 |
ທ່ານ ນາງ ສູນທອນ ໄຊຍະຈັກ ກ່າວວ່າ: ການຈັດສໍາມະນາຄັ້ງນີ້ ເພື່ອຍົກລະດັບຄວາມຮູ້, ຄວາມສາມາດ ແລະ ຄວາມເຂົ້າໃຈພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ, ຍົກສູງຂີດຄວາມສາມາດໃຫ້ສະມາຊິກສະພາແຫ່ງຊາດ ໃນຖະນະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ, ທັງເປັນການສ້າງເງື່ອນໄຂໃຫ້ບັນດາທ່ານສະມາຊິກສະພາແຫ່ງຊາດ ໄດ້ມີໂອກາດແລກປ່ຽນຄໍາຄິດຄໍາເຫັນຊຶ່ງກັນ ແລະ ກັນ ຊຶ່ງກອງປະຊຸມ ຈະໄດ້ພ້ອມກັນແລກປ່ຽນບົດຮຽນໃນແຕ່ລະຫົວຂໍ້ຄື: ບົດບາດຂອງລັດຖະສະພາໃນການຄຸ້ມຄອງລັດດ້ວຍກົດໝາຍ; ຄວາມເຂົ້າໃຈກ່ຽວກັບ ບົດບາດຂອງສະມາຊິກລັດຖະສະພາ/ສະພາແຫ່ງຊາດ; ຈາກນະໂຍບາຍໄປສູ່ກົດໝາຍ ຂະບວນການນິຕິບັນຍັດໃນການຈັດຕັ້ງປະຕິບັດ; ຂະບວນການສ້າງກົດໝາຍໃນທາງປະຕິບັດ ສະພາບການລັດຖະສະພາ ຂອງ ສປປ ລາວ; ການຕິດຕາມກວດກາຂອງລັດຖະສະພາ ຮັບປະກັນຄວາມຮັບຜິດຊອບໃນການຈັດຕັ້ງປະຕິບັດ; ການຕິດຕາມກວດກາໃນ ສປປ ລາວ ເຄື່ອງມືຂະບວນການໃນການຈັດຕັ້ງປະຕິບັດ; ການນໍາໃຊ້ການຕິດຕາມກວດກາໃນການຈັດຕັ້ງປະຕິບັດເຄື່ອງມື, ສິ່ງທ້າທາຍ ແລະ ປະສົບການຈາກລັດຖະສະພາ; ການເປັນຕົວແທນ ແລະ ການປົກຄອງແບບມີສ່ວນຮ່ວມ; ການເປັນຕົວແທນ ແລະ ການປົກຄອງແບບມີສ່ວນຮ່ວມ; ການເປັນຕົວແທນແບບລວມສູນ ແລະ ກົນໄກທາງສະຖາບັນ; ການພົວພັນກັບລັດຖະສະພາສາກົນ ແລະ ການທູດລັດຖະສະພາ; ບຸລິມະສິດການພັດທະນາແຫ່ງຊາດ ແລະ ບົດບາດຂອງລະບົບສະພາ; ການເຊື່ອມໂຍງລະຫວ່າງ ເສດຖະກິດ, ສິ່ງແວດລ້ອມ ແລະ ການເງິນສາທາລະນະ; ການສົນທະນາທາງນະໂຍບາຍຕາມຫົວຂໍ້ ຊັບພະຍາກອນມະນຸດ ແລະ ການພັດທະນາສັງຄົມ; ການຈັດຕັ້ງປະຕິບັດ, ສະໜອງງົບປະມານ ແລະ ການຕິດຕາມກວດກາບຸລິມະສິດແຫ່ງຊາດ; ທັດສະນະໃນການລົງພົບປະປະຊາຊົນ (ຜູ້ມີສິດເລືອກຕັ້ງ); ທັດສະນະການປະກອບຄໍາເຫັນ ແລະ ຊັກຖາມໃນກອງປະຊຸມສະໄໝສາມັນຂອງສະພາ; ທັດສະນະການລົງຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ແຜນພັດທະນາເສດຖະກິດ-ສັງຄົມ.
ໃນຕອນທ້າຍ, ທ່ານ ນາງ ສູນທອນ ໄຊຍະຈັກ ຍັງໄດ້ຮຽກຮ້ອງໃຫ້ບັນດາສະມາຊິກສະພາແຫ່ງຊາດ ຊຸດທີ X ແລະ ພາກສ່ວນທີ່ກ່ຽວຂ້ອງທີ່ໄດ້ເຂົ້າຮ່ວມກອງປະຊຸມຄັ້ງນີ້ ຈົ່ງຍົກສູງຄວາມຮັບຜິດຊອບການເມືອງ, ສຸມໃສ່ຄົ້ນຄວ້າ, ແລກປ່ຽນບົດຮຽນ ທີ່ນໍາມາຖ່າຍທອດໃນຄັ້ງນີ້ ໃຫ້ຮັບຮູ້ເຂົ້າໃຈແຈ້ງ ແລະ ເລິກເຊິ່ງ ເພື່ອຮັບປະກັນການເຮັດໜ້າທີ່ການເມືອງຂອງຕົນໃຫ້ນັບມື້ດີຂຶ້ນກວ່າເກົ່າ ສົມກັບຄວາມໄວ້ວາງໃຈ ໃນຖານະເປັນຕົວແທນຂອງປະຊາຊົນ.
(ແຫຼ່ງຂ່າວ: ຂປລ)
ຄໍາເຫັນ