ສະຫວັນນະເຂດ ຊຸກຍູ້-ສົ່ງເສີມການຂຶ້ນທະບຽນຊັບສິນທາງປັນຍາໃຫ້ບັນດາຜະລິດຕະພັນໂອດອບ

ໃນວັນທີ 27 ກຸມພາຜ່ານມານີ້ ທີ່ຫ້ອງປະຊຸມພະແນກອຸດສາຫະກຳ ແລະ ການຄ້າແຂວງສະຫວັນນະເຂດ ໄດ້ຈັດກອງປະຊຸມເຜີຍແຜ່ຈຸດປະສົງຂອງໂຄງການນຳໃຊ້ຊັບສິນທາງປັນຍາເຂົ້າສູ່ຂະບວນການຜະລິດ ແລະ ເກັບກຳຂໍ້ມູນກ່ຽວກັບກຸ່ມຜູ້ຜະລິດໜຶ່ງເມືອງໜຶ່ງຜະລິດຕະພັນ (ODOP) ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍພາກສ່ວນຕ່າງໆທີ່ກ່ຽວຂ້ອງຂັ້ນສູນກາງ ແລະ ທ້ອງຖິ່ນເຂົ້າຮ່ວມ.
ທ່ານ ບຸນໂຈມ ອຸບົນປະເສີດໄດ້ກ່າວມີຄຳເຫັນວ່າ: ກອງປະຊຸມໃນມື້ນີ້, ຖືໄດ້ວ່າເປັນກິດຈະກຳໜຶ່ງທີ່ສຳຄັນຂອງວຽກງານຊັບສິນທາງປັນຍາ ໂດຍຫັນເຂົ້າສູ່ຂະບວນການຜະລິດ ຊຶ່ງຕິດພັນກັບກຸ່ມຜູ້ຜະລິດໜຶ່ງເມືອງໜຶ່ງຜະລິດຕະພັນໃນການສ້າງຍີ່ຫໍ້, ສ້າງເຄື່ອງໝາຍການຄ້າ, ເຄື່ອງໝາຍລວມໝູ່, ລິຂະສິດໃຫ້ກາຍເປັນຍີ່ຫໍ້ສິນຄ້າທີ່ຜະລິດພາຍໃນລາວເປັນທີ່ຍອມຮັບທັງພາຍໃນ ແລະ ຕ່າງປະເທດ ພ້ອມນັ້ນ, ຍັງເປັນການສ້າງຄວາມເຂັ້ມແຂງໃຫ້ແກ່ພາກທຸລະກິດ ໂດຍສະເພາະກຸ່ມຜະລິດສິນຄ້າ ODOP ໃຫ້ສາມາດນໍາໃຊ້ຊັບສິນອຸດສາຫະກໍາ ເຂົ້າໃນການສ້າງມູນຄ່າເພິ່ມຕໍ່ກັບຜະລິດຕະພັນສິນຄ້າ, ການຕະຫຼາດ, ການລົງທຶນທາງຊັບສິນທາງປັນຍາ ແລະສ້າງຄວາມສາມາດໃນການແຂ່ງຂັນທາງດ້ານທຸລະກິດ. ປະຈຸບັນ, ໃນທົ່ວແຂວງສະຫວັນນະເຂດ ມີຫົວໜ່ວຍທຸລະກິດທີ່ໄດ້ຮັບກາໝາຍ ODOP ຈໍານວນ 14 ຫົວໜ່ວຍ, 56 ຜະລິດຕະພັນ ແລະ ມີຜະລິດຕະພັນທີ່ສາມາດຂຶ້ນທະບຽນເຄື່ອງໝາຍການຄ້າໄດ້ພຽງແຕ່ 7 ຫົວໜ່ວຍທີ່ເປັນກຸ່ມຜູ້ຜະລິດສິນຄ້າ ODOP, ສຳລັບທິດທາງແຜນການປີ 2024 ຈະໃຫ້ໄດ້ 20 ເຄື່ອງໝາຍ, ປີ2025 ຈະໃຫ້ໄດ້ 20 ເຄື່ອງໝາຍ ເພື່ອນໍາສະເໜີກະຊວງອຸດສາຫະກໍາ ແລະ ການຄ້າອອກໃບຢັ້ງຢືນເຄື່ອງໝາຍການຄ້າຕາມແຜນວຽກຈຸດສຸມຂອງແຂວງທີ່ໄດ້ກໍານົດໄວ້. ທ່ານເຈົ້າແຂວງກ່າວຕື່ມວ່າ: ໃນນາມການນໍາແຂວງ ສະເໜີມາຍັງກະຊວງອຸດສາຫະກຳ ແລະ ການຄ້າ ກໍຄືບັນດາກົມທີ່ກ່ຽວຂ້ອງຊ່ວຍລົງມາຊຸກຍູ້ ແລະ ຕິດຕາມຢ່າງຕໍ່ເນື່ອງເພື່ອເຮັດໃຫ້ບັນດາສິນຄ້າ ODOP ຂອງແຂວງໃຫ້ໄດ້ຮັບການຂຶ້ນທະບຽນຊັບສິນທາງປັນຍາທາງດ້ານການຄ້າໃຫ້ຫຼາຍຂຶ້ນກວ່າເກົ່າ ແລະ ພ້ອມກັນຊຸກຍູ້ສົ່ງເສີມການນຳໃຊ້ຜະລິດຕະພັນພາຍໃນທ່ີພວກເຮົາມີ ໂດຍສະເພາະແມ່ນບັນດາຜະລິດຕະພັນໜຶ່ງເມືອງໜຶ່ງຜະລິດຕະພັນ ເພື່ອຫຼຸດຜ່ອນການນຳເຂົ້າ ພ້ອມທັງປັບປຸງຄຸນະພາບຂອງສິນຄ້າໃຫ້ໄດ້ມາດຕະຖານສູງຂຶ້ນກວ່າເກົ່າ. 
ໂອກາດນີ້, ທ່ານຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ຍັງໄດ້ກ່າວວ່າ: ຈຸດປະສົງຂອງກອງປະຊຸມ ແມ່ນເພື່ອຈັດຕັ້ງປະຕິບັດໂຄງການນຳໃຊ້ຊັບສິນທາງປັນຍາເຂົ້າສູ່ຂະບວນການຜະລິດກ່ຽວກັບຜູ້ຜະລິດໜຶ່ງເມືອງໜຶ່ງຜະລິດຕະພັນໂດຍການສ້າງເຄື່ອງໝາຍການຄ້າ ແລະ ເຄື່ອງໝາຍລວມໝູ່ເພື່ອເປັນຍີ່ຫໍ້ສິນຄ້າຂອງລາວ ໂດຍສະເພາະກໍແມ່ນການສ້າງເຄື່ອງໝາຍການຄ້າ ຊຶ່ງເປັນສ່ວນສຳຄັນທີ່ຈະເຮັດໃຫ້ກິດຈະ ການຂອງທ່ານມີຊື່ສຽງ ແລະ ເປັນທີ່ຮັບຮູ້ຂອງກຸ່ມຜູ້ບໍລິໂພກ. 
(ຂ່າວ: ສະຫວັນ)