(ສສ ຫວຽດນາມ) ແລະ ພິທີສະເຫຼີມສະຫຼອງບໍລິສັດສະຕາໂທລະຄົມ (Unitel) ຄົບຮອບ 15 ປີ (16 ຕຸລາ 2009–16 ຕຸລາ 2024) ແຫ່ງການດຳເນີນທຸລະກິດດ້ານບໍລິການມືຖືໄດ້ຈັດຂຶ້ນໃນວັນທີ 19 ພະຈິກນີ້ ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ, ໂດຍໃຫ້ກຽດເຂົ້າຮ່ວມຂອງທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ, ທ່ານ ພົນເອກ ຟານ ວັນ ຢາງ ລັດຖະມົນຕີກະຊວງປ້ອງກັນປະເທດ ແຫ່ງສາທາລະນະລັດສັງຄົມນິຍົມຫວຽດນາມ, ມີທ່ານເອກອັກຄະລັດຖະທູດຜູ້ມີອຳນາດເຕັມແຫ່ງສສ ຫວຽດນາມ ປະຈຳລາວ, ບັນດາລັດຖະມົນຕີ ແລະ ແຂກຖືກເຊີນເຂົ້າຮ່ວມ.
ທ່ານ ພົນໂທ ວົງຄຳ ພົມມະກອນ ຮອງລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ ປະທານສະພາບໍລິຫານ ບໍລິສັດສະຕາ ໂທລະຄົມໄດ້ກ່າວວ່າ: ພິທີສະເຫຼີມສະຫຼອງຄົບຮອບ 15 ປີການເປີດນຳໃຊ້ເຄື່ອງໝາຍການຄ້າ Unitel ຫຼື ດຳເນີນທຸລະກິດຢ່າງເປັນທາງການພາຍໃຕ້ການບໍລິຫານໂດຍບໍລິສັດສະຕາ ໂທລະຄົມໃນປີ 2009 ບໍລິສັດ ສະຕາໂທລະຄົມ ໄດ້ສຳເລັດການກໍ່ສ້າງລະບົບເຄືອຂ່າຍໂທລະຄົມ ແລະ ເປີດໃຫ້ບໍລິການຢ່າງເປັນທາງການໃນທົ່ວປະເທດ ພາຍໃຕ້ເຄື່ອງໝາຍການຄ້າ (Unitel)ຊຶ່ງຕະຫຼອດໄລຍະ 15 ປີຜ່ານມາUnitelໄດ້ກາຍເປັນຜູ້ປະກອບການເຄືອຂ່າຍໂທລະຄົມທີ່ໃຫຍ່ກວ່າໝູ່ ຢູ່ ສປປ ລາວ ລວມທັງເລກໝາຍຜູ້ຊົມໃຊ້, ລາຍຮັບ ແລະ ໂຄງລ່າງພື້ນຖານ, ເປັນໜຶ່ງໃນວິສາຫະກິດທີ່ມອບພັນທະໃຫ້ ລັດຖະບານຫຼາຍທີ່ສຸດ, ໄດ້ຮັບການຕີລາຄາສູງຈາກລັດຖະບານ ແລະ ກະຊວງປ້ອງກັນປະເທດຂອງສອງປະເທດ, ເປັນວິສາຫະກິດຕົວແບບທີ່ປະສົບຜົນສໍາເລັດກ່ຽວກັບການຮ່ວມມືດໍາເນີນທຸລະກິດຂອງສອງປະເທດ ລາວ ແລະ ຫວຽດນາມ ສະແດງອອກດັ່ງນີ້: Unitelສາມາດກໍ່ສ້າງລະບົບເຄື່ອຂ່າຍໂທລະຄົມທີ່
