ສານປະຊາຊົນສູງສຸດ ແລະ ອົງການກວດກາແຫ່ງລັດ ເຊັນບົດບັນທຶກການປະສານງານ

ເພື່ອຈັດຕັ້ງຜັນຂະຫຍາຍກົດໝາຍວ່າດ້ວຍສານປະຊາຊົນ,ກົດໝາຍວ່າດ້ວຍການກວດກາລັດ ແລະ ລັດຖະບັນຍັດ ຂອງປະທານປະເທດ ວ່າດ້ວຍການດຳເນີນຄະດີປົກຄອງ ໃຫ້ເປັນອັນລະອຽດ ແລະ ຍົກສູງຄຸນນະພາບ ໃນການຈັດຕັ້ງປະຕິບັດວຽກງານປະສານງານ ລະຫວ່າງ ສານປະຊາຊົນ ແລະ ອົງການກວດກາລັດ ໄດ້ເຄື່ອນໄຫວຕາມພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບ ໃນການແກ້ໄຂຄະດີທາງປົກຄອງ ຫຼື ບໍລິຫານ ແລະ ຄະດີອື່ນໆ ໃຫ້ມີຄວາມສັກສິດ,ເຂັ້ມງວດ, ແລະ ຍຸຕິທຳ.ດັ່ງນັ້ນ, ສານປະຊາຊົນສູງສຸດ ແລະ ອົງການກວດກາແຫ່ງລັດ ຈຶ່ງໄດ້ເຫັນດີເປັນເອກະພາບສ້າງບົດບັນທຶກປະສານງານຮ່ວມກັນ.ພິທີເຊັນບົດບັນທຶກ ໄດ້ຈັດຂຶ້ນໃນວັນທີ 11 ມີນາ ນີ້ ທີ່ສານປະຊາຊົນສູງສຸດ,ຮ່ວມລົງນາມລະຫວ່າງ ທ່ານ ວິໄລວັນ ບຸດດາຄຳ ຮອງປະທານອົງການກວດກາແຫ່ງລັດແລະ ທ່ານ ອານົງ ຍອຍສາຍຄຳ ຮອງປະທານສານປະຊາຊົນສູງສຸດ,ໂດຍມີທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງ ຂັ້ນສູນກາງ, ທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານປະຊາຊົນສູງສຸດ ພ້ອມດ້ວຍພະນັກງານທັງສອງຝ່າຍເຂົ້າຮ່ວມເປັນສັກຂີພິຍານ.
  ໃນການເຊັນບົດບັນທຶກສະບັບນີ້:ລວມມີ 3 ໝວດ ແລະ 11 ມາດຕາ. ຫຼັກການປະສານງານມີ: 1. ປະຕິບັດຕາມພາລະບົດບາດ,ໜ້າທີ່ ແລະ ຂອບເຂດສິດ ທີ່ໄດ້ກຳນົດໄວ້ ແລະ ນິຕິກຳໃຕ້ກົດໝາຍ ຂອງສານປະຊາຊົນ ແລະ ອົງການກວດກາລັດ; 2.  ຮັບປະກັນຄວາມເປັນເອກະລາດ ໃນການເຄື່ອນໄຫວວຽກງານວິຊາສະເພາະຂອງສານປະຊາຊົນ ແລະ ອົງການກວດກາລັດ;3. ສະໜອງຂໍ້ມູນ ແລະ ຫຼັກຖານ ຂອງເປົ້າໝາຍຖືກກວດກາ ທີ່ລະເມີດກົດໝາຍຈາກຜົນກວດກາ; 4. ປະສານສົມທົບ ເພື່ອເຮັດໃຫ້ການເກັບກຳຂໍ້ມູນ ແລະ ຫຼັກຖານ ໃຫ້ມີຄວາມຖືກຕ້ອງ,ຊັດເຈນ,ຄົບຖ້ວນ, ພາວະວິໄສ ຮັບປະກັນການດຳເນີນຄະດີ ຕໍ່ເປົ້າໝາຍຖືກກວດກາທີ່ລະເມີດກົດໝາຍ ຕາມຜົນຂອງການກວດກາໃຫ້ມີຄວາມຍຸຕິທຳ ແລະ ໂປ່ງໃສ;5. ມີການປະຊຸມ ປຶກສາຫາລື ສະຫຼຸບລາຍງານ ແລະ ຖອດຖອນບົດຮຽນ ຮ່ວມມກັນເປັນປົກກະຕິ.
(ຂ່າວ-ພາບ:ອານຸພົນ)