ໂດຍການ ປະທານຂອງ ທ່ານ ເຄນ ລໍວັນໄຊ ຮອງປະທານອົງການກວດສອບແຫ່ງລັດ, ມີຄະນະພັກ, ຄະນະປົກຄອງ, ຄະນະຮັບຜິດຊອບພະແນກການຕ່າງໆຂອງນະຄອນຫຼວງວຽງຈັນ, ຄະນະກົມ, ຫ້ອງການ, ສະຖາບັນຄົ້ນຄວ້າ ແລະ ຝຶກອົບຮົມຂອງອົງການກວດສອບແຫ່ງລັດ, ຄະນະນໍາ ແລະ ພະນັກງານອົງການກວດສອບປະຈໍາພາກກາງເຂົ້າຮ່ວມ.
ກອງປະຊຸມເຜີຍແຜ່ກົດໝາຍຄັ້ງນີ້ແມ່ນໄດ້ຮັບທຶນຊ່ວຍເຫຼືອສະໜັບສະໜູນຈາກອົງການພັດທະນາ ສາກົນປະເທດສະຫະລັດອາເມຣິກາ (USAID) ໂດຍຜ່ານທະນາຄານພັດທະນາອາຊີ (ADB). ຈຸດປະສົງຄາດໝາຍກອງປະຊຸມເຜີຍແຜ່ກົດໝາຍວ່າດ້ວຍການກວດສອບແຫ່ງລັດຄັ້ງນີ້ແມ່ນແນໃສ່ເພື່ອເຮັດໃຫ້ຄະນະພັກ, ຄະນະປົກຄອງ, ຄະນະຮັບຜິດຊອບ, ບັນດາພະແນກການ ຂອງນະຄອນຫຼວງວຽງຈັນ ແລະ ຜູ້ແທນກອງປະຊຸມ ໄດ້ຮັບຮູ້ເຂົ້າໃຈກໍານົດໄດ້ເນື້ອໃນ, ຂໍ້ກໍານົດຕ່າງໆ ຂອງກົດໝາຍວ່າດ້ວຍການກວດສອບແຫ່ງລັດ ເພື່ອເຮັດໃຫ້ການຈັດຕັ້ງປະຕິບັດກົດໝາຍ, ການຈັດຕັ້ງເຄື່ອນໄຫວວຽກງານກວດສອບແຫ່ງລັດ ໄດ້ຮັບຜົນດີ ເພື່ອເຮັດໃຫ້ວຽກງານກວດສອບແຫ່ງລັດ ໄດ້ປະກອບສ່ວນເຂົ້າໃນການແກ້ໄຂບັນຫາການຄຸ້ມຄອງນໍາໃຊ້ງົບປະມານ, ການເງິນ ແລະ ຊັບສິນຂອງລັດ ໃຫ້ມີປະສິດທິພາບ, ປະສິດທິຜົນ.
ໃນກອງປະຊຸມ, ທ່ານ ໂພສີ ຈັນມິ່ງ ຫົວໜ້າສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ໃຫ້ກຽດຂຶ້ນເຜີຍແຜ່ກົດໝາຍວ່າດ້ວຍການກວດສອບແຫ່ງລັດ (ສະບັບປັບປຸງ) ສະບັບເລກທີ 29/ສພຊ, ລົງວັນທີ 29 ທັນວາ 2022, ຈາກນັ້ນຜູ້ເຂົ້າຮ່ວມໄດ້ພ້ອມກັນຄົ້ນຄວ້າ, ປະກອບຄໍາຄິດຄໍາເຫັນໃສ່ຮ່າງກົດໝາຍດັ່ງກ່າວ, ໃນໂອກາດດັ່ງກ່າວນີ້ ທ່ານ ເຄນ ລໍວັນໄຊ ປະທານກອງປະຊຸມ ໄດ້ໃຫ້ຂໍ້ເຈາະຈີ້ມ ເນັ້ນໃຫ້ຜູ້ແທນກອງປະຊຸມໄດ້ເອົາໃຈໃສ່ຍົກສູງຄວາມຮັບຮູ້, ຮັບຟັງ ການເຜີຍແຜ່ ແນໃສ່ເພື່ອໃຫ້ບັນລຸຜົນສໍາເລັດຕາມຈຸດປະສົງ.
(ຂ່າວ: ອົງການກວດສອບແຫ່ງລັດ)
ຄໍາເຫັນ