 |
ທ່ານ ນາງ ອາລີ ວົງໜໍ່ບຸນທໍາ ໄດ້ກ່າວໃນພິທີປິດຄັ້ງນີ້ວ່າ: ຕາງໜ້າ ຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ) ເຂົ້າຮ່ວມກອງປະຊຸມປິດໂຄງການເພີ່ມໂອກາດການເປັນຜູ້ປະກອບການ ແລະ ການຈ້າງງານ ສໍາລັບໄວໜຸ່ມ ແລະ ແມ່ຍິງ ແຂວງອຸດົມໄຊ ແລະ ແຂວງຄໍາມ່ວນໃນມື້ນີ້. ພັກ ແລະ ລັດຖະບານຍາມໃດກໍເອົາໃຈໃສ່ ແລະ ເຫັນຄວາມສໍາຄັນໃນການສົ່ງເສີມແມ່ຍິງໃຫ້ມີຄວາມກ້າວໜ້າ, ມີບົດບາດເທົ່າທຽມກັບເພດຊາຍ ໂດຍສະເພາະໄດ້ສ້າງເງື່ອນໄຂໃນການສົ່ງເສີມໃຫ້ແມ່ຍິງໄດ້ຮັບການພັດທະນາ, ເສີມສ້າງຄວາມຮູ້-ຄວາມສາມາດໃນທຸກດ້ານອັນໄດ້ໃຫ້ແມ່ຍິງມີບົດບາດໃນຫຼາຍວຽກງານສູງຂຶ້ນກວ່າເກົ່າ; ໃນການສ້າງຄວາມເຂັ້ມແຂງດ້ານເສດຖະກິດ ກໍເປັນວຽກໜຶ່ງທີ່ສຳຄັນເຮັດໃຫ້ແມ່ຍິງມີອຳນາດ ແລະ ມີສ່ວນຮ່ວມໃນການຕັດສິນບັນຫາຄ່ຽງຄູ່ກັບເພດຊາຍ ແລະ ເຮັດໃຫ້ແມ່ຍິງມີບົດບາດສູງຂຶ້ນໃນສັງຄົມ; ໂດຍເຫັນໄດ້ຄວາມສໍາຄັນດັ່ງກ່າວຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກຮ່ວມກັບອົງການແອັກເຊິນເອດູເຄເຊິນລາວ ຈຶ່ງໄດ້ຮ່ວມກັນສ້າງ ແລະ ຈັດຕັ້ງປະຕິບັດໂຄງການເພີ່ມໂອກາດການເປັນຜູ້ປະກອບການ ແລະ ການຈ້າງງານ ສຳລັບໄວໜຸ່ມ ແລະ ແມ່ຍິງ ແຂວງອຸດົມໄຊ ແລະ ແຂວງຄຳມ່ວນ. ໂຄງການນີ້ແມ່ນສ່ວນໜຶ່ງຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ໂດຍສະເພາະແມ່ນການລຶບລ້າງຄວາມທຸກຍາກ ໃຫ້ປະຊາຊົນລາວບັນດາເຜົ່າ ໂດຍສະເພາະແມ່ນແມ່ຍິງ ແລະ ເດັກ ທີ່ເປັນກຳລັງແຮງສຳຄັນໃນຄອບຄົວ, ໂດຍເນັ້ນໃສ່່ການສ້າງອາຊີບທີ່ໝັ້ນຄົງໃຫ້ແກ່ແມ່ຍິງ ແລະ ໄວໜຸ່ມມີທາງເລືອກອາຊີບຕາມສິດທິຂອງເຂົາເຈົ້າໃນອະນາຄົດເຮັດໃຫ້ເຂົາເຈົ້າສາມາດກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ; ໃນການສົ່ງເສີມໃຫ້ແມ່ຍິງມີລາຍຮັບ ແລະ ມີວຽກເຮັດງານທຳ ບໍ່ພຽງແຕ່ຊ່ວຍຍົກລະດັບຊີວິດການເປັນຢູ່ເທົ່ານັ້ນ, ແຕ່ຍັງເປັນການຍົກສູງບົດບາດຂອງແມ່ຍິງໃນສັງຄົມໃຫ້ເທົ່າທຽມກັບເພດຊາຍ; ເປົ້າໝາຍອີກອັນໜຶ່ງ ຂອງການຈັດຕັ້ງປະຕິບັດໂຄງການນີ້ ແມ່ນໄດ້ສ້າງພື້ນຖານໃຫ້ເອື້ອຍນ້ອງມີ ວິຊາຊີບ ແລະ ການດຳເນີນທຸລະກິດ ເພື່ອປ່ຽນຈາກການຜະລິດແບບກຸ້ມຕົນເອງ ໄປສູ່ການຜະລິດເປັນສິນຄ້າຕາມທິດທາງເສດຖະກິດຕະຫຼາດ ຂອງລັດຖະບານ.
