ສາລະວັນ ໂຮມສອງພະແນກເຂົ້າກັນ

ໃນພິທີ, ໄດ້ຜ່ານບົດລາຍງານຫຍໍ້ສະພາບການປັບປຸບກົງຈັກການຈັດຕັ້ງ, ຜ່ານຄໍາສັ່ງຂອງຄະນະປະຈຳພັກແຂວງ ສະບັບເລກທີ 13/ຄຈພຂ, ລົງວັນທີ 9 ກັນຍາ 2025 ວ່າດ້ວຍການຍຸບເລີກ ຄະນະພັກຮາກຖານ ພະແນກກະສິກຳ ແລະ ປ່າໄມ້ ແຂວງ, ໜ່ວຍພັກຮາກຖານພະແນກຊັບພະຍາກອນ ແລະ ສິ່ງແວດລ້ອມ ແລະ ໜ່ວຍພັກຂຶ້ນກັບ; ຜ່ານແຈ້ງການເຖິງພະແນກກະສິກຳ ແລະ ປ່າໄມ້ ແລະ ພະແນກຊັບພະຍາກອນ ແລະ ສິ່ງແວດລ້ອມ ໃຫ້ແຈ້ງພະນັກງານ- ລັດຖະກອນຜູ້ທີ່ຄົບເງື່ອນໄຂ ອອກພັກການ ລໍຮັບອຸດໜູນບຳນານ ໃນງວດທີ I ປີ 2026 ຈຳນວນ 11 ສະຫາຍ ຍິງ 2 ສະຫາຍ.

ປະກາດຮັບຮອງກົງຈັກການຈັດຕັ້ງ ແລະ ບຸກຄະລາກອນຂອງພະແນກກະສິກຳ ແລະ ສິ່ງແວດລ້ອມ, ຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 1394-1395/ຄຈພຂ ວ່າດ້ວຍການສ້າງຕັ້ງຄະນະພັກຮາກຖານ ໃໝ່ ແລະ ບົ່ງຕົວແຕ່ງຕັ້ງຄະນະພັກຮາກຖານ ພະແນກກະສິກຳ ແລະ ສິ່ງແວດລ້ອມ. ໃນນັ້ນ, ໄດ້ເຫັນດີ ບົ່ງຕົວແຕ່ງຕັ້ງ ຄະນະພັກຮາກຖານພະແນກກະສິກຳ ແລະ ສິ່ງແວດລ້ອມແຂວງ ມີ 9 ສະຫາຍ ຍິງ 2 ສະຫາຍ ປະກອບມີ: ສະຫາຍ ສີວັນພະກອນ ວົງບຸນທັນ ເປັນເລຂາຄະນະພັກຮາກຖານ, ສະຫາຍ ສີນໄຊ ເພັດແພງລາສີ ຮອງເລຂາ, ສະຫາຍ ສຸພະໄຊ ບຸນຍົງ ກຳມະການ ຄະນະພັກຮາກຖານ ທັງເປັນປະທານກວດກາພັກ. ພ້ອມນີ້ຍັງໄດ້ຮັບຮອງໂຄງປະກອບການຈັດຕັ້ງ ພະແນກກະສິກຳ ແລະ ສິ່ງແວດລ້ອມໃໝ່ ປະກອບມີ 11 ຂະແໜງ ແລະ 2 ກອງ. ພ້ອມທັງ ໄດ້ຮັບຮອງໂຄງປະກອບດ້ານບຸກຄະລາກອນ ເປັນຕົ້ນ: ແຕ່ງຕັ້ງຫົວໜ້າ ແລະ ຮອງຫົວໜ້າ ພະແນກກະສິກຳ ແລະ ສິ່ງແວດລ້ອມແຂວງຄື: ທ່ານ ສີວັນພະກອນ ວົງບຸນທັນ ເປັນຫົວໜ້າ, ທ່ານ ສິນໄຊ ເພັດແພງລາສີ, ທ່ານ ສຸພະໄຊ ບຸນຍົງ, ທ່ານ ມະໂນຫວັງ ພົງອຸດົມ, ທ່ານ ນ ດາວັນ ຄໍານວນວິຈິດ ແລະ ທ່ານ ວິໄລສັກ ພົມພັກດີ ເປັນຮອງຫົວໜ້າພະແນກ.

ການປັບປຸງກົງຈັກການຈັດຕັ້ງໃນຄັ້ງນີ້, ເພື່ອເຮັດໃຫ້ກົງຈັກການຈັດຕັ້ງລັດ ມີຄວາມກະທັດຮັດ, ໂລ່ງລ່ຽນ, ມີປະສິດທິພາບ ແລະ ເຂັ້ມແຂງ; ມີການບໍລິຫານ ທີ່ນໍາໃຊ້ຊັບພະຍາກອນມະນຸດຢ່າງປະຢັດ, ຄຸ້ມຄ່າ ແລະ ເກີດຜົນປະໂຫຍດສູງສຸດ; ສາມາດແກ້ໄຂສະພາບຊໍ້າຊ້ອນດ້ານພາລະບົດບາດ, ເຮັດໃຫ້ກົງຈັກບໍ່ໃຫຍ່ໂຕ, ຫຼຸດຂອດຂັ້ນການເຮັດວຽກ, ຫັນສູ່ຄວາມທັນສະໄໝ; ຫຼຸດຜ່ອນຊ່ອງຫວ່າງ ຄວາມຫຍໍ້ທໍ້, ໂຍນຄວາມຮັບຜິດຊອບ, ເອື່ອອີງໃສ່ກັນ; ສ້າງຄວາມໂປ່ງໃສໃນການປະຕິບັດວຽກງານ ທີ່ສາມາດກວດສອບໄດ້ ຢ່າງເປັນລະບົບ. ແນໃສ່ຮັບປະກັນການຈັດຕັ້ງປະຕິບັດວຽກງານໃຫ້ມີຄວາມຄ່ອງຕົວ, ສອດຄ່ອງກັບແນວທາງນະໂຍບາຍ, ສະພາບການຂະຫຍາຍຕົວຂອງເສດຖະກິດ-ສັງຄົມ ແລະ ຄວາມຮຽກຮ້ອງຕ້ອງການຂອງໜ້າທີ່ວຽກງານ.

(ພາບ-ຂ່າວ: ທິດລານີ ໂຄດໂຍທາ)