ໂຄງການດັ່ງກ່າວຈຸດປະສົງ ເພື່ອພັດທະນາການຜະລິດກະສິກຳເປັນສິນຄ້າ, ສຶກສາຄວາມເໝາະສົມໃນການນຳໃຊ້ເນື້ອທີ່ດິນ ເພື່ອປູກພືດເສດຖະກິດທີ່ມີມູນຄ່າສູງ ເປັນຕົ້ນ: ກາເຟ, ໝາກຄ້ຽວ, ໝາກມ່ວງຫິມະພານ ແລະ ໝາກໄມ້ອື່ນໆ ໂດຍເບື້ອງຕົ້ນເນັ້ນໃສ່ການຜະລິດ ເພື່ອສະໜອງ, ຈຳໜ່າຍພາຍໃນປະເທດ ແລະ ກ້າວໄປສູ່ການຍົກລະດັບ ເພື່ອສົ່ງອອກໄປຕ່າງປະເທດ; ໂຄງການດັ່ງກ່າວຈະສ້າງເງື່ອນໄຂໃຫ້ປະຊາຊົນໃນເຂດທ້ອງຖິ່ນ ມີວຽກເຮັດງານທຳ, ຖ້າຜົນການສຶກສາສຳຫຼວດຜ່ານ ແລະ ໄດ້ຮັບການຈັດຕັ້ງປະຕິບັດ ຈະເປັນເງື່ອນໄຂສ້າງລາຍໄດ້ຈາກການເປັນແຮງງານ ຫຼື ການຮ່ວມມືປູກ, ຊ່ວຍຫຼຸດຜ່ອນການຍົກຍ້າຍແຮງງານ ໄປບ່ອນອື່ນ ເຊິ່ງເລີ່ມລົງມືສໍາຫຼວດນັບແຕ່ມື້ລົງລາຍເຊັນບົດບັນທຶກເປັນຕົ້ນໄປ ກໍານົດໄລຍະເວລາ 6 ເດືອນ.
ພິທີເຊັນບົດບັນທຶກຄວາມເຂົ້າໃຈ ໄດ້ຈັດຂື້ນໃນວັນທີ 19 ພຶດສະພາ 2026 ນີ້, ທີ່ ແຂວງສາລະວັນ ລະຫວ່າງ ອົງການປົກຄອງແຂວງສາລະວັນ ຕາງໜ້າເຊັນໂດຍ ທ່ານ ນາງ ວິໄລພອນ ດ້ວງປັນຍາ ຮອງຫ້ອງການຄະນະກຳມະການສົ່ງເສີມ ແລະ ຄຸ້ມຄອງການລົງທຶນແຂວງ, ທ່ານ ວິໄລສັກ ພົມພັກດີ ຮອງຫົວໜ້າພະແນກກະສິກຳ ແລະ ສີ່ງແວດລ້ອມແຂວງ, ທ່ານ ທີນນະກອນ ແສງອຸໄທ ປະທານຄະນະກຳມະການປົກຄອງເມືອງວາປີ ກັບ ຝ່າຍບໍລິສັດເຊັນໂດຍ ທ່ານ ໂຮ່ ຈ້ອງ ຮຽນ ປະທານບໍລິສັດ ລາວ-ຫວຽດ ຄິວທີ ຈຳກັດຜູ້ດຽວ, ທ່ານ ຫງຽນ ຫວຽດ ແອັງ ປະທານບໍລິສັດ ລາວ-ຫວຽດ ເຮັຈເອັນ ຈຳກັດຜູ້ດຽວ; ໂດຍໃຫ້ກຽດເຂົ້າຮ່ວມຂອງ ທ່ານ ປະເດີມພອນ ສົນທະນີ ປະທານຄະນະກໍາມະການປົກຄອງແຂວງສາລະວັນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂິພິຍານ.
ພາບ-ຂ່າວ: ສ.ພະຈັນ
ຄໍາເຫັນ