ສະຫາຍ ທອງລຸນ ສີສຸລິດ ເລຂາທິການໃຫຍ່ ພ້ອມດ້ວຍຄະນະ ເດີນທາງ ເຖິງ ສສ ຫວຽດນາມ

ເພື່ອເຂົ້າຮ່ວມກອງປະຊຸມພົບປະສອງກົມການເມືອງ ລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດ ຫວຽດນາມ, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງ ສປປ ລາວ ພ້ອມດ້ວຍບັນດາສະຫາຍກົມການເມືອງສູນກາງພັກ ແລະ ຄະນະຕິດຕາມ ໄດ້ເດີທາງເຖິງນະຄອນຫຼວງຮ່າໂນ້ຍ ສສ ຫວຽດນາມ ໃນຕອນເຊົ້າວັນທີ 26 ກຸມພານີ້.
ຕ້ອນຮັບທີ່ສະໜາມບິນສາກົນໂນ້ຍບ່າຍ ໄດ້ມີຂຶ້ນຢ່າງອົບອຸ່ນ ດ້ວຍບັນຍາກາດທີ່ເຕັມໄປດ້ວຍໄມຕີຈິດມິດຕະພາບອັນຍິ່ງໃຫຍ່, ສາຍພົວພັນພິເສດ ແລະ ການຮ່ວມມືຮອບດ້ານລະຫວ່າງ ສອງຊາດ ລາວ - ຫວຽດນາມ ໂດຍການຕ້ອນຮັບຂອງ ສະຫາຍ ເລ ຮ່ວຍ ຈຸງ ເລຂາທິການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ພ້ອມດ້ວຍຄະນະ.
ການເດີນທາງເຂົ້າຮ່ວມກອງປະຊຸມຄັ້ງນີ້ ແມ່ນມີຄວາມໝາຍຄວາມສຳຄັນທີ່ສຸດລະຫວ່າງພັກປະຊາຊົນປະຕິວັດລາວ ແລະ ພັກກອມມູນນິດຫວຽດນາມ ຊຶ່ງຈະເປັນການສືບຕໍ່ເສີມຂະຫຍາຍ ແລະ ເພີ່ມທະວີສາຍພົວພັນໃຫ້ຮັດແໜ້ນ, ໝັ້ນຄົງຂະໜົງແກ່ນ ແລະ ແຕກດອກອອກຜົນດ້ວຍຜົນສຳເລັດອັນສົດໃສສວຍງາມຍິ່ງຂຶ້ນ.
(ຂ່າວ-ພາບ: ສຸກສະຫວັນ)