ການເຄື່ອນໄຫວໃນຄັ້ງນີ້, ຄະນະຜູ້ແທນສະມາຄົມມິດຕະພາບລາວ-ກໍາປູເຈຍ ໄດ້ພົບປະແລະ ເຮັດວຽກກັບຄະນະສະມາຄົມມິດຕະພາບ ກໍາປູເຈຍ-ລາວ ທີ່ນະຄອນຫຼວງພະນົມເປັນ ຊຶ່ງສອງຝ່າຍໄດ້ຕີລາຄາຄືນການຈັດຕັ້ງປະຕິບັດການພົວພັນຮ່ວມມືຂອງສອງສະມາຄົມ ໂດຍສະເພາະແມ່ນເນື້ອໃນບົດບັນທຶກຄວາມເຂົ້າໃຈທີ່ໄດ້ລົງນາມຮ່ວມກັນໃນປີ 2022 ແລະ ປຶກສາຫາລືແຜນການ, ກິດຈະກຳໃນຕໍ່ໜ້າ ເພື່ອເຮັດໃຫ້ການພົວພັນຮ່ວມມືລະຫວ່າງສອງສະມາຄົມມິດຕະພາບ ລາວ-ກໍາປູເຈຍ, ກໍາປູເຈຍ-ລາວ ມີຫຼາຍສີສັນ, ຫຼາຍຮູບແບບ ທັງມີປະສິດທິພາບ-ປະສິດທິຜົນດີຂຶ້ນກວ່າເກົ່າ; ໃນໄລຍະຜ່ານມາ ການນໍາຂັ້ນສູງຂອງສອງປະເທດ ໄດ້ໄປມາຫາສູ່ກັນເປັນປົກກະຕິ, ການພົວພັນຮ່ວມມືຂອງບັນດາຂົງເຂດ, ຂະແໜງການຕ່າງໆ ນັບແຕ່ສູນກາງຮອດທ້ອງຖິ່ນ ໄດ້ຮັບການພັດທະນາຢ່າງມີປະສິດທິພາບ-ປະສິດທິຜົນ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນ ສອງຊາດ, ສະແດງໃຫ້ເຫັນສາຍພົວພັນມິດຕະພາບທີ່ເປັນມູນເຊື້ອ, ການພົວພັນແບບຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານ ລະຫວ່າງສອງປະເທດ ກໍຄືປະຊາຊົນສອງຊາດ ໄດ້ຮັບການເສີມຂະຫຍາຍເຂົ້າສູ່ທາງກວ້າງ ແລະ ລວງເລິກ, ນັບມື້ເກີດດອກອອກຜົນ ທັງເປັນການປະກອບສ່ວນອັນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນໄລຍະໃໝ່ຂອງສອງປະເທດ ກໍຄືການປະກອບສ່ວນເຂົ້າໃນພາລະກິດສັນຕິພາບ, ສະຖຽນລະພາບ, ການຮ່ວມມືເພື່ອການພັດທະນາໃນພາກພື້ນ ແລະ ໃນໂລກ.
ສໍາລັບການພົວພັນຮ່ວມມືລະຫວ່າງສອງສະມາຄົມມິດຕະພາບ ລາວ-ກຳປູເຈຍ, ກຳປູເຈຍ-ລາວ ເຫັນວ່າມີບາດກ້າວຂະຫຍາຍຕົວ ແລະ ໄດ້ຮັບການເສີມຂະຫຍາຍຢ່າງຕັ້ງໜ້າ, ມີການປະສານສົມທົບ, ພົວພັນຮ່ວມມືນໍາກັນຢ່າງປົກກະຕິ ແລະ ຕໍ່ເນື່ອງຕະຫຼອດມາ; ໄດ້ສືບຕໍ່ກົນໄກການແລກປ່ຽນຢ້ຽມຢາມ, ການໄປມາຫາສູ່ກັນເປັນປົກກະຕິ; ມີການແລກປ່ຽນຂໍ້ມູນຂ່າວສານ, ຊຸກຍູ້, ສົ່ງເສີມ, ສະໜັບສະໜູນການພົວພັນຮ່ວມມື ແລະ ໄປມາຫາສູ່ກັນລະຫວ່າງປະຊາຊົນຕາມເຂດຊາຍແດນ; ສະໜັບສະໜູນການຮ່ວມມືດ້ານວຽກງານປ້ອງກັນຄວາມສະຫງົບ, ຄວາມເປັນລະບຽບ ຮຽບຮ້ອຍຕາມຊາຍແດນ, ດ້ານເສດຖະກິດ-ການຄ້າ, ການລົງທຶນ, ການທ່ອງທ່ຽວ, ສຶກສາ-ສາທາລະນະສຸກ ແລະ ອື່ນໆ ຕາມເງື່ອນໄຂ ແລະ ຄວາມສາມາດຕົວຈິງ ເພື່ອຜົນປະໂຫຍດຂອງປະເທດ ແລະ ປະຊາຊົນສອງຊາດ.
