ພິທີປະກາດການແຕ່ງຕັ້ງລັດຖະມົນຕີ ປະຈຳສຳນັກງານນາຍົກລັດຖະມົນຕີ

ໃນຕອນບ່າຍ ວັນທີ 26 ກຸມພານີ້ທີ່ສຳນັກງານນາຍົກລັດຖະມົນຕີ (ສນຍ) ໄດ້ມີພິທີປະກາດການແຕ່ງຕັ້ງລັດຖະມົນຕີປະຈຳສຳນັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ຜູ້ຊີ້ນຳວຽກງານຂົງເຂດການປົກຄອງ ແລະ ວັດທະນະທຳ-ສັງຄົມ; ມີທ່ານ ອາລຸນໄຊ ສູນນະລາດ ລັດຖະມົນຕີ ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ທ່ານ ສອນໄຊ ສິດພະໄຊ ລັດຖະມົນຕີປະຈຳສຳນັກງານນາຍົກລັດຖະມົນຕີ, ບັນດາທ່ານ ຮອງລັດຖະມົນຕີ, ຮອງຫົວໜ້າ ຫສນຍ, ຜູ້ຕາງໜ້າຄະນະຈັດຕັ້ງສູນກາງພັກພ້ອມດ້ວຍພະນັກງານ-ລັດຖະກອນ ພາຍໃນຫ້ອງວ່າການສຳນັກງານນາຍົກລັດຖະມົນຕີ ເຂົ້າຮ່ວມ.
ໃນໂອກາດນີ້, ທ່ານ ດອນ ໄພວົງ ຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຂຶ້ນຜ່ານລັດຖະດຳລັດຂອງປະທານປະເທດ ວ່າດ້ວຍການແຕ່ງຕັ້ງສະມາຊິກລັດຖະບານ ໂດຍແຕ່ງຕັ້ງທ່ານ ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ເປັນລັດຖະມົນຕີປະຈຳສຳນັກງານນາຍົກລັດຖະມົນຕີ. ຫຼັງຈາກນັ້ນ, ທ່ານຮອງນາຍົກລັດຖະມົນຕີ ກໍໄດ້ໃຫ້ກຽດມອບລັດຖະດຳລັດການແຕ່ງຕັ້ງດັ່ງກ່າວ ໃຫ້ແກ່ທ່ານ ສີນາວາ ສຸພານຸວົງ. ພ້ອມທັງ ໃຫ້ກຽດໂອ້ລົມ ແລະ ໃຫ້ທິດຊີ້ນຳ ແກ່ທ່ານລັດຖະມົນຕີປະຈຳສຳນັກງານນາຍົກລັດຖະມົນຕີ ທີ່ໄດ້ຮັບການແຕ່ງຕັ້ງໃນຄັ້ງນີ້ ໂດຍໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນງານໃນການປະຕິບັດໜ້າທີ່ຂອງທ່ານ ສີນາວາ ສຸພານຸວົງ ໃນໄລຍະຜ່ານມາ ຊຶ່ງເປັນພະນັກງານສະມາຊິກພັກປະຕິວັດ, ເປັນລູກຫຼານອະດີດການນຳຂັ້ນສູງສຸດຂອງປະເທດທີ່ຮ່ວມກໍ່ຕັ້ງສປປລາວ, ເປັນພະນັກງານນຳພາຫຼັກແຫຼ່ງທີ່ໄດ້ຜ່ານການຝຶກຝົນຫຼໍ່ຫຼອມ, ໄດ້ຮັບຄວາມເຊື່ອໝັ້ນແລະໄວ້ເນື້ອເຊື່ອໃຈຈາກສະມາຊິກພັກ-ພະນັກງານແລະມະຫາຊົນ, ການທີ່ໄດ້ຮັບການແຕ່ງຕັ້ງເປັນລັດຖະມົນຕີປະຈຳສຳນັກງານນາຍົກລັດຖະມົນຕີແມ່ນເປັນຕຳແໜ່ງທີ່ສຳຄັນຫຼາຍທີ່ຈະໄດ້ຊ່ວຍວຽກງານຂອງລັດຖະບານ ເວົ້າລວມ, ເວົ້າສະເພາະຊ່ວຍທ່ານນາຍົກລັດຖະມົນຕີແລະລົງເລິກຊ່ວຍວຽກທ່ານຮອງນາຍົກລັດຖະມົນຕີທັງຈະໄດ້ນໍາພາ-ຊີ້ນໍາການປະຕິບັດວຽກງານຕົວຈິງຢູ່ບັນດາກະຊວງແລະຕາມການຊີ້ນຳຂອງທ່ານນາຍົກລັດຖະມົນຕີແລະບັນດາທ່ານຮອງນາຍົກລັດຖະມົນຕີ. ນອກນັ້ນ, ຍັງໄດ້ກ່າວວ່າ: ການບູລະນະການຈັດຕັ້ງ, ການແຕ່ງຕັ້ງ, ສັບຊ້ອນພະນັກງານແມ່ນກົດເກນພາວະວິໄສແຫ່ງການຄົງຕົວແລະຂະຫຍາຍຕົວຂອງພັກ-ລັດເຮົາ, ທຸກໆການຈັດຕັ້ງກໍລ້ວນແຕ່ມີການເຄື່ອນເໜັງ, ປັບປຸງໄປຕາມໜ້າທີ່ການເມືອງແຕ່ລະໄລຍະ, ພະນັກງານກໍມີການສັບຊ້ອນໄປຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃຫ້ແທດເໝາະກັບຄຸນສົມບັດ, ລະດັບຄວາມຮູ້-ຄວາມສາມາດແລະປະສົບການຕົວຈິງຂອງແຕ່ລະຄົນ. 
