ຜົນສໍາເລັດການແກ້ໄຂຄວາມທຸກຍາກຂອງປະຊາຊົນຢູ່ເມືອງເຊບັ້ງໄຟ

ໂດຍ:ວັນໄຊ ຕະວິນຍານ

ເພື່ອຈັດຕັ້ງຜັນຂະຫຍາຍທິດນໍາຍຸດທະສາດ ທີ່ກອງປະຊຸມໃຫຍ່ຄັ້ງທີIX ຂອງພັກວາງອອກ ແລະ ປະຕິບັດມະຕິ03/ກມສພ ລົງວັນທີ 15/2/2012 ກ່ຽວກັບການສ້າງຄວາມໝັ້ນຄົງ ໃຫ້ແກ່ລັດປະຊາ
ທິປະໄຕປະຊາຊົນ ດ້ວຍການສ້າງແຂວງໃຫ້ເປັນຫົວໜ່ວຍຍຸດທະສາດ,ສ້າງເມືອງໃຫ້ເປັນຫົວໜ່ວຍເຂັມແຂງຮອບດ້ານ,ສ້າງບ້ານເປັນຫົວໜ່ວຍພັດທະນາເຂົ້າສູ່ຕົວຈິງຢ່າງເປັນຮູບປະທໍາ.ປະຕິບັດຕາມດໍາລັດມາດຕະຖານພົ້ນທຸກແລະມາດຕະຖານການພັດທະນາຕາມດຳລັດ 348/ລບແລະບົດແນະນໍາ 0830/ກປ.
ເມືອງເຊບັ້ງໄຟ ແຂວງຄໍາມ່ວນ ມີຄວາມຕັ້ງໜ້າຜັນຂະຫຍາຍມະຕິ,ຄໍາສັ່ງດັງກ່າວເປັນແຕ່ລະບາດກ້າວ.ຕິດພັນກັບແຜນພັດທະນາເສດຖະກິດ-ສັງຄົມເຂົ້າສູ່ຕົວຈິງ ໂດຍນໍາໃຊ້ຂໍ້ມູນຜົນການປະເມີນໄລຍະຕົ້ນ ຕາມເງື່ອນໄຂ, ທ່າແຮງແລະຈຸດພິເສດຂອງຄອບຄົວ, ບ້ານ ແລະ ເມືອງເຮັດໃຫ້ການພັດທະນາຊົນນະບົດແລະແກ້ໄຂຄວາມທຸກຍາກໄດ້ດຳເນີນຈາກຄອບຄົວແລະຮາກຖານບ້ານຂຶ້ນມາ ຕາມມາດຕະຖານທີ່ກຳນົດໄວ້;
   ທ່ານ ທອງໄຊ ມັ່ງໝໍ່ເມກ ເຈົ້າເມືອງເຊບັ້ງໄຟ ແຂວງຄໍາມ່ວນລາຍງານຕໍ່ນັກຂ່າວໜັງສືພິມປະຊາຊົນວ່າ:ປັດຈຸບັນ
ເມືອງເຊບັ້ງໄຟ ມີ 45 ບ້ານ 470 ໜ່ວຍ,ມີ 5.875 ຄອບຄົວ, ມີພົນລະເມືອງ 32.899 ຄົນຍິງ 16.833 ຄົນ;ກຳນົດເອົາ4 ຈຸດສຸມພັດທະນາ,ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດມີຄື: ບ້ານຍາງໃຫຍ່ ແລະຈູດສຸມພັດທະນາຊົນນະບົດໃໝ່ມີ 3ບ້ານຄື: ບ້ານນາຊອຍ,ບ້ານນາພອກແລະບ້ານສ້ອມ.
