ປີຜ່ານມາ ເສດຖະກິດສິງກະໂປຂະຫຍາຍຕົວໜ້ອຍກວ່າເປົ້າໝາຍ

ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ກະຊວງການຄ້າຂອງສິງກະໂປໄດ້ອອກຖະແຫຼງການໂດຍລະບຸວ່າ: ເສດຖະກິດຂອງປະເທດຂະຫຍາຍຕົວ 1,1% ໃນປີຜ່ານມາ ເຖິງແມ່ນວ່າເປັນປີທີ 3 ຕິດຕໍ່ກັນ ຊຶ່ງເສດຖະກິດຂອງສິງກະໂປຂະຫຍາຍຕົວນັບຕັ້ງແຕ່ປະເຊີນກັບພາວະຖົດຖອຍຈາກການແຜ່ລະບາດຂອງພະຍາດໂຄວິດ-19 ໃນປີ 2020 ແຕ່ຍັງຄົງຕ່ຳກວ່າເປົ້າໝາຍຂອງລັດຖະບານ ກຳນົດໄວ້1,2%.
    ຂະນະດຽວກັນ, ອັດຕາການຂະຫຍາຍຕົວທາງດ້ານເສດຖະກິດຂອງສິງກະໂປໃນປີຜ່ານມາຍັງຕ່ຳກວ່າສະຖິຕິຂອງປີ 2022 ຊຶ່ງຢູ່ທີ່ 3,8% ແລະ ສະຖິຕິຂອງປີ 2021 ສູງເຖິງ 8,9%. ສຳລັບທ່າອ່ຽງການຂະຫຍາຍຕົວທາງດ້ານເສດຖະກິດຂອງປະເທດໃນປີນີ້ ລັດຖະບານສິງກະໂປກຳນົດເປົ້າໝາຍໄວ້ລະຫວ່າງ 1%-3% ໂດຍເຊື່ອວ່າ ຄວາມຕ້ອງການຈາກພາຍນອກຍັງຄົງບໍ່ປ່ຽນແປງ ເຖິງຢ່າງໃດກໍຕາມ, ຄວາມສ່ຽງຂາລົງທາງດ້ານເສດຖະກິດຍັງຄົງເປັນສິ່ງທີ່ຕ້ອງສັງເກດການຢ່າງໃກ້ຊິດຕໍ່ໄປ ໂດຍສະເພາະສະຖານະການໂລກໃນປັດຈຸບັນທີ່ຍັງຄົງແກ່ຍາວ ຊຶ່ງຈະສົ່ງຜົນຕໍ່ຕ່ອງໂສ້ການສະໜອງ.