ສິງກະໂປ ປະເຊີນກັບຄວາມສ່ຽງການລະບາດພະຍາດໄຂ້ເລືອດອອກ

ຂ່າວສານຫວຽດນາມລາຍງານວ່າ: ສິງກະໂປ ພວມປະເຊີນໜ້າກັບຄວາມສ່ຽງຂອງພະຍາດໄຂ້ເລືອດອອກຊໍ້າອີກໃນປີ 2024 ເນື່ອງຈາກຈຳນວນຜູ້ຕິດເຊື້ອພະຍາດເພີ່ມຂຶ້ນຢ່າງຫຼວງຫຼາຍໃນເດືອນທຳອິດຂອງປີ ເຮັດໃຫ້ເຈົ້າໜ້າທີ່ຮຽກຮ້ອງປະຊາຊົນຈົ່ງປ້ອງກັນ, ຫຼີກລ່ຽງບໍ່ໃຫ້ຍຸງກັດ ເພື່ອຊ່ວຍຈຳກັດການແຜ່ກະຈາຍ.
ຂ່າວລະບຸວ່າ: ອົງການສິ່ງແວດລ້ອມແຫ່ງຊາດ ສິງກະໂປ (NEA) ໃຫ້ຮູ້ວ່າ: ໃນໄຕມາດທີ 1 ມີຜູ້ຕິດເຊື້ອພະຍາດໄຂ້ເລືອດອອກເຖິງ 5.000 ກວ່າຄົນ, ເພີ່ມຂຶ້ນ 2 ເທົ່າເມື່ອທຽບໃສ່ໄລຍະດຽວກັນຂອງປີກາຍ, ມີຜູ້ເສຍຊີວິດ 7 ຄົນ, ສູງກວ່າຈຳນວນຜູ້ເສຍຊີວິດ ປີ 2023.
ໃນປີ 2023, ສິງກະໂປ ໄດ້ປະສົບຜົນສຳເລັດໃນການປ້ອງກັນການລະບາດຂອງພະຍາດໄຂ້ເລືອດອອກ, ໂດຍມີຜູ້ຕິດເຊື້ອເກືອບ 10.000 ຄົນ, ຫຼຸດລົງ 69% ເມື່ອທຽບໃສ່ປີ 2022 ຊຶ່ງມີຈຳນວນຜູ້ຕິດເຊື້ອຫຼາຍກວ່າ 32.000 ຄົນ. ໃນປີ 2023 ມີຜູ້ເສຍຊີວິດຍ້ອນພະຍາດໄຂ້ເລືອດອອກພຽງແຕ່ 6 ຄົນເທົ່ານັ້ນ ຊຶ່ງຫຼຸດລົງຢ່າງຫຼວງຫຼາຍເມື່ອທຽບໃສ່ກັບ 19 ຄົນ ໃນປີ 2022.
ລະດູການໄຂ້ເລືອດອອກປົກກະຕິແມ່ນເດືອນພຶດສະພາ ຫາ ເດືອນຕຸລາ ຂອງທຸກໆປີ.ໃນວັນທີ 31 ມີນາ ຜ່ານມາ, ອຳນາດການປົກຄອງ ສິງກະໂປ ໄດ້ເລີ່ມຂະບວນການປ້ອງກັນພະຍາດໄຂ້ເລືອດອອກແຫ່ງຊາດ ເພື່ອເນັ້ນໜັກເຖິງຄວາມຮັບຜິດຊອບຂອງສັງຄົມ, ຮຽກຮ້ອງໃຫ້ຊຸມຊົນຈົ່ງມີສະຕິເຝົ້າລະວັງ ແລະ ໃຊ້ມາດຕະການປ້ອງກັນຫຼຸດຜ່ອນຄວາມສ່ຽງຕໍ່ການຕິດເຊື້ອໄຂ້ເລືອດອອກ.