  ຮູບແບບການປະເມີນຕົວຈິງ ຄະນະຮັບຜິດຊອບ ແລະ ວິຊາການ ໄດ້ຮ່ວມກັບອຳນາດການປົກຄອງບ້ານຕີລາຄາສະພາບຄວາມເປັນຈິງຂອງບ້ານ, ກວດກາຄືນຄວາມຮັບຜິດຊອບຂອງເມືອງບ້ານ ຕາມທິດ 3 ສ້າງ; ໄດ້ນໍາໃຊ້ຂໍ້ມູນມາປຶກສາຫາລື ຄົ້ນຄວ້າຢ່າງກົງໄປກົງມາ ໂດຍເລີ່ມຈາກນາຍບ້ານຊີ້ແຈງການບັນລຸ ແລະ ບໍ່ບັນລຸຂອງແຕ່ລະມາດຕະຖານພົ້ນທຸກ ແລະ ມາດຕະຖານພັດທະນາ ແລະ  ໄດ້ລົງເບິ່ງສະພາບຕົວຈິງຂອງໜ້າວຽກຕາມຄວາມຮັບຜິດຊອບຂອງແຕ່ລະຂະ
ແໜງ ຈໍານວນໜຶ່ງ ເພື່ອວິເຄາະ ແລະ ສັງເກດເບິ່ງວ່າ ມາດຕະຖານທີ່ບັນລຸຈະເສີມຂະຫຍາຍແນວໃດ, ມາດຕະຖານທີ່ບໍ່ບັນລຸຈະມີວິທີແກ້ໄຂແນວໃດ; ພ້ອມທັງປຶກສາຫາລືລະດົມແນວຄວາມຄິດ ກໍານົດກິດຈະກໍາ ແລະ ແຜນກິດຈະກໍາແບບມີສ່ວນຮ່ວມ ແລ້ວຈັດບຸລິມະສິດກິດຈະກໍາທີ່ຈະປະຕິບັດ, ອັນໃດປະຊາຊົນເຮັດເອງ, ບ້ານເຮັດເມືອງເຮັດ ແລະ ເມືອງຮ່ວມກັບປະຊາຊົນເຮັດ.
  ຜ່ານການດຳເນີນການປະເມີນສະພາບພົ້ນທຸກແລະພັດທະນາໃນປີ 2023 ສາມາດປະເມີນໄດ້ບ້ານພັດທະນາ 34 ບ້ານ ເທົ່າກັບ 75,56%,ບ້ານທີ່ບັນລຸຕາມມາດຕະຖານພົ້ນທຸກໄດ້ 35 ບ້ານ ເທົ່າກັບ 77,78 %, ຄອບຄົວທີ່ບັນລຸຕາມມາດຕະຖານພັດທະນາ 3.945 ຄອບຄົວເທົ່າກັບ 67,15%, ຄອບຄົວທີ່ບັນລຸຕາມມາດຕະຖານພົ້ນທຸກມີ 4.160 ຄອບຄົວເທົ່າກັບ 70,81% ແລະຄອບຄົວທີ່ບໍ່ບັນລຸຕາມມາດຕະຖານພົ້ນທຸກມີ 1.715 ຄອບຄົວເທົ່າກັບ 29,19%.
ສໍາລັບການປະເມີນບ້ານໃຫຍ່ເປັນຕົວເມືອງນ້ອຍໃນຊົນນະບົດ ມີ16 ມາດຕະຖານ(F3) ມີ ບ້ານຍາງໃຫຍ່ໃນ 16ມາດຕະຖານບັນລຸ 14 ຕົວຊີ້ບອກ,ເທົ່າກັບ87,5%,ຍັງບໍ່ທັນບັນລຸ2ຕົວຊີ້ບອກ ເທົ່າ 12,50%.ການປະເມີນບ້ານຈຸດສຸມພັດທະນາຊົນນະບົດໃໝ່ມີມີ16 ມາດຕະຖານ(F3) ມີບ້ານສ້ອມ ໃນ 16 ມາດຕະຖານ ບັນລຸ 13 ຕົວຊີ້ບອກ ເທົ່າກັບ81,25%,ຍັງບໍ່ທັນບັນລຸ 3 ຕົວຊີ້ບອກ ເທົ່າ 18,75%ບ້ານນາພອກ ໃນ 16 ມາດຕະຖານ ບັນລຸ 12 ຕົວຊີ້ບອກ ເທົ່າກັບ 75,00%,ຍັງບໍ່ທັນບັນລຸ 4 ຕົວຊີ້ບອກ ເທົ່າ 25,00%,ບ້ານນາຊອຍ ໃນ 16 ມາດຕະຖານ ບັນລຸ 9 ຕົວຊີ້ບອກ ເທົ່າກັບ 56,75%,ຍັງບໍ່ທັນບັນລຸ 7 ຕົວຊີ້ບອກ ເທົ່າ 43,75%, ການປະເມີນມາດຕະຖານເມືອງພົ້ນທຸກ(F4)ມີ 9 ມາດຕະຖານເມືອງເຊບັ້ງໄຟ ບັນລຸ 9 ມາດຕະຖານ ເທົ່າ 100%. ການປະເມີນມາດຕະຖານເມືອງເຂັ້ມແຂງຮອບດ້ານ(F4 ມີ 16 ມາດຕະຖານ 60 ຕົວຊີ້ບອກ ບັນລຸ 49 ຕົວຊີ້ບອກ ເທົ່າກັບ 81,67%; ບໍ່ບັນລຸ 11 ຕົວຊີ້ບອກ ເທົ່າກັບ 18,33%.
