ສະຫຼອງບຸນປີໃໝ່ລາວປີນີ້ ບົນພື້ນຖານການປະຢັດມັດທະຍັດ

ດັ່ງທີ່ພວກເຮົາຮັບຮູ້ນຳກັນແລ້ວວ່າປັດຈຸບັນສະພາບການຂອງໂລກ, ພາກພື້ນ ແລະ ສາກົນ ຍັງ ສືບຕໍ່ຜັນແປໄປຢ່າງສັບສົນ ຊຶ່ງໄດ້ສົ່ງຜົນກະທົບຢ່າງໜັກໜ່ວງຕໍ່ເສດຖະກິດ-ການເງິນຂອງບັນດາປະເທດ ໃນໂລກ, ໃນຂະນະດຽວກັນ ສະພາບການດັ່ງກ່າວກໍສົ່ງຜົນກະທົບ ຕໍ່ ສປປ ລາວ ພວກເຮົາເຊັ່ນກັນ, ສະນັ້ນ ເພື່ອເຮັດໃຫ້ການຫຼິ້ນບຸນສົ່ງທ້າຍປີເກົ່າ ແລະ ຕ້ອນຮັບປີໃໝ່ລາວ ປະຈຳປີ 2026 ທີ່ເຄີຍ ປະຕິບັດກັນມາທຸກໆປີ ໃຫ້ມີຄວາມເບີກບານມ່ວນຊື່ນລື່ນເລິງ, ສຳລັບປີນີ້, ພັກ-ລັດມີຄວາມເປັນຫ່ວງ ເປັນໃຍຕໍ່ກັບສະພາບການ ການດຳລົງຊີວິດຂອງພໍ່ແມ່ ປະຊາຊົນ, ສະນັ້ນ ຈຶ່ງຮຽກຮ້ອງໃຫ້ພໍ່ແມ່ປະຊົນ ໃຊ້ຈ່າຍເຂົ້າໃນກິດຈະກຳສະເຫຼີມສະຫຼອງບຸນປີໃໝ່ນັ້ນ, ຕ້ອງເຮັດດ້ວຍຄວາມປະຢັດມັດທະຍັດ ບໍ່ໃຊ້ຈ່າຍ ແບບຟຸ່ມເຟືອຍ, ການຫຼິ້ນບຸນປີໃໝ່ນັ້ນ ຕ້ອງຮັກສາໃຫ້ໄດ້ຮີດຄອງປະເພນີອັນດີງາມ, ການຫົດນໍ້າ ເພື່ອອວຍພອນຊຶ່ງກັນ ແລະ ກັນ ກໍຕ້ອງໃຊ້ນໍ້າທີ່ສະອາດ ແລະ ຕ້ອງໄດ້ຮັບອະນຸຍາດກ່ອນຈຶ່ງຫົດ, ຫຼີກລ່ຽງໃນການໃຊ້ນໍ້າເປື້ອນ, ນໍ້າສີ, ການຮ່າຍນໍ້າໃສ່ຖົງຢາງ ແລ້ວແກວ່ງໃສ່ກັນໃນເວລາຂີ່ລົດ ແລະ ໃຊ້ບັ້ງສີດ ຊຶ່ງຈະເຮັດໃຫ້ເກີດຄວາມບໍ່ງາມຕາ ແລະ ເກີດອຸບັດຕິເຫດໄດ້.

ສະນັ້ນ, ຕໍ່ກັບບັນຫາດັ່ງກ່າວ ຖ້າຫາກທຸກຄົນພ້ອມໃຈກັນປະຕິບັດ ກໍຈະເຮັດໃຫ້ການສະເຫຼີມ ສະຫຼອງບຸນປີໃໝ່ (ສົ່ງທ້າຍປີເກົ່າ-ຕ້ອນຮັບປີໃໝ່) ລາວປີນີ້ ມີຄວາມເປັນລະບຽບຮຽບຮ້ອຍ, ມີຄວາມສະ ຫງົບປອດໄພ, ບັນຫາປະກົດການຫຍໍ້ທໍ້ໃນສັງຄົມກໍຈະບໍ່ເກີດຂຶ້ນ, ໃນນັ້ນຮີດຄອງປະເພນີອັນດີງາມຂອງ ຊາດລາວພວກເຮົາກໍຈະຄົງຢູ່ຄູ່ກັບຄົນລາວຮຸ່ນລູກຫຼານພວກເຮົາຕະຫຼອດໄປ, ທີ່ສຳຄັນຈະສ້າງຄວາມປະທັບໃຈ ໃຫ້ແກ່ແຂກຕ່າງປະເທດ ທີ່ມາທ່ອງທ່ຽວ ສປປ ລາວ ມາເຫັນແລ້ວຢາກມາທ່ອງທ່ຽວອີກ.

ບຸນປີໃໝ່ (ບຸນສົງການ) ລາວ ປີນີ້ ແມ່ນກົງ ກັບວັນທີ 14 ຄືວັນສັງຂານລ່ວງ, ວັນທີ 15 ວັນສັງຂານເນົາ ແລະ ວັນທີ 16 ວັນສັງຂານຂຶ້ນ, ບຸນປີໃໝ່ລາວ ເປັນບຸນປາງໃຫຍ່ ຂອງປວງຊົນ ລາວທັງຊາດທີ່ໄດ້ປະຕິບັດ ແລະ ສືບທອດກັນມາແຕ່ຮຸ່ນປູ່ຍ່າຕາຍາຍ ແລະ ເປັນບຸນປະເພນີອັນດີງາມທີ່ຢູ່ຄູ່ກັບຄົນລາວຕະຫຼອດມາ, ເປັນບຸນປະຈຳຊາດທີ່ຊາວຕ່າງຊາດທີ່ໄດ້ມາເຫັນແລ້ວມີຄວາມປະທັບໃຈ ແລະ ໃຫ້ການຍ້ອງຍໍຊົມເຊີຍຕໍ່ຮີດຄອງປະເພນີ ແລະ ວັດທະນະທຳອັນດີງາມ ທີ່ຫາເບິ່ງໄດ້ຍາກໃນໂລກ, ເພາະວ່າການເຮັດກິດຈະກຳຕ່າງໆໃນໂອກາດສະເຫຼີມສະຫຼອງບຸນປີໃໝ່ລາວແມ່ນໄດ້ມີຫຼາກຫຼາຍກິດຈະກຳທີ່ເຮັດຕາມຮີດຄອງປະເພນີລາວທີ່ມີຄວາມງົດງາມ ແລະ ເປັນເອກະລັກຂອງຄົນລາວ.