ສໍາເລັດການຮ່ວມມືກວດກູ້ ແລະ ທໍາລາຍລະເບີດບໍ່ທັນແຕກຢູ່ເມືອງກາສີ

ພິທີສະຫຼຸບຜົນງານ ແລະ ປິດໂຄງການການຮ່ວມມືກວດກູ້ ແລະ ທຳລາຍລະເບີດບໍ່ທັນແຕກ ເພື່ອມະນຸດສະທຳ ລະຫວ່າງ ກະຊວງປ້ອງກັນປະເທດແຫ່ງ ສປປ ລາວ ແລະ ສ ຣັດເຊຍ ສົກປີ 2023-2024 ໄດ້ຈັດຂຶ້ນໃນວັນທີ 24 ມີນາ ຜ່ານມາ ທີ່ເມືອງກາສີ ແຂວງວຽງຈັນ ໂດຍມີ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ, ທ່ານ ເອວຊາດ ຕາລືບົບ ອັກຄະລັດຖະທູດທີ່ປຶກສາ ສະຖານເອກອັກຄະລັດຖະທູດ ແຫ່ງ ສ ຣັດເຊຍປະຈຳ ລາວ, ທ່ານ ຄໍາພັນ ສິດທິດໍາພາ ເຈົ້າແຂວງວຽງຈັນພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພົນເອກ ຈັນສະໝອນ ຈັນຍາລາດ ກ່າວວ່າ: ສປປ ລາວ ເປັນປະເທດໜຶ່ງໄດ້ຮັບຜົນກະທົບຈາກລະເບີດບໍ່ທັນແຕກ ທີ່ຕົກຄ້າງມາແຕ່ໄລຍະສົງຄາມອິນດູຈີນ ແຕ່ປີ 1964 ເຖິງ ປີ 1973  ໂດຍອີງຕາມຂໍ້ມູນການຖິ້ມລະເບີດຂອງກອງທັບອາກາດສະຫະລັດອາເມຣິກາ ແມ່ນມີຍົນຫຼາຍກວ່າ 580.000ຖ້ຽວບິນມາຖິ້ມລະເບີດຫຼາຍກວ່າ 2 ລ້ານໂຕນ ໃສ່ແຜ່ນດິນລາວ. ໃນນັ້ນ, ສ່ວນຫຼາຍແມ່ນລະເບີດໂບມບີ, ລະເບີດລູກຫວານ ຊຶ່ງມີປະມານ 270ລ້ານໜ່ວຍ. ມາຮອດປັດຈຸບັນຍັງປະມານ 30% ຂອງລູກລະເບີດດັ່ງກ່າວ ຍັງບໍ່ທັນແຕກ ແລະ ຕົກຄ້າງຢັ່ງຢາຍໃນພື້ນທີ່ດິນທໍາການຜະລິດ, ດິນປຸກສ້າງທີ່ຢູ່ອາໄສຂອງປະຊາຊົນ, ສະຖານທີ່ກໍ່ສ້າງໂຮງຮຽນ, ໂຮງໝໍ, ຕະຫຼາດ, ຖະໜົນຫົນທາງ ແລະ ພື້ນທີ່ອື່ນໆ ໃນເກືອບທຸກແຂວງຂອງ ສປປ ລາວ. ພາຍຫຼັງສົງຄາມສິ້ນສຸດລົງ ລູກລະເບີດບໍ່ທັນແຕກເຫຼົ່ານັ້ນ ໄດ້ສືບຕໍ່ເປັນໄພຂົ່ມຂູ່ປະຊາຊົນລາວຕະຫຼອດມາ ໃນແຕ່ລະປີມີຜູ້ເສຍຊີວິດ, ບາດເຈັບ ແລະ ພິການເປັນຈໍານວນຫຼາຍພັນຄົນ ຊຶ່ງໄດ້ສົ່ງຜົນກະທົບ ຢ່າງໜັກໜ່ວງຕໍ່ການດໍາລົງຊີວິດຂອງປະຊາຊົນ ແລະ ການພັດທະນາເສດຖະກິດ-ສັງຄົມ ຂອງປະເທດພວກເຮົາ. ຈາກບັນຫາດັ່ງກ່າວ, ລັດຖະບານ ແຫ່ງ ສປປ ລາວ ໄດ້ວາງຍຸດທະສາດແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ຕິດພັນກັບແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ.ພ້ອມນັ້ນ, ລັດຖະບານ ໄດ້ຖືເປັນສໍາຄັນໃນການພົວພັນຮ່ວມມືກັບບັນດາປະເທດເພື່ອນມິດ ແລະ ສາກົນຕະຫຼອດມາ ແຕ່ກໍຍັງບໍ່ທັນສາມາດເຮັດໃຫ້ລະເບີດເຫຼົ່ານັ້ນໝົດໄປຈາກຜືນແຜ່ນດິນລາວ.
