ສ້າງຄວາມເຂັ້ມແຂງວຽກງານຕ້ານການຄ້າມະນຸດ ໃຫ້ນາຍ ແລະ ພົນທະຫານ ກະຊວງປ້ອງກັນປະເທດ

ໃນວັນທີ 20 ກຸມພານີ້, ກົມທະຫານຊາຍແດນ ໄດ້ຈັດກອງປະຊຸມສຳມະນາ ສ້າງຄວາມເຂັ້ມແຂງວຽກງານຕ້ານການຄ້າມະນຸດ ໃຫ້ນາຍ ແລະ ພົນທະຫານ ກະຊວງປ້ອງກັນປະເທດ, ໂດຍການເປັນປະທານ ຂອງສະຫາຍ ພົນໂທ ຄໍາລຽງ ອຸທະໄກສອນຮອງລັດຖະມົນຕີກະຊວງປ້ອງກັນປະເທດຫົວໜ້າກົມໃຫຍ່ເສນາທິການກອງທັບຫົວໜ້າຄະນະຊີ້ນຳຄະນະກຳມະການຕ້ານການຄ້າມະນຸດກະຊວງປ້ອງກັນປະເທດ, ມີບັນດາກົມໃຫຍ່, ຫ້ອງວ່າການກະຊວງ, ຄະນະກຳມະການຊີ້ນໍາ, ກອງເລຂາຄະນະກຳມະການຕ້ານການຄ້າມະນຸດ ກະຊວງປ້ອງກັນປະເທດ,  ຫ້ອງການ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ສະຫາຍ ພັນເອກ ດາວໄກ ເລີດລິວັນ ຮອງຫົວໜ້າກົມທະຫານຊາຍແດນຫົວໜ້າກອງເລຂາ ຄະນະກຳມະການຕ້ານການຄ້າມະນຸດກະຊວງປ້ອງກັນປະເທດ, ໄດ້ຍົກໃຫ້ເຫັນການເຄື່ອນໄຫວປະຕິບັດໜ້າທີ່ວຽກງານໃນໄລຍະ 1 ປີ ຜ່ານມາ ຄະນະກຳມະການຕ້ານການຄ້າມະນຸດກະຊວງປ້ອງກັນປະເທດ ໄດ້ເອົາໃຈໃສ່ຈັດຕັ້ງເຄື່ອນໄຫວຕາມພາລະບົດບາດ ແລະ ໜ້າທີ່, ພ້ອມທັງຊີ້ນຳບັນດາກົມກອງເວົ້າລວມ, ເວົ້າສະເພາະແມ່ນກໍາລັງທ້ອງຖິ່ນເປັນເຈົ້າການໂຄສະນາ ເຜີຍແຜ່ຂໍ້ມູນຂ່າວສານຕ່າງໆກ່ຽວກັບຜົນຮ້າຍ ແລະ ວິທີການປ້ອງກັນ, ສະກັດກັ້ນການຄ້າມະນຸດ; ໃນນີ້, ໄດ້ເປີດກອງປະຊຸມສໍາມະນາສ້າງຄວາມເຂັ້ມແຂງວຽກງານຕ້ານການຄ້າມະນຸດໃຫ້ແກ່ນາຍ ແລະ ພົນທະຫານຢູ່ກອງບັນຊາການທະຫານແຂວງຄຳມ່ວນ, ແຂວງອຸດົມໄຊ ແລະ ແຂວງຫຼວງນໍ້າທາ; ພ້ອມກັນນັ້ນໂຄສະນາເຜີຍແຜ່ຂໍ້ມູນຂ່າວສານຕ່າງໆຜ່ານລາຍການປະຊາຮ່ວມໃຈຕ້ານໄພຄ້າມະນຸດທາງຄື້ນວິທະຍຸກະຈາຍສຽງ ກອງທັບປະຊາຊົນລາວ, ອອກອາກາດທັງໝົດໄດ້ 224 ຊົ່ວໂມງ, ລາຍການອອກ ອາກາດທັງໝົດ 231 ລາຍການ, ເປີດເພງຕ້ານການຄ້າມະນຸດ 975 ເທື່ອເພງ ແລະ ອ່ານຂ່າວວຽກງານຕ້ານການຄ້າມະນຸດ 278 ຂ່າວ ແລະ ເປັນເຈົ້າການຊີ້ນໍາກຳລັງທະຫານຊາຍແດນເອົາໃຈໃສ່ເພີ່ມທະວີເຄື່ອນໄຫວປ້ອງກັນຊາຍແດນ, ປະສານສົມທົບກັບພາກສ່ວນທີ່ກ່ຽວຂ້ອງໃນການສະກັດກັ້ນ ແລະ ປ້ອງກັນການເຂົ້າ-ອອກເມືອງທີ່ບໍ່ ຖືກຕ້ອງຕາມລະບຽບກົດໝາຍຢູ່ຂອບເຂດຮັບຜິດຊອບ ແລະ ບໍລິເວນດ່ານສາກົນທ້ອງຖິ່ນ, ໂຄສະນາເຜີຍແຜ່ຂໍ້ມູນຂ່າວສານກ່ຽວກັບວຽກງານຕ້ານ ການຄ້າມະນຸດໃຫ້ແກ່ພໍ່ແມ່ປະຊາຊົນ ຢູ່ຕາມບໍລິເວນຊາຍແດນ ໄປຄ່ຽງຄູ່ກັບການເຄື່ອນໄຫວວຽກງານ ວິຊາສະເພາະຂອງຕົນເອງ, ສ້າງແຜນການ ແລະ ຈັດຕັ້ງເຄື່ອນໄຫວ, ສ້າງກິດຈະກຳຕ່າງໆ ປະຈຳປີ 2023 ກ່ຽວກັບວຽກງານຕ້ານການຄ້າມະນຸດຂອງກະຊວງປ້ອງກັນປະເທດ ໃນການປະກອບສ່ວນຢ່າງຕັ້ງໜ້າໃນການຈັດຕັ້ງຜັນຂະຫຍາຍແຜນງານແຫ່ງຊາດວ່າດ້ວຍການສະກັດກັ້ນ ແລະ ຕ້ານການຄ້າມະນຸດໄລຍະທີ 3 (ແຕ່ປີ 2021-2025) ທີ່ຄະນະກໍາມະການຕ້ານການຄ້າມະນຸດລະດັບຊາດວາງອອກໄດ້ເປັນຢ່າງດີ, ໄດ້ປະສານສົມທົບ ແລະ ຊີ້ນຳຄະນະກຳມະການຕ້ານການຄ້າມະນຸດກອງບັນຊາການທະຫານແຂວງ ເຄື່ອນໄຫວວຽກງານຕ້ານການຄ້າມະນຸດຕາມສິດ, ໜ້າທີ່ພາລະບົດບາດ, ຄວາມຮັບຜິດຊອບຂອງຕົນ ແລະ ໄດ້ເຂົ້າຮ່ວມກອງປະຊຸມ ແລະ ກິດຈະກຳກ່ຽວກັບວຽກງານຕ້ານການຄ້າມະນຸດທັງພາຍໃນ ແລະ ກັບອົງການຈັດຕັ້ງລະຫວ່າງປະເທດ ທັງໝົດ 11 ຄັ້ງ ແລະ ເຂົ້າຮ່ວມກິດຈະກຳຕ່າງໆໃນລະດັບທ້ອງຖິ່ນ ໄດ້ເປັນຢ່າງດີ.
ໃນກອງປະຊຸມແຕ່ລະພາກສ່ວນຍັງໄດ້ຂຶ້ນລາຍງາານກ່ຽວກັບ ຜົນຮ້າຍຂອງການຄ້າມະນຸດ, ການປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍຈາກການຄ້າມະນຸດ, ກົດໝາຍ ແລະ ນິຕິກຳວ່າດ້ວຍການຕ້ານການຄ້າມະນຸດ ແລະ ການດຳເນີນຄະດີຕໍ່ຜູ້ກະທຳຜິດ ຈາກການຄ້າມະນຸດຕື່ມອີກ.
ໂອກາດນີ້, ສະຫາຍ ພົນໂທ ຄໍາລຽງ ອຸທະໄກສອນ ໄດ້ມີຄຳເຫັນໂອ້ລົມເນັ້ນໃຫ້ສືບຕໍ່ປະສານສົມທົບ ແລະ ຊີ້ນໍາຄະນະກຳມະການຕ້ານການຄ້າມະນຸດກອງບັນຊາການທະຫານແຂວງ ເຄື່ອນໄຫວວຽກງານຕ້ານການຄ້າມະນຸດ ຕາມສິດ, ໜ້າທີ່ພາລະບົດບາດ, ຄວາມຮັບຜິດຊອບຕອງຕົນ; ສືບຕໍ່ຊີ້ນໍາກໍາລັງທະຫານຊາຍແດນໃນຂອບເຂດທົ່ວປະເທດເພີ່ມທະວີການເຄື່ອນໄຫວກວດກາລາດຕະເວນຕາມຊາຍແດນ, ໂດຍສະເພາະແມ່ນຈຸດສຳຄັນ, ເຂດຫ່າງໄກສອກຫຼີກ ເພື່ອສະກັດກັ້ນຕ້ານການຄ້າມະນຸດໃຫ້ຫຼຸດໜ້ອຍຖອຍລົງ, ສືບຕໍ່ໂຄສະນາເຜີຍແຜ່ວຽກງານ ຕ້ານການຄ້າມະນຸດໃຫ້ແກ່ພໍ່ແມ່ປະຊາຊົນທີ່ດຳລົງຊີວິດຢູ່ຕາມໝູ່ບ້ານຊາຍແດນ ທີ່ນອນຢູ່ໃນເຂດ ຄວາມຮັບຜິດຊອບຂອງຕົນໃຫ້ທົ່ວເຖິງ ແລະ ສືບຕໍ່ປະສານກັບກອງເລຂາຕ້ານການຄ້າມະນຸດລະດັບຊາດ, ພາກສ່ວນທີ່ກ່ຽວຂ້ອງ ຈັດຕັ້ງປະຕິບັດວຽກງານຕ້ານການຄ້າມະນຸດໂດຍສະເພາະແມ່ນ ແຜນງານແຫ່ງຊາດ ໃຫ້ມີປະສິດທິຜົນສູງ.
ຂ່າວ-ພາບ: ບິກໄຊ ສົມພູ