ສະພາທິດສະດີສູນກາງພັກ ສະຫຼຸບການເຄື່ອນໄຫວວຽກງານ ປະຈຳປີ 

ກອງປະຊຸມສະຫຼຸບການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການປີ 2024 ຂອງສະພາທິດສະດີສູນກາງພັກ ໄດ້ຈັດຂຶ້ນໃນວັນທີ 20 ກຸມພາ ນີ້ ທີ່ນະຄອນຫຼວງວຽງຈັນ ໂດຍການເປັນປະທານຂອງ ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ; ມີບັນດາສະຫາຍຄະນະປະຈຳສະພາທິດສະດີສູນກາງພັກ, ສະມາຊິກສະພາທິດສະດີສູນກາງພັກ ແລະ ພະນັກງານຫຼັກແຫຼ່ງຫ້ອງການສະພາທິດສະດີສູນກາງພັກ ເຂົ້າຮ່ວມ.
ສະຫາຍ ຄຳມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາງພັກ ຮອງປະທານຜູ້ປະຈຳການສະພາທິດສະດີສູນກາງພັກ ໄດ້ຂຶ້ນຜ່ານບົດສະຫຼຸບຕີລາຄາການຈັດຕັ້ງເຄື່ອນໄຫວ ຂອງສະພາທິດສະດີສູນກາງພັກ ປະຈໍາປີ 2023 ແລະ ທິດທາງແຜນການປີ 2024 ໂດຍຍົກໃຫ້ເຫັນບັນດາຜົນງານທີ່ຍາດມາໄດ້ໃນຫຼາຍດ້ານ ຕະຫຼອດໄລຍະ 1 ປີຜ່ານມາ ເປັນຕົ້ນ: ວຽກງານຮັບຮອງຫົວຂໍ້ຄົ້ນຄວ້າ ແລະ ຜົນການຄົ້ນຄວ້າທິດສະດີ ແລະ ພຶດຕິກຳໃນປີ 2023 ຊຶ່ງສາມາດຮັບຮອງເອົາຫົວຂໍ້ຄົ້ນຄວ້າໃຫຍ່ ແລະ ຫົວຂໍ້ຍ່ອຍ ຂອງກອງປະຊຼຸມສໍາມະນາທິດສະດີສອງພັກ  ລາວ-ຫວຽດນາມ ຄັັ້ງທີ X; ກອງປະຊຼຸມສໍາມະນາທິດສະດີ ສອງພັກ ລາວ-ຈີນ ຄັັ້ງທີ XI; ກອງປະຊຼຸມສໍາມະນາທິດສະດີ ສອງພັກ ລາວ-ກູບາ ຄັ້ງທີ I ແລະ ຮັບຮອງເອົາຫົວຂໍ້ສຳມະນາທິດສະດີສອງພັກ ລາວ-ກູບາ ຄັ້ງທີ II; ສາມາດຮັບຮອງເອົາຜົນ ຂອງການຄົ້ນຄວ້າໂຄງການລະດັບຊາດ 1 ໂຄງການ; ມີ 3 ໂຄງການກໍາລັງຈະຮັບຮອງເອົາເນື້ອໃນຜົນຂອງການຄົ້ນຄວ້າ ແລະ 5 ໂຄງການກຳລັງສືບຕໍ່ປັບປຸງເນື້ອໃນ. ພ້ອມດຽວກັນນັ້ນ, ກໍໄດ້ສຳເລັດການປັບປຸງດ້ານເນື້ອໃນການຄົ້ນຄວ້າ ແລະສະຫຼຸບກ່ຽວກັບການສ້າງປະຖົມປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມ ຢູ່ລາວ ຊຶ່ງໄດ້ສຳເລັດ ສະບັບທີ 7 ແລະ ຜ່ານກອງປະຊຸມຄົບຄະນະສູນກາງພັກ ຄັ້ງທີ 6 ສະໄໝທີ XI ແລະ ກອງປະຊຸມກົມການເມືອງ; ສຳເລັດການດຳເນີນກອງປະຊຸມລະດັບຕ່າງໆ ໃນການຄົ້ນຄວ້າກ່ຽວກັບການສ້າງຮ່າງໂຄງການການເມືອງຂອງພັກ, ໄດ້ປັບປຸງດ້ານເນື້ອໃນ ແລະ ໄດ້ແຕ່ງຕັ້ງຄະນະຮັບຜິດຊອບແຕ່ລະຫົວຂໍ້ ແລະ ສຳເລັດການໄປແລກປ່ຽນບົດຮຽນຢູ່ ສສ ຫວຽດນາມ, ໄດ້ປັບປຸງ ແລະສ້າງຮ່າງ ສະບັບທີ 3 ແລະ ສົ່ງໃຫ້ກົມການເມືອງສູນກາງພັກ ເພື່ອປະກອບຄຳເຫັນ; ສຳເລັດການກະກຽມສ້າງຮ່າງຂໍ້ຕົກລົງຄະນະຮັບຜິດຊອບສະຫຼຸບ 40 ປີ ແຫ່ງການປ່ຽນແປງໃໝ່ ຢູ່ ສປປ ລາວ ແລະ ສົ່ງໃຫ້ຄະນະເລຂາທິການສູນກາງພັກ ເພື່ອມີຄຳເຫັນ; ສຳເລັດການດຳເນີນກອງປະຊຸມ ເພື່ອປະກອບຄຳເຫັນໃສ່ບົດຄົ້ນຄວ້າຮັບຮອງຜົນການຄົ້ນຄວ້າແນວຄິດໄກສອນ ພົມວິຫານ 6 ຂົງເຂດ ພ້ອມດຽວກັນນັ້ນ ກໍສຳເລັດການປັບປຸງດ້ານກົງຈັກການຈັດຕັ້ງ, ການສັບຊ້ອນ-ຈັດວາງສະມາຊິກສະພາທິດສະດີສູນກາງພັກ ເຂົ້າໃນແຕ່ລະຄະນະກຳມະການ, ເຮັດໃຫ້ສະພາບລວມ ຂອງກົງຈັກການຈັດຕັ້ງ ແລະບຸກຄະລາກອນຢ່າງເປັນລະບົບຄົບຊຸດ.