ທ່ານ ພົນເອກ ຈັນສະໝອນ ຈັນຍາລາດ ກ່າວອີກຕື່ມວ່າ: ການຮ່ວມມືແກ້ໄຂບັນຫາ ລະເບີດບໍ່ທັນແຕກ ທີ່ຕົກຄ້າງເພື່ອມະນຸດສະທຳ ລະຫວ່າງສອງກະຊວງດັ່ງກ່າວ ສະແດງອອກເຖິງຄວາມເປັນຫວ່ງເປັນໃຍຕໍ່ຊີວິດ, ຊັບສິນຂອງປະຊາຊົນລາວ ຊຶ່ງຍາມໃດກໍາລັງປະກອບອາວຸດຂອງສອງປະເທດລາວ-ຮັດເຊຍ ກໍມີຄວາມມຸ່ງຫວັງ ຢາກໃຫ້ປະຊາຊົນລາວ ຫຼຸດພົ້ນຄວາມສ່ຽງອັນຕະລາຍຈາກ ບັນຫາລະເບີດບໍ່ທັນແຕກ ທີ່ຈັກກະພັດຖິ້ມໃສ່ໃນດິນແດນລາວ. ແຕ່ເນື່ອງຈາກການແກ້ໄຂບັນຫາລະເບີດດັ່ງກ່າວ ມີຄວາມຫຍຸ້ງຍາກຫຼາຍ ແລະ ມີຄວາມສ່ຽງອັນຕະຫຼາຍສູງ ຊຶ່ງບໍ່ສາມາດແກ້ໄຂໃນໄລຍະເວລາສັ້ນໆໄດ້. ສະນັ້ນ, ພວກເຮົາທັງໝົດ ຈົ່ງຮ່ວມມືກັນແກ້ໄຂໃຫ້ບັນຫາລະເບີດບໍ່ທັນແຕກ ໃຫ້ນັບມື້ນັບໝົດໄປຈາກພື້ນແຜ່ນດິນລາວ.
ຈາກນັ້ນ, ທ່ານ ພັນເອກ ປາດຖະໜາ ບຸດທິຈັກ ຮອງຫົວໜ້າຫ້ອງການກົມໃຫຍ່ເສນາທິການກອງທັບກະຊວງປ້ອງກັນປະເທດ ໄດ້ຂຶ້ນສະຫຼຸບລາຍງານວຽກງານແຕ່ລະດ້ານໂດຍສະເພາະວຽກງານກວດກູ້ແລະທໍາລາຍລະເບີດວ່າ: ນັບແຕ່ວັນທີ 14 ພະຈິກ 2023-20 ມີນາ 2024 ກໍາລັງກອງກວດກູ້ລະເບີດ ເພື່ອມະນຸດສະທຳກອງທັບ ຮ່ວມກັບກຳລັງກອງກວດກູ້ມິ່ນສາກົນ ກອງທັບແຫ່ງສ ຣັດເຊຍ ໄດ້ເອົາໃຈໃສ່ຈັດຕັ້ງປະຕິບັດການກວດກູ້ ແລະ ທໍາລາຍລະເບີດບໍ່ທັນແຕກທີ່ຕົກຄ້າງໃນປາງສົງຄາມ ອອກຈາກພື້ນທີ່ທຳການຜະລິດ ຂອງປະຊາຊົນ ເມືອງກາສີ ລວມມີ 5 ສະໜາມສໍາເລັດ ແລະ ມີຄວາມປອດໄພ 100% ໃນນັ້ນມີ: ສະໜາມທີ 1 ເຂດສວນຢາງພາລາ ບ້ານໂພນທ່ຽງເນື້ອທີ່ 93.816 ຕາແມັດ,ສະໜາມທີ 2 ເຂດບ້ານນາຊູ ເນື້ອທີ່ 110.434 ຕາແມັດ,ສະໜາມທີ 3 ເຂດພັດທະນາ ຜັງເມືອງໃໝ່ ບ້ານນາມົນ ເນື້ອທີ່ 18.758 ຕາແມັດ,ສະໜາມທີ 4 ຂອບເຂດບ້ານວຽງແກ້ວ 1 (ກອງບັນຊາການທະຫານເມືອງ) ເນື້ອທີ່5.638 ຕາແມັດ,ສະໜາມທີ 5 ວຽງແກ້ວ 2 (ຫ້ອງການເງິນ) ເນື້ອທີ່ 5.600 ຕາແມັດ. ພ້ອມນັ້ນ, ຜ່ານການກວດກູ້ລະເບີດມາຮອດປັດຈຸບັນສາມາດກວດກູ້ສຳເລັດທັງໝົດ 234.246ຕາແມັດ, ພົບລະເບີດບໍ່ທັນແຕກ 1.231 ລູກ,ພົບເສດສະເກັດຈໍານວນ  265.754 ສິ້ນສ່ວນ, ເສດໂລຫະຕ່າງໆຈໍານວນ  234.919 ສິ້ນສ່ວນ. 
(ຂ່າວ-ພາບ: ກະຊວງປ້ອງກັນປະເທດ)