ສະຖານທູດລາວ ປະຈຳຟີລິບປິນມອບໃບຍ້ອງຍໍໃຫ້ແກ່ກົງສູນກິດຕິມະສັກ

ເມື່ອບໍ່ດົນມານີ້, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳຟີລິບປິນ,ໄດ້ຈັດພິທີມອບໃບຍ້ອງຍໍຂັ້ນກະຊວງການຕ່າງປະເທດ ໃຫ້ແກ່ ທ່ານ ໂຈເຊັບ ກຸຍ ຊີ (Joseph Cue Sy), ກົງສູນກິດຕິມະສັກ ແຫ່ງ ສປປ ລາວ ປະຈໍາ ດາວາວຟີລິບປິນ.
ທ່ານ ສອນໄຊ ວັນນະໄຊເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ຟີລິບປິນ ໄດ້ຕາງໜ້າໃຫ້ແກ່ຄະນະນໍາກະຊວງການຕ່າງປະເທດ ມອບໃບຍ້ອງຍໍໃຫ້ກົງສູນກິດຕິມະສັກ ແຫ່ງ ສປປ ລາວ ປະຈໍາ ດາວາວ.
ການມອບໃບຍ້ອງຍໍດັ່ງກ່າວໃຫ້ແກ່ກົງສູນກິດຕິມະສັກ ແຫ່ງ ສປປ ລາວ ປະຈໍາ ດາວາວຟີລິບປິນ ຄັ້ງນີ້ ແມ່ນສ່ອງແສງໃຫ້ເຫັນເຖິງຜົນງານອັນພົ້ນເດັ່ນຂອງກົງສູນກິດຕິມະສັກລາວ ທີ່ໄດ້ປະກອບສ່ວນຢ່າງຕັ້ງໜ້າເປັນປະໂຫຍດໃຫ້ແກ່ ສະຖານທູດລາວປະຈໍາຟີລິບປິນ ກໍຄື ສປປ ລາວ ເປັນຕົ້ນໄດ້ເອົາໃຈໃສ່ໃນການໂຄສະນະເຜີຍແຜ່ຂໍ້ມູນຂ່າວສານ ກ່ຽວກັບ ສປປ ລາວ ທາງດ້ານການຄ້າ, ການລົງທຶນ ແລະ ການທ່ອງທ່ຽວຜ່ານທາງເວັບໄຊ. ພ້ອມດຽວກັນນີ້, ຍັງໄດ້ຊຸກຍູ້ສົ່ງເສີມ ແລະ ຂົນຂວາຍການລົງທຶນ ແລະ ນັກທ່ອງທ່ຽວ ຟີລິບປິນ ມາລົງທຶນ ແລະ ທ່ອງທ່ຽວ ຢູ່ ສປປ ລາວ ໃຫ້ນັບມື້ນັບຫຼາຍຂຶ້ນ ແລະ ໄດ້ປະກອບສ່ວນມອບອຸປະກອນຮັບໃຊ້ວຽກງານຫ້ອງການໃຫ້ສະຖານທູດເປັນຕົ້ນເຄື່ອງຄອມພິວເຕີແລັບທອບຈຳນວນໜຶ່ງ, ຈັດກິດຈະກຳກິລາກັອຟ ຊີງຂັນທ່ານເອກອັກຄະລັດຖະທູດ ແລະ ກິດຈະກຳອື່ນໆ ເພື່ອຖືໂອກາດໂຄສະນາໃຫ້ພາກທຸລະກິດ ໄດ້ຮູ້ກ່ຽວກັບລາວຫຼາຍຂຶ້ນ.
ທ່ານ ສອນໄຊ ວັນນະໄຊ ຍັງໄດ້ສະແດງຄວາມຍ້ອງຍໍຊົມເຊີຍ ທ່ານ ໂຈເຊັບ ກຸຍ ຊີຕໍ່ກັບການປະສອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນ ລະຫວ່າງ ລາວ ແລະ ຟີລິບປິນໃນໄລຍະຜ່ານມາ ແລະ ສືບຕໍ່ປະກອບສ່ວນວຽກງານດັ່ງກ່າວຕໍ່ໄປໃຫ້ຫຼາຍຂຶ້ນເລື່ອຍໆ.
ຂ່າວ-ພາບ: ທູດລາວປະຈຳຟີລິບປິນ