ສ ເກົາຫຼີ ນຳໜ້າໃນການນຳໃຊ້ລະບົບສາທາລະນະ

ສຳນັກຂ່າວສານຫວຽດນາມ ປະຈຳ ນະຄອນຫຼວງເຊອູນ ໃຫ້ຮູ້ວ່າ: ສ ເກົາຫຼີ ພວມນຳໜ້າໃນໂລກກ່ຽວກັບອັດຕາການນຳໃຊ້ຄົມມະນາຄົມສາທາລະນະ.
ຂ່າວລາຍງານວ່າ, ຕາມຜົນການສໍາຫຼວດຂອງ Statista  ຊຶ່ງເປັນແພັລຟອມອອນລາຍຂອງ ເຢຍລະມັນ ທີ່ມີຄວາມຊ່ຽວຊານໃນການເກັບກໍາຂໍ້ມູນສະຖິຕິ ແລະ ການສະແດງຂໍ້ມູນ  ໄດ້ໃຫ້ຮູ້ວ່າ: ໃນປີ 2023,ປະຊາຊົນ ສ ເກົາຫຼີ 41%ນໍາໃຊ້ການຂົນສົ່ງສາທາລະນະໃນການເດີນທາງປະຈໍາວັນ. ໂດຍການເປີດນໍາໃຊ້ບັດ Climate Card, ເຮັດໃຫ້ປະຊາຊົນ ນໍາໃຊ້ການຂົນສົ່ງສາທາລະນະນັບມື້ນັບເພີ່ມຂຶ້ນເລື້ອຍໆ, ໂດຍສະເພາະແມ່ນລົດໄຟໃຕ້ດິນ ຊຶ່ງມີເວລາທີ່ແນ່ນອນຖືກຕ້ອງໃນການເດີນທາງໄປກັບໄດ້ຢ່າງດວກສະບາຍ.
ບັດ Climate Card ເປີດນໍາໃຊ້ໂດຍນະຄອນຫຼວງເຊອູນ ໃນຕົ້ນປີນີ້, ໂດຍອະນຸຍາດໃຫ້ປະຊາຊົນໃຊ້ລົດໄຟໃຕ້ດິນ, ລົດເມ ແລະ ລົດຖີບສາທາລະນະ ໃນນະຄອນຫຼວງເຊອູນ ຢ່າງເສລີເປັນເວລາ 1 ເດືອນດ້ວຍຄ່າໃຊ້ຈ່າຍ 65.000 ວອນ (49 ໂດລາ).
ນັບຕັ້ງແຕ່ການເປີດນຳໃຊ້ບັດ Climate Card ໃນວັນທີ 27 ມັງກອນ ຜ່ານມາ, ໄດ້ຈຳໜ່າຍບັດຫຼາຍກວ່າ 460.000 ບັດ. ການນໍາໃຊ້ລະບົບການຂົນສົ່ງສາທາລະນະນີ້, ປະຊາຊົນຈະໄດ້ຮັບຜົນປະໂຫຍດຈາກການຫຼຸດຜ່ອນຄ່າໃຊ້ຈ່າຍໃນການເດີນທາງ, ພ້ອມກັນນັ້ນຍັງຊ່ວຍຫຼຸດຜ່ອນການປ່ອຍອາຍພິດເຮືອນແກ້ວ.