ສິງກະໂປ ຊ່ວຍຄ່າຄອງຊີບປະຊາຊົນ ເພື່ອບັນເທົາຄວາມວິຕົກກັງວົນດ້ານເສດຖະກິດ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ທ່ານ ລໍເຣນ ຫວ່ອງ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການເງິນສິງກະໂປໄດ້ອອອກຖະແຫຼງການກ່ຽວກັບແຜນການໃຊ້ຈ່າຍງົບປະມານ 1.900 ລ້ານໂດລາສິງກະໂປ ເພື່ອເສີມສ້າງຄວາມເຊື່ອໝັ້ນທາງດ້ານເສດຖະກິດໃຫ້ແກ່ປະຊາຊົນທ່າມກາງທ່າອ່ຽງທັງພາຍໃນ ແລະ ພາຍນອກທີ່ຍັງບໍ່ແນ່ນອນ.
    ມາດຕະການຂອງພາກລັດລວມເຖິງການແຈກຈ່າຍໃຫ້ແກ່ຄົວເຮືອນໃນປະເທດປະມານ 1,4 ລ້ານແຫ່ງ ເພີ່ມອີກຄົວເຮືອນລະ 600 ໂດລາສິງກະໂປ ຫຼັງຈາກທີ່ເຄີຍໃຫ້ໄປແລ້ວຄົວເຮືອນລະ 500 ໂດລາສິງກະໂປ ເມື່ອເດືອນມັງກອນຜ່ານມາ ເພື່ອບັນເທົາເລື່ອງຄ່າຄອງຊີບ ແລະ ກະຕຸ້ນການຈັບຈ່າຍໃຊ້ສອຍຂອງປະຊາຊົນກັບຜູ້ປະກອບການ ແລະ ຮ້ານຄ້າທີ່ເຂົ້າຮ່ວມໂຄງການ. ທັງນີ້, ເງິນດັ່ງກ່າວຈະແບ່ງຈ່າຍສອງຄັ້ງ ຄັ້ງລະ 300 ໂດລາສິງກະໂປ ໂດຍຄັ້ງທຳອິດພາຍໃນທ້າຍເດືອນມິຖຸນານີ້ ສ່ວນການຈ່າຍເງິນງວດທີສອງຈະເກີດຂຶ້ນໃນເດືອນມັງກອນ 2025. ນອກຈາກນີ້, ລັດຖະບານສິງກະໂປມີແຜນໃຫ້ເງິນ 200-400 ໂດລາສິງກະໂປແກ່ປະຊາຊົນ ຊຶ່ງມີຄຸນສົມບັດເຂົ້າເກນໃນເດືອນກັນຍາ 2024 ໂດຍຄຸນສົມບັດທີ່ລັດຖະບານກຳນົດໄວ້ຄື: ຕ້ອງມີອາຍຸ 21 ປີຂຶ້ນໄປ ຫຼື ຫຼາຍກວ່ານັ້ນ ແລະ ໃນປີນີ້ອາໄສຢູ່ໃນສິງກະໂປຄອບຄອງອະສັງຫາລິມມະຊັບບໍ່ເກີນ 1 ແຫ່ງ ແລະ ມີລາຍໄດ້ 100.000 ໂດລາສິງກະໂປ ເບື້ອງຕົ້ນໜ້າຈະມີຜູ້ເຂົ້າເກນປະມານ 2,5 ລ້ານຄົນ. ອີກຢ່າງໜຶ່ງ, ເສດຖະກິດຂອງສິງກະໂປຂະຫຍາຍຕົວ 1,1% ເມື່ອປີຜ່ານມາ ແຕ່ຍັງຄົງຕ່ຳກວ່າເປົ້າໝາຍຂອງລັດຖະບານ ຊຶ່ງກຳນົດໄວ້1,2% ຂະນະທີ່ພາກລັດຄາດຄະເນວ່າ ທ່າອ່ຽງການຂະຫຍາຍຕົວທາງດ້ານເສດຖະກິດຂອງປະເທດໃນປີນີ້ຢູ່ລະຫວ່າງ 1%-3% ໂດຍເຊື່ອວ່າ ຄວາມຕ້ອງການຈາກພາຍນອກຍັງຄົງບໍ່ປ່ຽນແປງ.
    ເຖິງຢ່າງໃດກໍຕາມ, ຄວາມສ່ຽງຂາລົງທາງດ້ານເສດຖະກິດຍັງຄົງເປັນທີ່ຕ້ອງສັງເກດການຢ່າງໃກ້ຊິດຕໍ່ໄປ ໂດຍສະເພາະສະຖານະການໂລກໃນປັດຈຸບັນທີ່ຍັງຄົງແກ່ຍາວເວລາ ຊຶ່ງຈະສົ່ງຜົນຕໍ່ຕ່ອງໂຊ່ການສະໜອງ.