ພິທີເປີດປີແຫ່ງການໄປມາຫາສູ່ ລະຫວ່າງປະຊາຊົນ ອາຊຽນ ແລະ ຈີນ

ໃນວັນທີ 1-2 ກຸມພາ ຜ່ານມາ, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນ ເຂົ້າຮ່ວມພິທີເປີດປີແຫ່ງການໄປມາຫາສູ່ ລະຫວ່າງ ປະຊາຊົນອາຊຽນ ແລະ ຈີນ ແລະ ບັນດາກິດຈະກໍາປິ່ນອ້ອມ ທີ່ ນະຄອນຝູໂຈວ ແຂວງ ຝູຈ້ຽນ ສປ ຈີນ. ຈຸດປະສົງຂອງການເປີດປີແຫ່ງການໄປມາຫາສູ່ ລະຫວ່າງ ປະຊາຊົນອາຊຽນ ແລະ ຈີນ ແມ່ນເພື່ອສົ່ງເສີມການຮ່ວມມື ໃນຂົງເຂດຕ່າງໆ ເປັນຕົ້ນແມ່ນ ດ້ານວັດທະນະທຳ, ການສຶກສາ, ການທ່ອງທ່ຽວ, ກິລາ ແລະ ສ້າງຄວາມເຂົ້າອົກເຂົ້າໃຈຊຶ່ງກັນ ແລະ ກັນລະຫວ່າງ ປະຊາຊົນອາຊຽນ ແລະ ຈີນ ພ້ອມທັງເປັນການເສີມຂະຫຍາຍການເປັນຄູ່ຮ່ວມຍຸດທະສາດຮອບດ້ານອາຊຽນ-ຈີນ ຊຶ່ງທັງສອງຝ່າຍໄດ້ຕົກລົງສ້າງຕັ້ງຂຶ້ນ ນັບແຕ່ປີ 2021 ເປັນຕົ້ນມາ.
       ພິທີເປີດປີແຫ່ງການໄປມາຫາສູ່ ລະຫວ່າງ ປະຊາຊົນອາຊຽນ ແລະ ຈີນ ໄດ້ຈັດຂຶ້ນໃນຕອນເຊົ້າວັນທີ 2 ກຸມພາ ຜ່ານມານີ້ ຊຶ່ງ ທ່ານ ກິແກ້ວ ໄຂຄໍາພິທູນ ໄດ້ຮັບກຽດຂຶ້ນກ່າວຄໍາເຫັນ ແລະ ອ່ານສານຊົມເຊີຍພິທີເປີດປີແຫ່ງການໄປມາຫາສູ່ ລະຫວ່າງປະຊາຊົນ ອາຊຽນ ແລະ ຈີນ ຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ.  ໃນພິທີດັ່ງກ່າວ ທ່ານ ກິແກ້ວ ໄຂຄໍາພິທູນ ໄດ້ຕີລາຄາສູງ ແລະ ຊົມເຊີຍຕໍ່ການກໍານົດເອົາປີ 2024 ເປັນປີແຫ່ງການແລກປ່ຽນການໄປມາຫາສູ່ຂອງປະຊາຊົນອາຊຽນ ແລະ ຈີນ ເພາະມີຄວາມໝາຍສໍາຄັນໃນການເພີ່ມທະວີຮັດແໜ້ນສາຍພົວພັນຮ່ວມມືອາຊຽນ-ຈີນ ແລະ ເປັນການຈັດຕັ້ງຜັນຂະຫຍາຍຄູ່ຮ່ວມຍຸດທະສາດຮອບດ້ານອາຊຽນ-ຈີນ. ພ້ອມດຽວກັນນີ້, ທ່ານຍັງກ່າວຕື່ມວ່າ: ການຈັດພິທີເປີດ ແລະ ບັນດາກິດຈະກໍາປິ່ນອ້ອມ ເປັນການປະກອບສ່ວນອັນສໍາຄັນເຂົ້າໃນການສົ່ງເສີມການຮ່ວມມືດ້ານວັດທະນະທຳ, ການໄປມາ ຫາສູ່ກັນ ລະຫວ່າງ ປະຊາຊົນອາຊຽນ ແລະ ຈີນ ແລະ ການຮ່ວມມືດ້ານຕ່າງໆ ໃຫ້ຫຼາຍຂຶ້ນກວ່າເກົ່າ ພ້ອມທັງເປັນການຟື້ນຟູເສດຖະກິດ ແລະ ສົ່ງເສີມການທ່ອງທ່ຽວ ພາຍຫຼັງໄດ້ຮັບຜົນກະທົບຈາກການລະບາດຂອງພະຍາດໂຄວິດ-19. ນອກຈາກນີ້, ໃນປີ 2024 ສປປ ລາວ ໄດ້ຮັບກຽດເປັນປະທານອາຊຽນ ພາຍໃຕ້ຄໍາຂວັນ: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ແລະ ສປປ ລາວ ກໍໄດ້ກໍານົດເອົາປີ 2024 ເປັນ “ປີທ່ອງທ່ຽວລາວ” ຊຶ່ງຈະເປັນການປະກອບສ່ວນສົ່ງເສີມການໄປມາຫາສູ່ກັນລະຫວ່າງ ປະຊາຊົນອາຊຽນ ແລະ ຈີນ.
ໃນຕອນບ່າຍຂອງວັນດຽວກັນ, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ຍັງໄດ້ພົບປະກັບ ທ່ານ ນາງ ເສີນ ອີຊິນ ທີ່ປຶກສາແຫ່ງລັດ ປະທານສະຫະພັນແມ່ຍິງທົ່ວປະເທດຈີນ ແລະ ພົບປະກັບ ທ່ານ ໂຈ່ ສູອີ້ ເລຂາພັກແຂວງຝູຈ້ຽນ ສປ ຈີນ ຊຶ່ງການພົບປະກັນໃນຄັ້ງນີ້ ທັງສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ, ການເປັນຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ ຈີນ-ລາວ ລະຫວ່າງ ສອງພັກ ສອງລັດ ແລະ ປະຊາຊົນສອງຊາດ ຊຶ່ງເຫັນໄດ້ຢ່າງຈະແຈ້ງ ການພົວພັນຮ່ວມມືລະຫວ່າງສອງຝ່າຍໄດ້ຮັບການສືບຕໍ່ເສີມຂະຫຍາຍຢ່າງຕໍ່ເນື່ອງ ແລະ ເກີດດອກອອກຜົນຕົວຈິງຫຼາຍດ້ານ ໂດຍສະເພາະແມ່ນການຈັດຕັ້ງປະຕິບັດແຜນແມ່ບົດວ່າດ້ວຍການເປັນຄູ່ຮ່ວມຊາຕາກຳ ລາວ-ຈີນ ສະບັບໃໝ່ ແລະ ບັນດາຄຳເຫັນເປັນເອກະພາບກັນຂອງສອງເລຂາທິການໃຫຍ່, ປະທານປະເທດລາວ ແລະ ຈີນ ລວມທັງການເສີມຂະຫຍາຍການພົວພັນຮ່ວມມືລະຫວ່າງ ແຂວງຝູຈ້ຽນ, ສປ ຈີນ ກັບ ສປປ ລາວ ໂດຍສະເພາະແມ່ນການສົ່ງເສີມການໄປມາຫາສູ່ກັນ, ການຮ່ວມມືດ້ານການທ່ອງທ່ຽວ, ລວມທັງການຮ່ວມມືກັນຂອງສອງຝ່າຍໃນເວທີພາກພື້ນ ແລະ ສາກົນ. ພ້ອມນີ້, ສປ ຈີນ ຈະສືບຕໍ່ໃຫ້ການສະໜັບສະໜູນແກ່ ສປປ ລາວ ໃນຂະແໜງການທີ່ທັງສອງຝ່າຍຕົກລົງເຫັນດີຮ່ວມກັນ. 
(ຂ່າວ: ກະຊວງຕ່າງປະເທດ)