ສຳລັບແຜນໃນຕໍ່ໜ້າ, ສອງຝ່າຍໄດ້ປຶກສາຫາລື ແລະ ເອກະພາບນໍາກັນ ເປັນຕົ້ນ: 1. ສືບຕໍ່ກົນໄກການປະສານງານ, ແລກປ່ຽນຂໍ້ມູນຂ່າວສານ ແລະ ແລກປ່ຽນການຢ້ຽມຢາມ, ໄປມາຫາສູ່ກັນໃຫ້ເປັນປົົກກະຕິ ລະຫວ່າງສອງສະມາຄົມມິດຕະພາບ ລາວ-ກຳປູເຈຍ, ກຳປູເຈຍ-ລາວ; 2. ຊຸກຍູ້ບັນດາສະມາຄົມຂັ້ນແຂວງ, ປະຊາຊົນຕາມເຂດຊາຍແດນ ໃຫ້ໄປມາຫາສູ່, ສ້າງກິດຈະກໍາຮ່ວມກັນ ເຊັ່ນ: ການແລກປ່ຽນສິລະປະ, ວັດທະນະທຳ, ກິລາມິດຕະພາບ, ການທ່ອງທ່ຽວ ແລະ ອື່ນໆ; 3. ປະສານງານ, ຊຸກຍູ້ ແລະ ເປັນຂົວຕໍ່ສ້າງກິດຈະກຳໃຫ້ແກ່ຂະບວນການຊາວໜຸ່ມ, ນັກສຶກສາ ໃນການທັດສະນະສຶກສາ ເພື່ອຄົ້ນຄວ້າ, ສຶກສາກ່ຽວກັບສາຍພົວພັນມິດຕະພາບຂອງສອງຊາດ ເພື່ອເປັນການປູກຈິດສໍານຶກໃຫ້ຄົນຮຸ່ນໃໝ່ ໄດ້ເຂົ້າໃຈແຈ້ງ, ເລິກເຊິ່ງ ແລະ ເປັນເຈົ້າການສືບທອດມູນເຊື້ອອັນດີງາມຂອງສອງຊາດ ລາວ ແລະ ກຳປູເຈຍ; 4. ຊຸກຍູ້ ແລະ ເປັນຂົວຕໍ່ ໃນການພົວພັນຮ່ວມມືໃຫ້ແກ່ຂະແໜງການຄ້າ, ການລົງທຶນ ທັງຢູ່ສູນກາງ ແລະ ທ້ອງຖິ່ນ ໂດຍສະເພາະແມ່ນບັນດານັກທຸລະກິດ ລາວ ແລະ ກຳປູເຈຍ ໃຫ້ມີການພົວພັນ ແລະ ຮ່ວມມືນໍາກັນ.
ນອກຈາກການພົບປະສອງຝ່າຍ, ຄະນະຜູ້ແທນສະມາຄົມມິດຕະພາບລາວ-ກໍາປູເຈຍ ຍັງໄດ້ເຂົ້າພົບປະທ່ານຮອງປະທານແນວໂຮມມາຕຸພູມແຫ່ງຣາຊະອານາຈັກກຳປູເຈຍ, ພົບປະກັບເຈົ້າ ແຂວງພຣະສີຫະນຸ, ຢ້ຽມຊົມຫໍພິພິທະພັນແຫ່ງຊາດ ແລະ ອະນຸສາວະລີແຫ່ງຊາດ ເຕໂຈ ຮຸນເຊນ.
ຄໍາເຫັນ