ປກສ ເມືອງພຽງສະຫຼຸບການຈັດຕັ້ງປະຕິບັດວຽກງານປ້ອງກັນຄວາມສະຫງົບ

ກອງບັນຊາການ ປກສ ເມືອງພຽງ ແຂວງໄຊຍະບູລີ ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານປ້ອງກັນຄວາມສະຫງົບປະຈຳປີ 2023 ແລະ ທິດທາງແຜນການວຽກງານຈຸດສຸມປີ 2024 ຂຶ້ນເມື່ອບໍ່ດົນຜ່ານມາ ທີ່ຫ້ອງປະຊຸມກອງບັນຊາການດັ່ງກ່າວ ພາຍໃຕ້ການເປັນປະທານຂອງທ່ານ ເສີດ ແສງສຸລິນ ກຳມະການພັກແຂວງ ເລຂາພັກເມືອງ ເຈົ້າເມືອງໆພຽງ, ມີບັນດາຄະນະພັກ, ຄະນະບັນຊາ, ແຂກຖືກເຊີນ, ນາຍ ແລະ ພົນຕຳຫຼວດເຂົ້າຮ່ວມ.
 ກອງປະຊຸມໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານປະຈໍາປີ 2023 ແລະ ວາງທິດທາງແຜນການປະຈຳປີ 2024 ໂດຍໄດ້ຍົກໃຫ້ເຫັນຜົນງານດ້ານດີທີຕັ້ງໜ້າ, ບົດຮຽນທີ່ຖອດຖອນໄດ້ ແລະ ຈຸດອ່ອນ, ຂໍ້ຄົງຄ້າງທີ່ຈະຕ້ອງແກ້ໄຂໃນຕໍ່ໜ້າຊຶ່ງໃນໄລຍະໜຶ່ງປີຜ່ານມາຄະນະພັກຄະນະບັນຊາກອງບັນຊາການ ປກສ ເມືອງໄດ້ເອົາໃຈໃສ່ສືກສາອົບຮົ່ມການເມືອງແນວຄິດໃຫ້ນາຍ ແລະ ພົນຕຳຫຼວດໃຫ້ມີຄວາມໜັກແໜ້ນເຂັ້ມແຂງເຊື່ອໝັ້ນຕໍ່ການນຳພາຂອງພັກ, ມີສະຕິລະວັງຕົວຕໍ່ກົນອຸບາຍມ້າງເພຂອງກຸ່ມຄົນບໍ່ດີ ພ້ອມທັງປະຕິບັດວຽກງານວິຊາສະເພາະໄດ້ເປັນຢ່າງດີ ອັນໄດ້ເຮັດໃຫ້ເມືອງພຽງມີສະຖຽນລະພາບທາງດ້ານການເມືອງສັງຄົມມີຄວາມສະຫງົບ ປອດໄພໂດຍພື້ນຖານ ແລະ ສາມາດແກ້ໄຂຄະດີທີ່ເກີດຂຶ້ນພາຍໃນເມືອງໄດ້ທັງໝົດ 60 ກວ່າເລື່ອງທຽບໃສ່ປີຜ່ານມາຫຼຸດລົງ 8 ເລື່ອງ. ໃນນີ້, ຄະດີຢາເສບຕິດ 50 ກວ່າເລື່ອງ, ລັກຊັບພົນລະເມືອງ 2 ເລື່ອງ, ທຳມິດສະຈານ 2 ເລື່ອງ ແລະ ເຮັດໃຫ້ຜູ້ອື່ນເສຍຊີວິດ 1 ເລື່ອງ. ການຈັດຕັ້ງປະຕິບັດວາລະແຫ່ງຊາດມາຮອດປັດຈຸບັນແມ່ນສຳເລັດແລ້ວ 4 ບ້ານ ແລະ ທິດທາງແຜນການໃນຕໍ່ໜ້າແມ່ນຮັບປະກັນໃຫ້ເມືອງພຽງມີສະຖຽນລະພາບທາງດ້ານການເມືອງ ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍໂດຍພື້ນຖານສືບຕໍ່ຈັດຕັ້ງປະຕິບັດວາລະແຫ່ງຊາດຂອງການແກ້ໄຂບັນຫາຢາເສບຕິດກໍຄືປະກົດການຫຍໍ້ທໍ້ຕ່າງໆໃຫ້ຫຼຸດໜ້ອຍຖອຍລົງເທື່ອລະກ້າວ. ໃນໂອ້ກາດນີ້ຜູ້ເຂົ້າຮ່ວມກອງປະຊຸມໄດ້ຜັດປ່ຽນກັນ ປະກອບຄຳຄິດຄຳເຫັນເພຶ່ອຊອກຫາວິທີແກ້ໄຂບາງດ້ານທີ່ຍັງຄົງຄ້າງ. 
(ພາບ-ຂ່າວ: ວົງສະຫວັນ ສຸທິໂວຫານ)