ຈາກນັ້ນ, ບັນດາສະຫາຍທີ່ເຂົ້າຮ່ວມກອງປະຊຸມ ກໍໄດ້ພ້ອມກັນປະກອບຄໍາຄິດຄໍາເຫັນ ຕໍ່ກັບບົດສະຫຼຸບການເຄື່ອນໄຫວວຽກງານ ປະຈຳປີ 2023  ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2024 ພ້ອມທັງໄດ້ຮັບຮອງເອົາແຜນການດັ່ງກ່າວ ເພືີ່ອພ້ອມກັນຈັດຕັັ້ງປະຕິບັດໃຫ້ບັນລຸຜົນສໍາເລັດ ຕາມຄາດໝາຍກໍານົດໄວ້.
ສະຫາຍ ຄຳພັນ ເຜີຍຍະວົງ ກໍໄດ້ໂອ້ລົມຕໍ່ກອງປະຊຸມ ເພື່ອເປັນທິດທາງໃນການສືບຕໍ່ປັບປຸງ ແລະ ຈັດຕັັ້ງປະຕິບັດວຽກງານຂອງສະພາທິດສະດີສູນກາງພັກໃນຕໍ່ໜ້າ ກໍຄືແຜນການປີ 2024 ໂດຍສະຫາຍໄດ້ກ່າວສະແດງຄວາມຊົມເຊີຍ ແລະ ເຫັນດີເປັນເອກະພາບ ຕໍ່ກັບບັນດາຜົນສໍາເລັດ, ຜົນງານໃນດ້ານຕ່າງໆ ທີ່ສະພາທິດສະດີສູນກາງພັກຍາດມາໄດ້ ພ້ອມທັງເນັ້ນໜັກ ຄະນະປະຈໍາ ແລະ ບັນດາສະຫາຍສະມາຊິກສະພາທິດສະດີສູນກາງພັກ ສືບຕໍ່ເອົາໃຈໃສ່ບາງວຽກງານຄື:
1). ໃຫ້ສືບຕໍ່ການເສີມຂະຫຍາຍຜົນສຳເລັດ ທີ່ຍາດມາໄດ້ໃນໄລຍະຜ່ານມາ ໃຫ້ນັບມື້ນັບດີຂຶ້ນ ແລະ ມີການພັດທະນາຢ່າງບໍ່ຢຸດຢັ້ງ ເພື່ອເປັນເຈົ້າການປະກອບສ່ວນເຂົ້າໃນການປັບປງ, ບູລະນະແນວທາງການເມືອງຂອງພັກເຮົາ ໃຫ້ນັບມື້ນັບສົມບູນຂຶ້ນເລື້ອຍໆ, ມີອັນໃໝ່ຂຶ້ນເລື້ອຍໆ ທັງເປັນຄັງທິດສະດີຂອງພັກເຮົາ; ນອກນັ້ນ, ກໍເປັນເຈົ້າການຕື່ມໃນການໃຫ້ຄໍາປຶກສາ ເປັນເສນາທິການໃຫ້ແກ່ກົມການເມືອງ, ຄະນະເລຂາທິການສູນກາງພັກ, ກຳມະການສູນກາງພັກ ໃຫ້ໄດ້ແຂງແຮງດີຂຶ້ນ ຊຶ່ງຕ້ອງໄດ້ຄົ້ນຄວ້າ ແລະ ລົງເລິກບັນຫາ ຢ່າງຈະແຈ້ງຂຶ້ນຕື່ມ ເປັນຕົ້ນບັນດາດ້ານເສດຖະກິດ, ສະພາບການຂອງໂລກ..., ສະໜອງບັນດາເອກະສານທີ່ມີລັກສະນະວິທະຍາສາດ ແກ່ສູນກາງພັກໃຫ້ມີປະສິດທິຜົນ;
2). ສຸມໃສ່ຈັດຕັ້ງປະຕິບັດບັນດາພາລະບົດບາດ, ໜ້າທີ່ຂອງສະພາທິດສະດີ ກໍຄືຂອງແຕ່ລະສະຫາຍສະມາຊິກສະພາທິດສະດີ ໃຫ້ດີທີ່ສຸດ ໂດຍສະເພາະການຄົ້ນຄວ້າທິດສະດີ ແລະ ສະຫຼຸບພຶດຕິກຳຕ່າງໆ, ເອົາໃຈໃສ່ເຊີດຊູຄວາມຮັບຜິດຊອບ, ເປັນເຈົ້າການ ແລະ ເສີມສະຕິປັນຍາຂອງຕົນ ເຂົ້າໃນການດໍາເນີນວຽກງານຕ່າງໆ ທີ່ຂັ້ນເທິງມອບໝາຍໃຫ້ສໍາເລັດຜົນ ຢ່າງມີປະສິດທິພາບກວ່າເກົ່າ;
