ຖະແຫຼງການຈາກຄະນະກຳມະການການທ່ອງທ່ຽວສິງກະໂປ ໃນວັນທີ 23 ກໍລະກົດ ຜ່ານມາ ລະບຸວ່າ: ຄະນະກຳມະການດັ່ງກ່າວໄດ້ລົງນາມໃນບົດບັນທຶກຄວາມເຂົ້າໃຈ ກັບ OpenAI, ບໍລິສັດຄົ້ນຄວ້າ ແລະ ແອັບພລິເຄຊັນ AI ທີ່ມີຊື່ສຽງຈາກການພັດທະນາແພລັດຟອມ ChatGPT, ເພື່ອຄົ້ນຫາ ແລະ ນໍາໃຊ້ AI ທີ່ມີນະວັດກໍາໃນຂະແໜງການທ່ອງທ່ຽວ.
ການນຳໃຊ້ AI ຂັ້ນສູງຈະຍົກລະດັບຍຸດທະສາດການຕະຫຼາດ ແລະ ຜະລິດຕະພັນ, ພ້ອມທັງສະໜັບສະໜູນຜູ້ມີສ່ວນຮ່ວມໃນອຸດສາຫະກໍາການທ່ອງທ່ຽວໃນການໃຫ້ບໍລິການທີ່ຕອບສະໜອງຄວາມຕ້ອງການໄດ້ຢ່າງວ່ອງໄວ.
ທັງນີ້, AI ຂັ້ນສູງ ໝາຍເຖິງເຕັກໂນໂລຊີທີ່ທັນສະໄໝ ທີ່ສາມາດປະຕິບັດວຽກງານທີ່ສັບສົນເຊັ່ນ: ຄວາມເຂົ້າໃຈພາສາທໍາມະຊາດ, ການສ້າງຄໍາຕອບທີ່ຄ້າຍຄືກັບມະນຸດ, ການວິເຄາະຂໍ້ມູນຂະໜາດໃຫຍ່ ແລະ ການສະໜອງການແກ້ໄຂບັນຫາສ່ວນບຸກຄົນທີ່ຄຳນຶງເຖິງສະພາບແວດລ້ອມ.
ທ່ານ ຈໍແດນ ຕັນ ຫົວໜ້າເຈົ້າໜ້າທີ່ເຕັກໂນໂລຊີຂອງຄະນະກໍາມະການດັ່ງກ່າວ ກ່າວວ່າ: ນັບຕັ້ງແຕ່ຊ່ວຍເພີ່ມປະສິດທິພາບການດໍາເນີນງານຂອງທຸລະກິດຈົນເຖິງການຍົກລະດັບປະສົບການຂອງນັກທ່ອງທ່ຽວຜ່ານການສ້າງຄວາມເປັນສ່ວນຕົວ ແລະ ການພົວພັນທີ່ເລິກເຊິ່ງ, ຂໍ້ລິເລີ່ມເຫຼົ່ານີ້ຈະຊຸກຍູ້ການກັບມາທ່ອງທ່ຽວສິງກະໂປອີກຄັ້ງ.
ຄໍາເຫັນ