ໂຄງການຂອງພວກເຮົາແມ່ນໄດ້ເລີ່ມຈັດຕັ້ງປະຕິບັດມາແຕ່ປີ 2022 ມີ 2 ແຂວງ, 7 ເມືອງ ແລະ 5 ໂຮງຮຽນ ເປົ້າໝາຍ ຊຶ່ງຜ່ານການຈັດຕັ້ງປະຕິບັດມາ 3 ປີຂ້າພະເຈົ້າຕີລາຄາສູງຕໍ່ໂຄງການດັ່ງກ່າວ ໂດຍເຫັນໄດ້ຜົນສໍາເລັດທີ່ເປັນຮູບປະທໍາ ໃນການຊ່ວຍເຫຼືອໃຫ້ແມ່ຍິງກຸ່ມເປົ້າໝາຍ ມີໂອກາດເຂົ້າຮ່ວມການພັດທະນາທັກສະການດໍາເນີນທຸລະກິດ ແລະ ມີລາຍຮັບທີ່ເພີ່ມຂຶ້ນ, ພ້ອມດຽວກັນນັ້ນ ໄວໜຸ່ມຈໍານວນບໍ່ໜ້ອຍໃນສອງແຂວງ (ມີແມ່ຍິງ 731 ຄົນໄດ້ຮັບຜົນປະໂຫຍດ ຈາກໂຄງການ, ມີ 136 ທຸລະກິດທີ່ເກີດຈາກການສະໜັບສະໜູນຂອງໂຄງການ, ມີຕົວແບບທຸລະກິດ 12 ຕົວແບບ) ກໍໄດ້ຮັບການພັດທະນາທາງດ້ານທັກສະ ແລະ ປະສົບການໃນການສ້າງເສດຖະກິດ ເພື່ອເປັນພື້ນຖານໃຫ້ພວກເຂົາໃນການປະກອບອາຊີບໃນອະນາຄົດ, ຈາກຜົນງານທີ່ກ່າວມານັ້ນ ເຫັນໄດ້ວ່າໂຄງການດັ່ງກ່າວມີຜົນສໍາເລັດຫຼາຍດ້ານ ແລະ ສາມາດບັນລຸໄດ້ຕາມຈຸດປະສົງຂອງໂຄງການສູງພໍສົມຄວນ, ແຕ່ເຖິງຢ່າງໃດກໍຕາມ ພວກເຮົາກໍຍັງເຫັນວ່າຍັງມີອີກຫຼາຍເຂດພື້ນທີ່ຂອງ ສປປ ລາວ ທີ່ຍັງເປັນເຂດທຸກຍາກ ແລະ ບໍ່ມີເສັ້ນທາງເຂົ້າເຖິງ ອັນເປັນສາເຫດທີ່ແມ່ຍິງ ແລະ ໄວໜຸ່ມຍັງບໍ່ທັນສາມາດ ມີສ່ວນຮ່ວມໃນການພັດທະນາຢ່າງເຕັມສ່ວນ ແລະ ພວກເຂົາຍັງຕ້ອງການການສະໜັບສະໜູນໃນລັກສະນະນີ້ເຊັ່ນດຽວກັນ ຊຶ່ງມັນບໍ່ພຽງແຕ່ເປັນການສ້າງວຽກເຮັດງານທຳ ແລະ ອາຊີບໃຫ້ພວກເຂົາ ແຕ່ມັນແມ່ນການນຳໃຊ້ທ່າແຮງບົ່ມຊ້ອນ ດ້ານພອນສະຫວັນ ແລະ ການນຳໃຊ້ຊັບພະຍາກອນທ້ອງຖິ່ນໃຫ້ເກີດຜົນປະໂຫຍດສູງສຸດ, ເປັນການສ້າງອາຊີບທີ່ຄົງທີ່, ຫຼຸດຜ່ອນການເຄື່ອນຍ້າຍແຮງງານທີ່ອາດຈະຖືກຕົກເປັນເຫຍື່ອຂອງການຖືກຄວາມຮຸນແຮງ ແລະ ຄ້າມະນຸດ ຂອງກຸ່ມຄົນບໍ່ຫວັງດີ. ສຸດທ້າຍ ທ່ານໄດ້ກ່າວຂອບໃຈມາຍັງ ຄຊກມດ, ອົງການແອັກເຊິນເອດູເຄເຊິນ ປະຈຳ ສປປ ລາວ ແລະ ສສ ຫວຽດນາມ ລວມທັງຄະນະກໍາມະການຄຸ້ມຄອງໂຄງການຂັ້ນແຂວງ ແລະ ຂັ້ນເມືອງ ແລະ ຜູ້ໄດ້ຮັບຜົນປະໂຫຍດຈາກໂຄງການທັງໝົດ, ພິເສດ ແມ່ນພວກເຮົາໄດ້ຮັບຮູ້ບົດຮຽນອັນລ້ຳຄ່າ ຈາກເພື່ອນຮ່ວມຍຸດທະສາດ ຈາກ ສສ ຫວຽດນາມ ໃນການຈັດຕັ້ງປະຕິບັດໂຄງການໃນປະເທດຂອງພວກເຂົາ ພວກເຮົາຍັງຈະຂໍການຮ່ວມມືທັງທາງດ້ານວິຊາການ ແລະ ການແນະນຳທີ່ເປັນປະໂຫຍດຈາກບັນດາທ່ານ ເພື່ອເຮັດໃຫ້ສາຍພົວພັນລະຫວ່າງສອງປະເທດ ຮັດແໜ້ນຂຶ້ນ ແລະ ມີຄວາມກ້າວໜ້າທຸກວຽກງານ ໂດຍສະເພາະການສົ່ງເສີມວິຊາຊີບ ແລະ ການຈ້າງງານໃຫ້ໄວໜຸ່ມ ແລະ ແມ່ຍິງ.
ຂ່າວ: ຄຊກມດ
ຄໍາເຫັນ