ້າວ.

ກອງປະຊຸມເຜີຍແຜ່ດັ່ງກ່າວແມ່ນໜຶ່ງໃນແຜນກິດຈະກໍາຂອງໂຄງການພາຍໃຕ້ການສະໜັບສະໜູນຈາກກອງທຶນພິເສດຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໂດຍໃນເດືອນກຸມພາ ແລະ ໃນເດືອນກໍລະກົດ 2025 ທີ່ຜ່ານມາ ກໍໄດ້ສໍາເລັດການຈັດຕັ້ງກອງປະຊຸມເຜີຍແຜ່ໃຫ້ຄູ-ອາຈານ ແລະ ນັກສຶກສາກົດໝາຍຂອງມະຫາວິທະຍາໄລຈໍາປາສັກ ແລະ ສະຖາບັນຍຸຕິທໍາແຫ່ງຊາດ ສາຂາແຂວງຈໍາປາສັກທີ່ນະຄອນປາກເຊ, ແຂວງຈໍາປາສັກ ແລະ ທີ່ນະຄອນຫຼວງພະບາງ, ແຂວງຫຼວງພະບາງຕາມລຳດັບ. ການປະຊຸມເຜີຍແຜ່ໃນຄັ້ງນີ້ດຳເນີນເປັນເວລາ 2 ວັນ (9-10/10/2025) ຈຶ່ງສຳເລັດ.

(ຂ່າວ: ກຕທ)