ທ່ານ ທອງໄຊ ມັ່ງໝໍ່ເມກກ່າວຕື່ມອີກວ່າ:ຜ່ານການຈັດຕັ້ງປະຕິບັດມະຕິດຄໍາສັ່ງ ແລະ ດໍາລັດ ດັ່ງກ່າວ ໄດ້ເຮັດໃຫ້ຄະນະພັກ, ຄະນະນຳ, ພະນັກງານຫຼັກແຫຼ່ງຂອງເມືອງ ເຂົ້າໃຈກ່ຽວກັບຈຸດປະສົງຄາດໝາຍຕົ້ນຕໍ, ທັດສະນະ ແລະ ທິດນຳຂອງດໍາລັດ 348/ລບ, ບົດແນະນໍາ 0830/ກປ ແລະ ທິດທາງໃນການຈັດຕັ້ງຜັນຂະຫຍາຍທີ່ມີຄວາມເປັນເອກະພາບ ເພື່ອສືບຕໍ່ໄປນຳ ພາຈັດຕັ້ງຜັນຂະຫຍາຍໃຫ້ໄດ້ຜົນດີ. ຄະນະປະສານງານ, ກອງເລຂາຂັ້ນເມືອງ ກໍາໄດ້ບົດຮຽນກ່ຽວກັບວິທີການ, ບາດກ້າວ, ຂັ້ນຕອນ, ຮູບແບບການດໍາເນີນ ແລະ ແບບຟອມ ເພື່ອສືບຕໍ່ຜັນຂະຫຍາຍ ແລະ ປັບປຸງໃຫ້ມີຄວາມສົມບູນ, ສອດຄ່ອງເໝາະສົມ ແລະ ສາມາດຈັດຕັ້ງປະຕິບັດໄດ້ຕໍ່ໄປ.ມີລະບົບຖານຂໍ້ມູນລະດັບຄອບຄົວ ແລະ ຂັ້ນບ້ານ ຈາກການເກັບກໍາຕົວຈິງເພື່ອສະໜອງໃຫ້ແກ່ການປັບປຸງ ແລະ ການວາງແຜນພັດທະນາຂອງບ້ານ,ເມືອງ ແລະ ທັງເປັນຂໍ້ມູນສະໜອງເຂົ້າແຜນພັດທະນາເມືອງເຊບັ້ງໄຟໃນຕໍ່ໜ້າ.ຄ່ຽງຄູ່ກັນນີ້, ທາງເມືອງຍັງພົບບັນຫາຫຍຸ້ງຍາກ ເຊັ່ນ: ບາງບ້ານສັນຍານໂທລະຊັບ ແລະ ອິນເຕີເນັດບໍ່ສະດວກ,ຄວາມຮັບຜິດຊອບຕໍ່ໜ້າທີ່ໄດ້ຮັບມອບໝາຍພະນັກງານວິຊາການຈຳນວນໜຶ່ງຍັງບໍ່ທັນເອົາໃຈໃສ່ເທົ່າທີ່ຄວນ,ການພົວພັນປະສານງານລະຫວ່າງການຈັດຕັ້ງກັບປະຊາຊົນແມ່ນຍັງບໍ່ທັນສອດຄ່ອງລະອຽດຈະແຈ້ງ ສະແດງອອກໃນເວລາລົງເຮັດວຽກຕົວຈິງການເຂົ້າຮ່ວມຂອງປະຊາຊົນຍັງບໍ່ທັນໃດ້ດີເທົ່າທີ່ຄວນ.