ສາລະວັນ ປະກາດແຕ່ງຕັ້ງຫົວໜ້າພະແນກການເງິນແຂວງ

ໂດຍປະຕິບັດຕາມຂໍ້ຕົກລົງຂອງແຂວງສາລະວັນ ສະບັບເລກທີ 100/ຈຂ, ລົງວັນທີ 2 ກຸມພາ 2024 ວ່າດ້ວຍການແຕ່ງຕັ້ງ ທ່ານ ພອນປະເສີດ ລາຊາໂພ ເປັນຫົວໜ້າພະແນກການເງິນແຂວງສາລະວັນ, ທັງນີ້ ກໍເພື່ອເປັນການປັບປຸງການຈັດຕັ້ງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ຊຶ່ງເປັນວຽກປົກກະຕິ ທີ່ໄດ້ປະຕິບັດຕາມຂັ້ນຕອນ ແລະ ລະບຽບການຕ່າງໆ ໃນການຈັດຕັ້ງການນໍາພາ-ຊີ້ນໍາ ຂະແໜງການເງິນໃຫ້ເຂັ້ມແຂງ ເຄື່ອນໄຫວຕາມພາລະບົດບາດຂອງຕົນຢ່າງມີປະສິດທີຜົນ ແລະ ມີຜົນສໍາເລັດຕາມລະດັບຄາດໝາຍ.
ທ່ານ ດາວວົງ ພອນແກ້ວ ກຳມະການສູນກາງພັກ ເລຂາພັກແຂວງ ເຈົ້າແຂວງສາລະວັນ ໄດ້ເນັ້ນໃຫ້ເອົາໃຈໃສ່ສຶກສາອົມຮົມວຽກງານການເມືອງແນວຄິດ ໃຫ້ແກ່ພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນເປັນປົກກະຕິ ແລະ ຕໍ່ເນື່ອງ, ປັບປຸງການຈັດຕັ້ງໃຫ້ເຂັ້ມແຂງບົນພື້ນຖານການຍົກສູງຄວາມຮູ້-ຄວາມສາມາດ ແລະ ຄຸນສົມບັດ ໃນຖັນແຖວພະນັກງານການນໍາ, ພະນັກງານຄຸ້ມຄອງ ແລະ ພະນັກງານວິຊາການ ທີ່ເຮັດວຽກການເງິນຕົວຈິງ, ພ້ອມກັນປັບປຸງແບບແຜນວິທີເຮັດວຽກ ເພື່ອຍົກສູງຄວາມຮັບຜິດຊອບໃນການປະຕິບັດໜ້າທີ່ຕາມການມອບໝາຍໃຫ້ມີປະສິດທິຜົນ, ສູ້ຊົນປັບປຸງວຽກງານການເງິນ-ງົບປະມານແນໃສ່ເຮັດໃຫ້ງົບປະມານຂອງແຂວງເປັນເຄື່ອງມືທີ່ມີປະສິດທິຜົນສູງ, ປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມ-ຂອງແຂວງ, ພັດທະນາວຽກງານການເງິນໃຫ້ມີຄວາມເຕີບໃຫຍ່ເຂັ້ມແຂງ, ມີຄວາມຍືນຍົງສາມາດກຸ້ມຕົນເອງ, ເພິ່ງຕົນເອງໃນອະນາຄົດ ແລະ ອື່ນໆ.
ພິທີປະກາດແຕ່ງຕັ້ງຫົວໜ້າພະແນການເງິນແຂວງ ຈັດຂຶ້ນໃນວັນທີ 12 ກຸມພາ 2024 ທີ່ຫ້ອງປະຊຸມພະແນການເງິນແຂວງ, ໂດຍການເຂົ້າຮ່ວມຂອງ ທ່ານ ດາວວົງ ພອນແກ້ວ, ມີພາກສ່ວນກ໋ຍວຂ້ອງເຂົ້າຮ່ວມ.
(ພາບ-ຂ່າວ: ທິດລານີ ໂຄດໂຍທາ)