3). ປະສານສົມທົບກັບບັນດາກະຊວງ, ອົງການ ແລະ ຂະແໜງການຕ່າງໆ ສືບຕໍ່ຜ່ານບົດຂອງບັນດາຫົວຂໍ້ຕ່າງໆ ໃນການສຳມະນາລະດັບຊາດ ເພື່ອເຮັດ ແລະ ປັບປຸງໃຫ້ສຳເລັດ ໃຫ້ຈົບບັນດາຫົວຂໍ້ທີ່ກຳລັງຄົ້ນຄ້ວາ; ພ້ອມກັນນັ້ນ, ກໍກະກຽມກ່ຽວກັບຫົວຂໍ້ໃຫຍ່ ສະເໜີກົມການເມືອງຮັບຮອງ ຊຶ່ງຈະໄດ້ພ້ອມກັນຄົ້ນຄວ້າ, ສຳມະນາ ເລິກເຊິ່ງຄັກແນ່ຕື່ມອີກ ໂດຍສະເພາະອັນທີ່ຕິດພັນກັບໂຄງການການເມືອງ.
4). ສືບຕໍໍ່ປັບປຸງກົງຈັກການຈັດຕັ້ງ ຕິດພັນກັບການຫັນເປັນທັນສະໄໝ ຊຶ່ງບັນຫາທີໜຶ່ງ ກໍແມ່ນກ່ຽວກັບການປັບປຸງບຸກຄະລາກອນ ການປະກອບບັນດາຄະນະກຳມະການ ລວມທັງພາລະບົດບາດ, ສິດ, ໜ້າທີ່ ເພື່ອຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງ. ນອກຈາກນັ້ນ, ກໍຄົ້ນຄວ້າປະກອບພະນັກງານຕື່ມໃນໂຄງປະກອບການຈັດຕັ້ງຂອງຫ້ອງການສະພາທິດສະດີ ເພື່ອເປັນເສນາທິການຊ່ວຍແຕ່ລະຄະນະໜ່ວຍງານ ຫຼື ແຕ່ລະຄະນະກຳມະການຢ່າງເປັນລະບົບ;
5). ສຸມໃສ່ໃຫ້ສຳເລັດບັນດາວຽກງານຈຸດສຸມ 2024 ເປັນຕົ້ນໂຄງການການເມືອງ, ຮ່າງສະຫຼຸບ 40 ປີແຫ່ງການປ່ຽນແປງໃໝ່, ບົດລາຍງານການເມືອງ.... ການຜັນຂະຫຍາຍບັນດາເນື້ອໃນທີ່ໄດ້ຈັດສຳມະນາກັບ ສສ ຫວຽດນາມ, ກັບ ສປ ຈີນ ແລະ ກູບາ ເພື່ອກະກຽມຈັດສຳມະນາຢູ່ບັນດາກະຊວງ, ອົງການ ແລະ ທ້ອງຖິ່ນ ຕິດພັນກັບພາລະບົດບາດຂອງສະພາທິດສະດີ, ຕິດພັນກັບວຽກຕົວຈິງ ເພື່ອນໍາໄປເຜີຍແຜ່ໃຫ້ເປົ້າໝາຍຕ່າງໆຮັບຮູ້ຢ່າງທົ່ວເຖິງ ແລະ ເສີມຂະຫຍາຍການຮ່ວມມືກັບບັນດາປະເທດເພື່ອນມິດຍຸດທະສາດ, ເພື່ອນມິດຮ່ວມອຸດົມການ ເພື່ອຮ່ວມມືໃນຂົງເຂດທິດສະດີ; ພ້ອມນີ້, ກໍຍັງມີບາງວຽກງານທີ່ສຳຄັນອື່ນໆອີກ. 
(ຂ່າວ-ພາບ: ສຸກສະຫວັນ)