ໃນການຈັດຕັ້ງປະຕິບັດວຽກງານ 3 ສ້າງ ຕາມມະຕິສະບັບເລກທີ 02/ສພຊ, ລົງວັນທີ 28 ມັງກອນ 2016 ຮ່ວມກັບກະຊວງ ແລະ ອົງການຂັ້ນສູນກາງ ໂດຍການເປັນປະທານຂອງທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ(ສພຊ); ມີຫົວໜ້າຫ້ອງວ່າການສູນກາງພັກ, ລັດຖະມົນຕີກະຊວງພາຍໃນ,ປະທານກໍາມາທິການບັນດາເຜົ່າ ພ້ອມດ້ວຍບັນດາທ່ານຮອງປະທານກໍາມາທິການສພຊ,ຮອງລັດຖະມົນຕີກະຊວງ ແລະ ອົງການທີ່ກ່ຽວຂ້ອງຂັ້ນສູນກາງ,ແຂກຖືກເຊີນເຂົ້າຮ່ວມ.
ທັງນີ້, ກໍເພື່ອກວດກາຄືນບັນດານິຕິກຳຂອງບັນດາກະຊວງ, ອົງການທີ່ກ່ຽວຂ້ອງກັບວຽກງານ 3 ສ້າງ ແລະ ນິຕິກຳກ່ຽວກັບການແບ່ງຂັ້ນຄຸ້ມຄອງໃນການຈັດຕັ້ງປະຕິບັດວຽກງານ 3 ສ້າງ ໃຫ້ມີຄວາມເອກະພາບຕາມທິດຊີ້ນຳ; ປຶກສາຫາລືຜົນການຕິດຕາມກວດກາຂອງຄະນະປະຈຳສະພາແຫ່ງຊາດຕໍ່ການຈັດຕັ້ງປະຕິບັດວຽກງານ 3 ສ້າງ ຮ່ວມກັບບັນດາກະຊວງ ແລະ ອົງການທີ່ກ່ຽວຂ້ອງ ທັງເປັນການກະກຽມຮ່າງບົດລາຍງານຂອງລັດຖະບານ ແລະ ບົດປະກອບຄຳເຫັນ ຂອງຄະນະປະຈຳສະພາແຫ່ງຊາດ ກ່ຽວກັບວຽກງານ 3 ສ້າງ ໄລຍະຜ່ານມາ ແລະ ທິດທາງແຜນການໃນປີ 2025ຕໍ່ກອງປະຊຸມສະໄໝສາມັນເທື່ອທີ 8 ຂອງສພຊຊຸດທີ IX.
ທ່ານ ພົທ. ສຸວອນ ເລືອງບຸນມີ ໄດ້ກ່າວວ່າ: ວຽກ 3ສ້າງແມ່ນການປະຕິວັດອັນເລິກເຊິ່ງເຖິງຖອງໃນເງື່ອນໄຂ
ໃໝ່,ສືບຕໍ່ບູລະນະລະບອບປະຊາທິປະໄຕປະຊາຊົນໃຫ້ສົມບູນຍິ່ງຂຶ້ນ, ສ້າງຄວາມເຂັ້ມແຂງໜັກແໜ້ນແຕ່ຮາກຖານ ຂຶ້ນມາ; ການຜັນຂະຫຍາຍວຽກງານ 3 ສ້າງແມ່ນການເພີ່ມສິດເປັນເຈົ້າໃຫ້ແກ່ທ້ອງຖິ່ນ-ຮາກຖານ, ແມ່ນການແບ່ງຂັ້ນຄຸ້ມຄອງລະຫວ່າງສູນກາງກັບທ້ອງຖິ່ນ (ແຂວງ, ເມືອງ, ບ້ານ) ໃຫ້ຈະແຈ້ງຂາດຕົວບົນພື້ນຖານເພີ່ມຄວາມຮັບຜິດຊອບ ຕິດພັນກັບການແບ່ງປັນຜົນປະໂຫຍດອັນສົມຄູ່ໃຫ້ແກ່ທ້ອງຖິ່ນ. ການສ້າງແຂວງໃຫ້ເປັນຫົວໜ່ວຍຍຸດທະສາດ ແມ່ນການສ້າງອົງຄະນະພັກແຂວງ ໃຫ້ເປັນແກ່ນສານນໍາພາທີ່ມີຄວາມສາມາດ ແລະ ເປັນກໍາລັງນໍາໜ້າໃນທຸກຂົງເຂດວຽກງານ ; ວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ວຽກງານ 3 ສ້າງ ເປັນບັນຫາພື້ນຖານຍຸດທະສາດສໍາຄັນຂອງພັກ, ຕັດແຍກອອກຈາກກັນບໍ່ໄດ້, ເປັນ3 ເສົາຄໍໍ້າຊຶ່ງກັນແລະກັນ.
ກອງປະຊຸມໄດ້ຟັງບົດລາຍງານກ່ຽວກັບການຈັດຕັ້ງປະຕິບັດວຽກງານ 3 ສ້າງ ຕາມມະຕິກອງປະຊຸມສະພາແຫ່ງຊາດ ສະບັບເລກທີ 02/ສພຊ, ລົງວັນທີ 28 ມັງກອນ 2016 ວ່າດ້ວຍການຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດເຮັດທົດລອງວຽກງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ; ບົດສັງລວມຜົນການຕິດຕາມກວດກາຂອງຄະນະປະຈຳສະພາແຫ່ງຊາດ ຕໍ່ການຈັດຕັ້ງປະຕິບັດວຽກງານ 3 ສ້າງ ຕາມມະຕິສະບັບເລກທີ 02/ສພຊ, ລົງວັນທີ 28 ມັງກອນ 2016; ລາຍງານຜົນການຈັດຕັ້ງປະຕິບັດວຽກງານ 3 ສ້າງໃນຄວາມຮັບຜິດຊອບຂອງບັນດາກະຊວງ ແລະ ອົງການທີ່ກ່ຽວຂ້ອງຂັ້ນສູນກາງພ້ອມນັ້ນ, ຍັງໄດ້ຮັບຟັງການມີຄຳເຫັນຈາກກຳມາທິການພາຍໃນສະພາແຫ່ງຊາດ ແລະ ບັນດາແຂກເຂົ້າຮ່ວມຕໍ່ກັບວຽກງານດັ່ງກ່າວ.
ບັນດາທ່ານຜູ້ແທນກອງປະຊຸມ ໄດ້ສຸມສະຕິປັນຍາເຂົ້າໃນການຄົ້ນຄວ້າ, ປະກອບຄຳເຫັນຢ່າງມີຈຸດສຸມ, ກະທັດຮັດ ແລະ ເລິກເຊິ່ງເພື່ອເປັນຂໍ້ມູນພື້ນຖານໃຫ້ຄະນະປະຈໍາສະພາແຫ່ງຊາດ ນຳໄປຄົ້ນຄວ້າ, ວິເຄາະ, ວິໄຈ, ຕີລາຄາຜົນສໍາເລັດ, ດ້ານດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໃຫ້ຄົບຖ້ວນ, ຖືກຕ້ອງກັບສະພາວະຄວາມເປັນຈິງ, ສາມາດນຳເຂົ້າພິຈາລະນາ ແລະ ອອກມະຕິຮັບຮອງໃນກອງປະຊຸມສະໄໝສາມັນເທື່ອທີ 8 ຂອງສພຊຊຸດທີ IX ເພື່ອເປັນບ່ອນອີງໃນການຈັດຕັ້ງປະຕິບັດໃນຕໍ່ໜ້າໃຫ້ມີໝາກຜົນສູງຂຶ້ນ ແລະ ພົ້ນເດັ່ນກວ່າເກົ່າ ປະກອບສ່ວນໃຫ້ປະເທດຊາດມີສະຖຽນລະພາບ-ໝັ້ນຄົງ, ຫັນວຽກງານຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ປະຊາຊົນມີຊີວິດການເປັນຢູ່ທີ່ດີຂຶ້ນ.
(ຂ່າວ-ພາບ: ນາງ ກຸກກິກ ບຸດດາໄຊ)
ຄໍາເຫັນ