ສໍາຫລວດຄວາມເປັນໄປໄດ້ ໃນການພັດທະນາທ່າເຮືອສາກົນຢູ່ ເມືອງລອງ

(ຂປລ). ເມື່ອບໍ່ດົນມານິ້, ບໍລິສັດ ເອັນຊີຊີ ຈໍາກັດຜູ້ດຽວ ຮ່ວມກັບ ກະຊວງແຜນການ ແລະ ການລົງທຶນ ໄດ້ເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາສໍາຫລວດຄວາມເປັນໄປໄດ້ໃນການພັດທະນາໂຄງການທ່າເຮືອສາກົນ, ເຂດໂລຈິສະຕີກ, ເຂດການຄ້າ-ການບໍລິການ, ເຂດກະສິກຳ ແລະ ການທ່ອງທ່ຽວ ຢູ່ເມືອງລອງແຂວງຫຼວງນໍ້າທາ. ລົງນາມໂດຍທ່ານ ບົວວຽງ ຈໍາປາພັນຜູ້ອໍານວຍການໃຫຍ່ ບໍລິສັດ ເອັນຊີຊີ ຈໍາກັດຜູ້ດຽວ ແລະ ທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ເປັນກຽດເຂົ້າຮ່ວມໂດຍທ່ານ ສົມສະຫວາດ ເລັ່ງສະຫວັດ ອະດີດການນໍາຂັ້ນສູງ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ການດຳເນີນໂຄງການ ພັດທະນາທ່າເຮືອສາກົນແຫ່ງນີ້, ແນໃສ່ເພື່ອພັດທະນາ ຊັບພະຍາກອນທໍາມະຊາດ ຕາມນະໂຍບາຍຂອງລັດຖະບານ ແລະ ແຜນຍຸດທະສາດຂອງກະຊວງໂຍທາທິການ ແລະ ຂົນສົ່່ງ ໃນການພັດທະນາແມ່ນໍ້າຂອງ ໃຫ້ເປັນເສັ້ນທາງຂົນສົ່ງທາງນໍ້າ ທີ່ໄດ້ມາດຕະຖານສາກົນ ຕາມສັນຍາການເດີນເຮືອ ເພື່ອການຄ້າຕາມແມ່ນໍ້າຂອງ-ແມ່ນໍ້າລ້ານຊ້າງ ຂອງສີ່ປະເທດແມ່ນໍ້າຂອງຕອນເໜືອໃຫ້ສາມາດຮອງຮັບການຂົນສົ່ງສິນຄ້າ, ໂດຍສານ ແລະ ການທ່ອງທ່ຽວທາງນໍ້າ ໃຫ້ສາມາດເຊື່ອມໂຍງ-ເຊື່ອມຈອດ ກັບການຂົນສົ່ງຫຼາຍຮູບແບບ ທັງພາຍໃນ ແລະ ອະນຸພາກພື້ນ, ທັງເປັນສ່ວນສໍາຄັນ ໃນການພັດທະນາການຂົນສົ່ງທາງນໍ້າ ຂອງ ສປປ ລາວ, ປະກອບສ່ວນໃນວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການພັດທະນາເສດຖະກິດ-ສັງຄົມ ຂອງຊາດ.

ການພັດທະນາທ່າເຮືອສາກົນຊຽງກົກ, ເມືອງລອງ, ແຂວງຫຼວງນໍ້າທາ ຈະເປັນຜົນດີ ແລະ ທ່າແຮງ ສໍາຄັນໃນການຂົນສົ່ງສິນຄ້າ, ໂດຍສານ ແລະ ທ່ອງທ່ຽວທາງນໍ້າ ເພື່ອໃຫ້ສາມາດເຊື່ອມໂຍງ-ເຊື່ອມຈອດ ກັບການຂົນສົ່ງຫຼາຍຮູບແບບ ທັງພາຍໃນ ແລະ ອະນຸພາກພື້ນ, ເປັນຈູດເຕົ້າໂຮມ, ຄ່ຽນຖ່າຍ, ຫຸ້ມຫໍ່ ແລະ ເກັບມ້ຽນ ສິນຄ້າ ເຊື່ອມຈອດການຂົນສົ່ງທາງບົກ ເປັນຕົ້ນ ເສັ້ນທາງແຫ່ງຊາດ 17A, 17B , ຂົວມິດຕະພາບ ລາວ-ມຽນມາ ເຊື່ອມຈອດກັບທ່າບົກ ນາເຕີຍ, ແຂວງຫຼວງນໍ້າທາ ແລະ ທ່າບົກ ຫ້ວຍຊາຍ ແຂວງບໍ່ແກ້ວ.ໂຄງການດັ່ງກ່າວ ໄດ້ຮັບການສະໜັບສະໜູນ ຈາກລັດຖະບານ ສປປ ລາວ ໃນການດໍາເນີນໂຄງການພັດທະນາທ່າເຮືອສາກົນ ໂດຍເນັ້ນໃສ່ເຂດໂລຈິສະຕິກ, ເຂດການຄ້າ-ການບໍລິການ, ເຂດກະສິກໍາ ແລະ ການທ່ອງທ່ຽວ ໃຫ້ໄດ້ມາດຕະຖານສາກົນ ຢູ່ບ້ານຊຽງກົກ ແລະ ອີກ 11 ບ້ານໃກ້ຄຽງ, ເມືອງລອງ, ແຂວງ ຫຼວງນໍ້າທາກວມເນື້ອທີ່ທັງຫມົດປະມານ 44.260.311 ຕາແມັດ

(ຂ່າວ: ກິດຕາ, ພາບ: ເກດສະໜາ)