ສາລະວັນ ເກັບກຳຂໍ້ມູນຂຶ້ນທະບຽນດິນວັດທະນະທຳ

ເມື່ອບໍ່ດົນມ່ານມາ, ຢູ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງສາລະວັນ ໄດ້ຈັດກອງປະຊຸມປຶກສາຫາລືໃນການເຄື່ອນໄຫວລົງສຳຫຼວດເກັບກຳຂໍ້ມູນ ເພື່ອຂຶ້ນທະບຽນດິນວັດທະນະທຳ, ໂດຍການເຂົ້າຮ່ວມຂອງທ່ານ ມະໄລວອນ ສີປະເສີດ ຫົວໜ້າພະແນກ ຖວທ ແຂວງ, ທ່ານ ທອງລິດ ຫຼວງໂຄດ ຮອງຫົວໜ້າກົມມໍຣະດົກ ກະຊວງ ຖວທ ພ້ອມດ້ວຍຄະນະ, ມີຜູ້ຕາງໜ້າຈາກກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ພະແນກ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.
ໃນພິທີ, ທ່ານ ມະໄລວອນ ສີປະເສີດ ກ່າວວ່າ: ກອງປະຊຸມຄັ້ງນີ້, ໄດ້ເຫັນດີເປັນເອກະພາບ ແລະ ພ້ອມຈະສະໜອງຂໍ້ມູນທຸກດ້ານ ເພື່ອເຮັດໃຫ້ການປະຕິບັດວຽກງານດັ່ງກ່າວບັນລຸຜົນ, ຊຶ່ງເປັນບາດກ້າວໜຶ່ງທີ່ສໍາຄັນ ແນໃສ່ເພື່ອອະນຸລັກ, ປົກປັກຮັກສາໃຫ້ມີຄຸນຄ່າທາງດ້ານວັດທະນະທໍາ, ປະຫວັດສາດ ແລະ ເສີມຂະຫຍາຍຊຸກຍູ້ໃຫ້ແກ່ການທ່ອງທ່ຽວ. ພາຍໃນແຂວງສາລະວັນ ໄດ້ສະຫງວນດິນໄວ້ໃນເຂດພື້ນທີ່ວັດທະນະທຳ ແຕ່ບໍ່ທັນໄດ້ຂຶ້ນທະບຽນທີ່ດິນຂອບເຂດວັດທະນະທຳ ເພື່ອເກັບກຳຂໍ້ມູນ ຮອງຮັບໃຫ້ແກ່ການສ້າງເປັນມໍຣະດົກແຫ່ງຊາດ ລະດັບທ້ອງຖິ່ນ, ຊຶ່ງໄດ້ເກັບກໍາເປັນຂໍ້ມູນພື້ນຖານໃນເບື້ອງຕົ້ນ. ຈາກນັ້ນ, ກອງປະຊຸມກໍໄດ້ແລກປ່ຽນບົດຮຽນໃນການຈັດຕັ້ງປະຕິບັດວຽກດັ່ງກ່າວ ແລະ ການລົງສຳຫຼວດເຂດພື້ນທີ່ເປົ້າໝາຍ.
ຈາກນັ້ນ, ກໍໄດ້ລົງສຳຫຼວດເບີ່ງພື້ນທີ່ເຂດສິມເກົ່າ ຢູ່ວັດສີມຸງຄຸນ (ວັດກາງ) ແລະ ສະຖານທີ່ອື່ນໆ ເພື່ອເກັບກຳຂໍ້ມູນ, ຕິດຕາມເບິ່ງສະພາບຄວາມເປັນຈິງ ແລະ ຟື້ນຟູຄືນໃນເຂດພື້ນທີ່ວັດທະນະທຳອັນເກົ່າ. ເພື່ອແນໃສ່ໃນການປົກປັກຮັກສາ ແລະ ຂຶ້ນທະບຽນທີ່ດິນວັດທະນະທຳໄວ້ ເພື່ອປ້ອງກັນການບຸກລຸກເຂດພື້ນທີ່ດັ່ງກ່າວດ້ວຍ.
(ຂ່າວ-ພາບ: ວິໄລວອນ ສິດທິໄຊ)