ໃນຕອນທ້າຍ, ທ່ານຮອງນາຍົກລັດຖະມົນຕີ ໄດ້ເນັ້ນໜັກຕໍ່ທ່ານລັດຖະມົນຕີປະຈຳສຳນັກງານນາຍົກລັດຖະມົນຕີ ທີ່ໄດ້ຮັບການແຕ່ງຕັ້ງໃໝ່ໃນຄັ້ງນີ້ ເອົາໃຈໃສ່ໃນຕໍ່ໜ້າຕື່ມບາງດ້ານ ເປັນຕົ້ນ ໃຫ້ຍົກສູງຄວາມຮັບຜິດຊອບທາງດ້ານການເມືອງ ກໍຄືການນຳພາວຽກງານວິຊາສະເພາະຂອງຕົນໃຫ້ສູງຂຶ້ນກວ່າເກົ່າ, ມີຄວາມເສຍສະຫຼະ ເພື່ອສ່ວນລວມ ແລະ ຍາມໃດ ກໍຖືຜົນປະໂຫຍດສ່ວນລວມສູງກວ່າສ່ວນຕົວ; ການນໍາພາ-ຊີ້ນໍາ ໃນການຈັດຕັ້ງປະຕິບັດວຽກງານ ຕ້ອງຮັບປະກັນໃຫ້ຖືກຕ້ອງຕາມແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດຢ່າງເຂັ້ມງວດ; ຈັດຕັ້ງປະຕິບັດວຽກງານຕາມຫຼັກການລວມສູນປະຊາທິປະໄຕ, ຕົກລົງເປັນໝູ່ຄະນະ ບຸກຄົນຮັບຜິດຊອບ; ເອົາໃຈໃສ່ເຕົ້າໂຮມຄວາມສາມັກຄີພາຍໃນໃຫ້ແໜ້ນແຟ້ນ, ເຮັດໃຫ້ບັນຍາກາດໃນການເຮັດວຽກ ເປັນຂະບວນການຢ່າງຕັ້ງໜ້າ; ເອົາໃຈໃສ່ສ້າງຄວາມເປັນແບບຢ່າງນໍາໜ້າທາງດ້ານການດຳລົງຊິວິດ ທີ່ສັດຊື່ບໍລິສຸດ ແລະ ປອດໃສຂາວສະອາດ. ນອກນັ້ນ ຍັງໄດ້ສະເໜີຄະນະປະຈຳພັກ, ຄະນະພັກ-ຄະນະນໍາ ຫ້ອງວ່າການສໍານັກງານນາຍົກລັດຖະມົນຕີ ໃນຖານະເປັນອົງການເສນາທິການລວມ, ເປັນໃຈກາງປະສານງານລວມຂອງລັດຖະບານ ມີກົນໄກສະໜັບສະໜູນ, ອູ້ມຊູຊ່ວຍເຫຼືອ ແລະ ອຳນວຍຄວາມສະດວກ ໃຫ້ທ່ານລັດຖະມົນຕີທີ່ມາຮັບໜ້າທີ່ໃໝ່ ສາມາດເຄື່ອນໄຫວວຽກງານໄດ້ສະດວກວ່ອງໄວ, ມີປະສິດທິພາບ ແລະ ປະສິດທິຜົນ; ສືບຕໍ່ການຕິດຕາມ ແລະ ປະເມີນຜົນໃນການປະຕິບັດໜ້າທີ່ຂອງພະນັກງານຕາມລະບຽບຫຼັກການຂອງພັກຢ່າງພາວະວິໄສ, ແນໃສ່ຍົກສູງຄວາມສາມາດໃນການປະຕິບັດໜ້າທີ່ຂອງພະນັກງານທຸກຂັ້ນ,ເຮັດໃຫ້ການຊັບຊ້ອນ, ຈັດວາງ ແລະ ກໍ່ສ້າງພະນັກງານ ຖືກຕ້ອງກັບໜ້າທີ່ວຽກງານ ແລະ ຖືກເປົ້າໝາຍ.
(ຂ່າວ-ພາບ: ກົມປະຊາສຳພັນ ຫສນຍ)