ປີຜ່ານມາກຳປູເຈຍ ຄືຈຸດໝາຍດ້ານວັດທະນະທຳຂັ້ນນຳຂອງອາຊີ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ທ່ານ ຊົກ ສຸເກນ ລັດຖະມົນຕີກະຊວງການທ່ອງທ່ຽວຂອງກຳປູເຈຍກ່າວວ່າ: ກຳປູເຈຍໄດ້ຮັບເລືອກໃຫ້ເປັນຈຸດໝາຍດ້ານວັດທະນະທຳຂັ້ນນຳຂອງອາຊີອີກຄັ້ງຈາກ World Travel Awards ປີ 2023 ຊຶ່ງຄວາມສຳເລັດທີ່ໂດດເດັ່ນຄັ້ງນີ້ຢືນຢັນວ່າ ຈຸດໝາຍຂອງກຳປູເຈຍເປັນສະຖານທີ່ໆຕ້ອງມາຢ້ຽມຢາມສຳລັບກຸ່ມຜູ້ມັກວັດທະນະທຳ.
    ທ່ານ ທົບ ໂສພຽກ ໂຄສົກ ແລະ ຮອງກະຊວງການທ່ອງທ່ຽວຂອງກຳປູເຈຍກ່າວວ່າ: ກຳປູເຈຍເປັນຈຸດໝາຍການທ່ອງທ່ຽວໃນຮູບແບບວັດທະນະທຳ ແລະ ຮູບແບບນິເວດວິທະຍາທີ່ມີຊື່ສຽງໃນດ້ານອຸທິຍານບູຮານຄະດີອັງກໍ ຫຼື ອັງກໍວັດ ຊຶ່ງເປັນມໍລະດົກໂລກທີ່ຕັ້ງຢູ່ໃນແຂວງສຽມຣຽບ ແລະ ອ່າວສວຍງາມໃນເມືອງສີໜຸວິນ. ນອກຈາກນັ້ນ, ກຳປູເຈຍຍັງມີມໍລະດົກໂລກອີກ 3 ແຫ່ງໄດ້ແກ່ ກຸ່ມຜາສາດສົມບູນໄພຄຸກໃນແຂວງກຳປົງຖົມລວມທັງຜາສາດພະວິຫານ ແລະ ບູຮານສະຖານເກາະແກໃນແຂວງພະວິຫານ.
    ກະຊວງການທ່ອງທ່ຽວຂອງກຳປູເຈຍເປີດເຜີຍວ່າ: ການທ່ອງທ່ຽວເປັນໜຶ່ງໃນ 4 ພາກສ່ວນສຳຄັນທີ່ສະໜັບສະໜູນເສດຖະກິດຂອງກຳປູເຈຍ ແລະ ສ້າງວຽກເຮັດງານທຳໂດຍກົງໃຫ້ແກ່ຜູ້ຄົນໃນປະເທດປະມານ 450.000 ຕຳແໜ່ງງານ ໂດຍກຳປູເຈຍລາຍງານຈຳນວນນັກທ່ອງທ່ຽວຕ່າງປະເທດໃນປີ 2023 ປະມານ 5,45 ລ້ານຄົນ ສາມາດສ້າງລາຍໄດ້ລວມ 3,08 ພັນລ້ານໂດລາ ຄິດເປັນ 7,5% ຂອງໂຕເລກລວມຍອດຜະລິດຕະພັນພາຍໃນປະເທດ (GDP).