ກວ້າງຂວາງ, ລວມມີຫຼາຍກວ່າ 9,000 ສູນສະຖານີຮັບສົ່ງສັນຍານຈໍານວນ 38,000 km ສາຍສົ່ງອັອບຕິກ, ອັດຕາສ່ວນພື້ນທີ່ປົກຄຸມສັນຍານກວມເອົາ 91% ຂອງພື້ນທີ່ທົ່ວປະເທດ ແລະ ໃນນັ້ນກວມເອົາ 83% ຂອງປະຊາກອນໃນທົ່ວປະເທດ ມີສັນຍານ 4G,ກຳລັງເປີດ 5G ເຮັດໃຫ້ປະເທດ ສປປ ລາວ ກາຍເປັນໜຶ່ງໃນປະເທດທີ່ມີລະບົບໂທລະຄົມທີ່ດີທີ່ສຸດ ໃນບັນດາປະເທດຕາເວັນອອກສ່ຽງໃຕ້. ເຖິງແມ່ນວ່າໃນທ້ອງຕະຫຼາດຂອງລາວ ມີຜູ້ປະກອບການທາງດ້ານໂທລະຄົມເຖິງ 5 ເຄືອຂ່າຍ ທີ່ແຂ່ງຂັນກັນ, ແຕ່ Unitelກໍຍັງກາຍເປັນເຄື່ອຂ່າຍທີ່ມີລູກຄ້າຜູ້ຊົມໃຊ້ເຖິງ 3.6 ລ້ານຄົນ, ກວມເອົາ 57% ສ່ວນແບ່ງການຕະຫຼາດ, ຮອດເດືອນ 9/2024 ສາມາດສ້າງລາຍຮັບລວມຍອດສະສົມບັນລຸໄດ້ 2.3 ຕື້ໂດລາ(USD). ມີກໍາໄລລວມຍອດສະສົມ ບັນລຸໄດ້ 876 ລ້ານໂດລາ.ຈາກຜົນສໍາເລັດດັ່ງກ່າວ ຊຶ່ງນັບແຕ່ມື້ເລີ່ມຕົ້ນກໍ່ຕັ້ງບໍລິສັດເຖິງປັດຈຸບັນ Unitelໄດ້ປະກອບສ່ວນມອບພັນທະໃຫ້ລັດຖະບານ 613 ລ້ານໂດລາ. ພ້ອມນັ້ນ, Unitelຍັງໄດ້ປະກອບສ່ວນຊ່ວຍເຫຼືອສັງຄົມ ໃນການສ້າງວຽກເຮັດງານທໍາໃຫ້ປະຊາຊົນລາວ ຫຼາຍກວ່າ 27,000 ຄົນ, ຊ່ວຍລັດຖະບານໃນການຫັນປ່ຽນເປັນດີຈີຕອນ ກໍ່ສ້າງລະບົບໂຄງລ່າງພື້ນຖານລັດຖະບານເອເລັກໂຕຣນິກ ແລະ ໄດ້ມີບັນດາໂຄງການພິເສດໃຫ້ກັບກະຊວງສາທາລະນາສຸກ, ກະຊວງສຶກສາທິການ ແລະ ກິລາ, ປະກອບສ່ວນຊ່ວຍເຫຼືອສັງຄົມ ເປັນຕົ້ນແມ່ນກໍ່ສ້າງເສັ້ນທາງ, ຂົວ, ສ້າງໂຮງໝໍ, ໂຮງຮຽນ, ມອບທຶນການສຶກສາໃຫ້ຜູ້ດ້ອຍໂອກາດ, ຊ່ວຍເຫຼືອປະຊາຊົນທີ່ຖືກກະທົບຈາກໄພທຳມະຊາດ, ນໍ້າຖ້ວມ ແລະ ອື່ນໆ.
ບັນດາຜົນງານທີ່ພົ້ນເດັນທີ່ Unitelຍາດມາໄດ້ນັ້ນເຮັດໃຫ້ Unitetໄດ້ຮັບຫຼຽນໄຊອິດສະຫຼະຊັ້ນ I, ຫຼຽນໄຊພັດທະນາຊັ້ນ I. ຈາກລັດຖະບານລາວ, ໄດ້ຮັບຫຼຽນໄຊແຮງງານຊັ້ນ III ຈາກລັດຖະບານຫວຽດນາມ, ໃບຍ້ອງຈາກລັດຖະບານລາວ, ທຸງແຂ່ງຂັ້ນຈາກກະຊວງປ້ອງກັນປະເທດຫວຽດນາມ ແລະ ບັນດາລາງວັນຍ້ອງຍໍ ລະດັບສາກົນຫຼາຍລາງວັນ.
ໃນໂອກາດນີ້ທ່ານ ພົນເອກ ຈັນສະໝອນ ຈັນຍາລາດໄດ້ໃຫ້ກຽດຂຶ້ນປະດັບຫຼຽນໄຊແຮງງານຊັ້ນ I ຂອງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ພົນເອກ ຟານ ວັນ ຢາງ ໄດ້ຂຶ້ນປະດັບ ຫຼຽນໄຊ ແຮງງານຊັ້ນ II ຂອງສາທາລະນະລັດສັງຄົມນິຍົມຫວຽດດນາມ,ພ້ອມນັ້ນ, ໄດ້ເປີດບໍລິການສັນຍານ 5G ຢ່າງເປັນທາງການ.
(ຂ່າວ-ພາບ: ບຸນອູ້ມ)
ຄໍາເຫັນ