ໂດຍມີທ່ານ ນາງ ສີສະຫງ່າ ແກ້ວດວງດີ ວ່າການປະທານກວດກາພັກ ຫົວໜ້າອົງການກວດກາລັດແຂວງ, ທ່ານ ຄໍາແສນ ພະສະແຫວງ ຫົວໜ້າພະແນກພະລັງງານ ແລະ ບໍ່ແຮ່ແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ການເຜີຍແຜ່ໃນຄັ້ງນີ້, ເພື່ອເຮັດໃຫ້ຂະແໜງການ, ອົງການປົກຄອງເມືອງ-ບ້ານ ແລະ ປະຊາຊົນ ທີ່ອາໄສຢູ່ໃນຂອບເຂດຂອງໂຄງການ ມີຄວາມຮັບຮູ້-ເຂົ້າໃຈຢ່າງເລິກເຊິ່ງຈະແຈ້ງ, ທັງເປັນການສ້າງຄວາມເປັນເອກະພາບທາງດ້ານທັດສະນະຕໍ່ເນື້ອໃນສັນຍາ, ຂອດການປະສານງານ, ຂັ້ນຕອນການຈັດຕັ້ງປະຕິບັດ, ຄວາມຮັບຜິດຊອບ ຂອງພາກລັດ ແລະ ບໍລິສັດ ເພື່ອສ້າງຄວາມໂປ່ງໃສ ແລະ ສົ່ງເສີມການມີສ່ວນຮ່ວມຂອງທ້ອງຖິ່ນຢ່າງແທ້ຈິງ, ຮັບປະກັນເຮັດໃຫ້ການດໍາເນີນກິດຈະການຕ່າງໆ ໃນການສໍາຫຼວດສໍາເລັດຕາມແຜນການທີ່ວາງໄວ້.
ທ່ານ ຮຽງ ໄອ່ແກ້ວ ຮອງຫົວໜ້າພະແນກພະລັງງານ ແລະ ບໍ່ແຮ່ແຂວງ ໄດ້ໃຫ້ຮູ້ວ່າ: ໂຄງການສໍາຫຼວດແຮ່ຄໍາ ແລະ ແຮ່ຕິດພັນ ໃນເນື້ອທີ່ 90 ກິໂລຕາແມັດ ຢູ່ເຂດເມືອງດາກຈຶງ ແລະ ໂຄງການສໍາຫຼວດແຮ່ບົກຊິດ ແລະ ແຮ່ຄໍາ ໃນເນື້ອທີ່ 199 ກິໂລຕາແມັດ ຢູ່ເຂດເມືອງດາກຈຶງ, ເມືອງລະມາມ ແຂວງເຊກອງ ແລະ ເມືອງຊານໄຊ ແຂວງອັດຕະປື ຂອງບໍລິສັດ ກຸ່ມດວງຈະເລີນ ພັດທະນາກໍ່ສ້າງ ຈໍາກັດຜູ້ດຽວ ແມ່ນໄດ້ເຊັນສັນຍາ ກັບລັດຖະບານລາວ ໃນວັນທີ 25 ເມສາ 2025. ບໍລິສັດ ກຸ່ມດວງຈະເລີນ ພັດທະນາກໍ່ສ້າງ ຈໍາກັດຜູ້ດຽວ ຈະປະສານສົມທົບກັບຂະແໜງການກ່ຽວຂ້ອງ ດໍາເນີນການສໍາຫຼວດໃນເຂດສໍາປະທານ ໃນໄລຍະເວລາ 3 ປີ ນັບແຕ່ມື້ໄດ້ຮັບອະນຸຍາດເປັນຕົ້ນໄປ ແລະ ມີຄວາມຮັບຜິດຊອບໃນການປະຕິບັດພັນທະຕ່າງໆ ຕາມລະບຽບກົດໝາຍ ເປັນຕົ້ນ ຄ່າສໍາປະທານສໍາຫຼວດ, ພາສີ-ອາກອນເກັບຈາກເຄື່ອງນໍາເຂົ້າ, ອາກອນມູນຄ່າເພີ້ມ, ອາກອນລາຍໄດ້ຈາກພະນັກງານ-ກໍາມະກອນ, ການຄຸ້ມຄອງ ແລະ ການບູລະນະຟື້ນຟູດ້ານສິ່ງແວດລ້ອມ ທີ່ໄດ້ຮັບຜົນກະທົບຈາກການດໍາເນີນການສໍາຫຼວດ. (ຂ່າວ-ພາບ: ສັນຍາ)
ຄໍາເຫັນ