ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ສະຫາຍ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ເລຂາພັກແຂວງ ເຈົ້າແຂວງອຸດົມໄຊ, ມີແຂກເຊີນ ແລະ ຜູ້ແທນແມ່ຍິງຈາກທົ່ວແຂວງ ທັງໝົດ 149 ສະຫາຍ ຊຶ່ງເປັນຕົວແທນໃຫ້ສະມາຊິກສະຫະພັນແມ່ຍິງທົ່ວແຂວງ.
ກອງປະຊຸມຄັ້ງນີ້, ຜູ້ແທນກອງປະຊຸມໄດ້ ຄົ້ນຄວ້າ, ພິຈາລະນາ, ຮັບຮອງເອົາ ບົດລາຍງານການເມືອງ ແລະ ທິດທາງແຜນການ; ແຜນພັດທະນາວຽກງານແມ່ຍິງແຂວງອຸດົມໄຊ, ພິຈາລະນາ ແລະ ຮັບຮອງເອົາ ບົດສຳຫຼວດການນໍາພາລວມຂອງຄະນະບໍລິຫານງານສະຫະພັນແມ່ຍິງແຂວງ. ສະຫາຍ ນາງ ລີຈັນ ສີສຸທຳ ປະທານຄະນະບໍລິຫານງານສະຫະພັນແມ່ຍິງ ແຂວງອຸດົມໄຊ ໄດ້ຂຶ້ນຜ່ານຮ່າງບົດລາຍງານການເມືອງ ຂອງຄະນະບໍລິຫານງານສະຫະພັນແມ່ຍິງແຂວງ ຕໍໍ່ກອງປະຊຸມໃຫຍ່ຜູ້ແທນແມ່ຍິງແຂວງ ຄັ້ງທີ X, ໂດຍສະເພາະແມ່ນ ສະຫຼຸບຕີລາຄາຜົນການຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນແມ່ຍິງແຂວງ ຄັ້ງທີ IX ໃນໄລຍະ 5 ປີ ຜ່ານມາ (2020-2024) ເປັນຕົ້ນແມ່ນໄດ້ຕີລາຄາດ້ານວຽກງານສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວພະນັກງານ-ລັດຖະກອນ ກໍໍຄືສະມາຊິກແມ່ຍິງ, ແມ່ຍິງບັນດາເຜົ່າ ດ້ວຍການປຸກລະດົມສະມາຊິກສະຫະພັນແມ່ຍິງ ເຂົ້າຮ່ວມເຊື່ອມຊຶມແນວທາງນະໂຍບາຍຂອງພັກ, ລັດຖະທໍາມະນູນ, ກົດໝາຍ, ມະຕິຕ່າງໆ ເປັນປົກກະຕິ, ໄດ້ຮັບການປັບປຸງ ແລະ ເຄື່ອນໄຫວປະຕິບັດ ພາລະບົດບາດ, ສິດໜ້າທີ່ຂອງຕົນ ເຮັດໃຫ້ການຈັດຕັ້ງມີຄວາມໜັກແໜ້ນ, ເຂັ້ມແຂງ ທັງດ້ານປະລິມານ ແລະ ຄຸນນະພາບ. ປັດຈຸບັນທົ່ວແຂວງ ມີແມ່ຍິງໃນເກນອາຍຸ 15 ປີ ຂຶ້ນໄປ ຈໍານວນ 94,883 ສະຫາຍ, ມີສະມາຊິກສະຫະພັນແມ່ຍິງ ທັງໝົດ 50,787 ສະຫາຍ, ການສ້າງພະນັກງານ-ລັດຖະກອນ ເພດຍິງ: ປັດຈຸບັນ ທົ່ວແຂວງ ມີພະນັກງານ-ລັດຖະກອນເພດຍິງ ທັງໝົດ 3,185 ສະຫາຍ, ກວມ 40.80% ຂອງພະນັກງານ-ລັດຖະກອນທັງໝົດ, ເປັນສະມາຊິກພັກ 2,378 ສະຫາຍ, ກວມ 30.46% ຂອງພະນັກງານ-ລັດຖະກອນທັງໝົດ. ປັດຈຸບັນທົ່ວແຂວງ ມີການຈັດຕັ້ງສະຫະພັນແມ່ຍິງ ທັງໝົດ 467 ບ້ານ, ມີ 138 ຮາກຖານ, ມີ 162 ໜ່ວຍ. ກອງປະຊຸມຍັງໄດ້ຜ່ານຮ່າງແຜນພັດທະນາແມ່ຍິງ 2025-2029 ໂດຍມີວິໄສທັດ ຄື: ບຸກທະລຸພັດທະນາແມ່ຍິງລາວຮອບດ້ານ ໃຫ້ເປັນພົນລະເມືອງດີ, ມີນໍ້າໃຈຮັກຊາດ, ຮັກລະບອບປະຊາທິປະໄຕ ປະຊາຊົນ, ມີຄວາມສາມັກຄີ, ສົ່ງເສີມຄວາມກ້າວໜ້າຂອງແມ່ຍິງ, ມີຄວາມສະເໝີພາບ ຍິງ-ຊາຍ, ອະນຸລັກ ແລະ ສົ່ງເສີມຄຸນລັກສະນະທີ່ເປັນມູນເຊື້ອຂອງແມ່ຍິງລາວບັນດາເຜົ່າ ສ້າງຄ່ານິຍົມອັນຖືກຕ້ອງ, ກ້າວໜ້າ ແລະ ມີວິທະຍາສາດ, ສ້າງວິຖີຊີວິດໃໝ່ ເພື່ອພັດທະນາຕົນເອງ ແລະ ຄອບຄົວ ໃຫ້ຮັ່ງມີເຂັ້ມແຂງ ເທື່ອລະກ້າວ.
ຜູ້ແທນກອງປະຊຸມໄດ້ໃຊ້ສິດປະຊາທິປະໄຕຂອງຕົນ ເລືອກຕັ້ງຄະນະບໍລິຫານງານສະຫະພັນແມ່ຍິງ ແຂວງອຸດົມໄຊ ຊຸດໃໝ່ ໂດຍມີຜູ້ອອກສະໝັກ ທັງໝົດ 32 ສະຫາຍ ເລືອກເອົາ 29 ສະຫາຍ, ກອງປະຊຸມໄດ້ເປັນເອກະສັນກັນຢ່າງສົມບູນເລືອກເອົາ ສະຫາຍ ນາງ ລີຈັນ ສີສຸທຳ ເປັນປະທານສະຫະພັນແມ່ຍິງແຂວງ, ສະຫາຍ ນາງ ອຳພອນ ອິນຕະລາ ແລະ ສະຫາຍ ນາງ ບົວສະຫວັນ ໄຊຍະບຸດສີ ເປັນຮອງປະທານ ແລະ ເປັນເອກະສັນກັນເລືອກເອົາ ສະຫາຍ ນາງ ອຳພອນ ອິນຕະລາ ເປັນປະທານກວດກາ; ສະຫາຍ ນາງ ວຽງສະໄໝ ປັນຍາຂັນ ແລະ ສະຫາຍ ນາງ ເພັດ ເພັດມະນີຈັນ ເປັນຮອງປະທານກວດກາ ແລະ ຮັບຮອງເອົາຜູ້ແທນສົມບູນ ຈຳນວນ 11 ສະຫາຍ ແລະ ຜູ້ແທນສໍາຮອງ ຈຳນວນ 2 ສະຫາຍ.
(ຂ່າວ: ແສງອາທິດ)
ຄໍາເຫັນ