 |
ໃນຕອນກາງເວັນ, ມີການແຂ່ງຂັນກິລາກັອຟມິດຕະພາບຄັ້ງທີ 13 ຈັດໂດຍສະມາຄົມກັອຟລາວດີຊີ (LGADC) ແລະ ການແຂ່ງຂັນກິລາບານເຕະມິດຕະພາບ ຈັດໂດຍ ສະຫະພັນກິລາບານເຕະລາວອາເມຣິກາເໜືອ (NALSF), ຕອນແລງມີງານລາຕີສະໂມສອນສະເຫຼີມສະຫຼອງປີໃໝ່ລາວທີ່ຫ້ອງຈັດງານລ້ຽງຮັບຮອງArlington-Fairfax Elks Lodge ລັດເວີຈີເນຍ, ໂດຍໃຫ້ກຽດເຂົ້າຮ່ວມຂອງ ທ່ານ ພູໂຂງ ສີສຸລາດ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳສະຫະລັດ ອາເມຣິກາ ແລະ ການາດາ, ທ່ານ ທອງຜ່ານ ສະຫວັນເພັດ ເອກອັກຄະລັດຖະທູດ ຜູ້ຕາງໜ້າຖາວອນແຫ່ງ ສປປ ລາວ ປະຈຳອົງການສະຫະປະຊາຊາດ (ສປຊ), ແຂກຜູ້ມີກຽດ, ກຳມະການສູນກາງແນວລາວສ້າງຊາດປະຈໍາສະຫະລັດ ອາເມຣິກາ, ປະທານສະມາຄົມຮັກບ້ານເກີດ ພ້ອມຄະນະ, ປະທານສະມາຄົມຕ່າງໆຂອງຄົນເຊື້ອຊາດລາວ, ອົງການ Legacies of War, ຜູ້ຊົງຄຸນວຸດທິ, ພີ່ນ້ອງຄົນເຊື້ອຊາດລາວທີ່ເດີນທາງມາຈາກບັນດາລັດໃນອາເມຣິກາ ແລະ ຈາກການາດາ ລວມທັງກິລາກັອຟ, ນັກກິລາບານເຕະ, ພະນັກງານສະຖານທູດ ສປປ ລາວ ທີ່ວໍຊິງຕັນ ດີ.ຊີ ແລະ ສຳນັກງານຜູ້ຕາງໜ້າຖາວອນແຫ່ງ ສປປ ລາວ ປະຈຳອົງການ ສປຊ, ລວມປະມານ 450 ຄົນ.
ງານສະເຫຼີມສະຫຼອງປີໃໝ່ (Pi Mai) ແມ່ນງານບຸນປະເພນີອັນດີງາມຂອງລາວທີ່ສືບທອດກັນມາແຕ່ບູ ຮານນະການໃນແຕ່ລະຍຸກແຕ່ລະສະໄໝຈົນມາຮອດປັດຈຸບັນ, ເປັນເທດສະການທີ່ຈັດຂຶ້ນໃນແຕ່ລະປີຂອງປະຊາ ຊົນລາວຢູ່ພາຍໃນປະເທດ ແລະ ຊາວລາວຢູ່ຕ່າງປະເທດລວມທັງຊຸມຊົນຄົນເຊື້ອຊາດລາວຢູ່ອາເມຣິກາ ແລະ ການາດາ. ໃນປັດຈຸບັນລັດຖະບານລາວພວມຫ້າງຫາກະກຽມໃນການສະເໜີຕໍ່ອົງການອຸຍແນັສໂກ (UNESCO) ເພື່ອພິຈາລະນາຮັບຮອງບຸນປີໃໝ່ລາວ (Pi Mai) ເປັນມໍລະດົກໂລກໃນອະນາຄົດ. ງານສະເຫຼີມສະຫຼອງປີໃໝ່ລາວນອກຈາກສືບສານຮີດຄອງປະເພນີ ແລະ ວັດທະນະທໍາອັນດີງາມຂອງລາວແລ້ວ, ຍັງເຕົ້າໂຮມຄວາມສາມັກ ຄີຂອງຄົນເຊື້ອຊາດລາວບັນດາເຜົ່າຢູ່ບັນດາລັດໃນອາເມຣິກາ ແລະ ການາດາ ທີ່ໄດ້ມາພົບພໍ້ກັນ, ຢື້ຢາມຖາມຂ່າວ, ອວຍພອນປີໃໝ່ຊຶ່ງກັນ ແລະ ກັນດ້ວຍບັນຍາກາດແຫ່ງໄມຕີຈິດມິດຕະພາບ, ຄວາມຮັກແພງສາມັກຄີ, ໂອບອ້ອມອາລີ, ເຄົາລົບນັບຖື ແລະ ໃຫ້ກຽດກັນ ຊຶ່ງເປັນມໍລະດົກອັນລໍ້າຄ່າຂອງຄົນລາວທີ່ຕົກທອດມາແຕ່ໃດໆເຖິງວ່າຈະຢູ່ແຫ່ງຫົນໃດກໍຕາມ. ບຸນປີໃໝ່ລາວ ເປັນເລີກງາມຍາມດີເປັນສິລິມົງຄຸນເພື່ອອວຍພອນຊຶ່ງກັນ ແລະ ກັນຂອງຊາວລາວ ແລະ ເພື່ອນມິດໃຫ້ມີສຸຂະພາບເຂັ້ມແຂງ, ສະສາງລ້າງຊ່ວຍສິ່ງບໍ່ດີບໍ່ງາມອອກໄປນໍາປີເກົ່າ, ຕ້ອນຮັບສິ່ງດີໆເຂົ້າມາໃນຊີວິດ, ຮັບໂຊກຮັບໄຊ, ມີຜົນສໍາເລັດໃໝ່ໃນໜ້າທີ່ວຽກງານ, ໃນການດໍາເນີນທຸລະກິດ, ຄ້າຂາຍ, ກິດຈະການສ່ວນຕົວກໍຄືໃນການດໍາລົງຊີວິດທີ່ເຕັມໄປດ້ວຍຄວາມຜາສຸກ, ຈະເລີນວັດທະນາຕະຫຼອດປີ ໃໝ່ ແລະ ປີຕໍ່ໆໄປ.
 |
ໃນໂອກາດອັນສະຫງ່າລາສີນີ້, ທ່ານ ພູໂຂງ ສີສຸລາດ ໄດ້ກ່າວສະແດງຄວາມຕ້ອນຮັບອັນອົບອຸ່ນ ແລະອວຍພອນປີໃໝ່ໃຫ້ພີ່ນ້ອງຄົນເຊື້ອຊາດລາວ ແລະ ແຂກຜູ້ມີກຽດທີ່ມາຮ່ວມໃນງານສະເຫຼີມສະຫຼອງປີໃໝ່ລາວໃນຄັ້ງນີ້ພ້ອມທັງໄດ້ສົ່ງຄໍາອວຍພອນປີໃໝ່ລາວແດ່ພີ່ນ້ອງເຊື້ອຊາດລາວທຸກຄົນໃນອາເມຣິກາ ແລະ ການາດາທີ່ບໍ່ໄດ້ມາຮ່ວມງານດັ່ງກ່າວ. ທ່ານເອກອັກຄະລັດຖະທູດລາວ ຍັງໄດ້ຍົກໃຫ້ເຫັນເຖິງການເຄື່ອນໄຫວຕະຫຼອດໜຶ່ງປີຜ່ານມາຂອງສະຖານທູດໃນການເຮັດໜ້າທີ່ສົ່ງເສີມ ແລະ ເສີມຂະຫຍາຍສາຍພົວພັນມິດຕະພາບ ແລະ ຮ່ວມມືສອງຝ່າຍລາວ - ອາເມຣິກາ, ລາວ - ການາດາ ກໍຄືການເຄື່ອນໄຫວການທູດທາງດ້ານການເມືອງ, ເສດຖະກິດ, ວັດທະນະທໍາ ແລະ ການທູດປະຊາຊົນ ໂດຍສະເພາະການພົວພັນກັບພີ່ນ້ອງຄົນເຊື້ອຊາດລາວຢູ່ອາເມຣິກາ ແລະ ການາດາ. ທ່ານເອກອັກຄະລັດຖະທູດໄດ້ສະແດງຄວາມຂອບໃຈຕໍ່ທຸກໆທ່ານທີ່ເສຍສະຫຼະເວລາອັນມີຄ່າມາຮ່ວມງານສະເຫຼີມສະຫຼອງປີໃໝ່ນີ້ ກໍຄືໃນການແຂ່ງຂັນກິລາກັອຟ ແລະ ກິລາບານເຕະມິດຕະພາບ, ຕີລາຄາສູງຕໍ່ບຸກຄົນແລະ ອົງການຈັດຕັ້ງທີ່ໄດ້ໃຫ້ການສະໜັບສະໜູນ ແລະ ອຸປະຖໍາ ຈົນເຮັດໃຫ້ການສະເຫຼີມສະຫຼອງປີ ໃໝ່ລາວຄັ້ງນີ້ດ້ວຍບັນຍາກາດເບີກບານມ່ວນຊື່ນ, ມີຄວາມຫມາຍຄວາມສໍາຄັນໃນການສືບສານ ແລະ ອະນຸລັກຮັກສາຮີດຄອງປະເພນີອັນດີງາມຂອງລາວໃຫ້ຍືນຍົງຄົງຢູ່ຄູ່ກັບຄົນລາວຕະຫຼອດໄປ. ທ່ານເອກອັກຄະລັດຖະທູດ ຍັງໄດ້ເຊີນຊວນພີ່ນ້ອງເຊື້ອຊາດລາວຢູ່ສະຫະລັດອາເມຣິກາ ແລະ ການາດາ ເດີນທາງໄປຢ້ຽມຢາມບ້ານເກີດເມືອງນອນ, ແຜ່ນ ດິນລາວມາຕຸພຸມທີ່ແສນຮັກຂອງຄົນລາວທຸກຄົນ, ປະກອບສ່ວນຕາມເງື່ອນໄຂໂດຍທາງກົງຫຼືທາງອ້ອມເຂົ້າໃນສ້າງ ສາປະເທດຊາດໃຫ້ມີການພັດທະນາຂຶ້ນໄປເລື້ອຍໆ. ລັດຖະບານລາວ ຍາມໃດກໍຍິນດີຕ້ອນຮັບ ແລະ ອໍານວຍຄວາມສະດວກດ້ານຕ່າງໆລວມທັງດ້ານວິຊາເຂົ້າລາວໃຫ້ພີ່ນ້ອງຄົນເຊື້ອຊາດລາວຢູ່ຕ່າງປະເທດໄດ້ອວ່າຍໜ້າໄປຫາປະເທດຊາດໄປທ່ອງທ່ຽວ, ຢ້ຽມຢາມ, ດໍາເນີນທຸລະກິດ, ໄປຢູ່ລາວຖາວອນ, ເຮັດໂຄງການຊ່ວຍເຫຼືອຫຼືນໍາເອົາຄວາມຮູ້ເຕັກນິກວິຊາການ ແລະ ປະສົບປະການດ້ານຕ່າງໆໄປປະກອບສ່ວນຊ່ວຍພັດທະນາປະເທດລາວ. ໃນໂອກາດສະເຫຼີມສະຫຼອງປີໃໝ່ລາວນີ້ ໄດ້ມີການປະກາດຜົນການເເຂ່ງຂັນກິລາກ໋ອຟ, ກິລາບານເຕະມິດຕະພາບ, ມອບລາງວັນປະເພດຕ່າງໆລວມທັງມີການຈັບສະຫຼາກລາງວັນກ໊ອຟ ແລະ ບານເຕະ, ບັນດາແຂກທີ່ເຂົ້າຮ່ວມໄດ້ຊີມລົດຊາດອາຫານລາວອັນຫຼາກຫຼາຍທີ່ເປັນເອກະລັກຂອງລາວຈາກສະມາ ຄົມແມ່ຍິງໃຈດີ ແລະ ຄົວລາວອື່ນໆ, ພ້ອມທັງຮ່ວມຟ້ອນລຳວົງສາມັກຄີດ້ວຍສຽງເພງ, ຂັບລໍາຕາມປະເພນີລາວທີ່ໃຫ້ຄວາມມ່ວນຊື່ນຂອງຄະນະວົງດົນຕີສະຫະພັນບານເຕະລາວອາເມຣິກາເໜືອຕາມລາຍການຕ່າງໆທີ່ໄດ້ຈັດໄວ້. (ຂ່າວ: ກຕທ)
ຄໍາເຫັນ