ສນຊ ແລະ ກຸ່ມບໍລິສັດພົງສະຫວັນ ຈໍາກັດ ສືບຕໍ່ຮ່ວມມືກອງທຶນສາມັກຄີ ແລະ ພັດທະນາແນວລາວສ້າງຊາດ

ສູນກາງແນວລາວສ້າງຊາດ (ສນຊ) ແລະ ກຸ່ມບໍລິສັດພົງສະຫວັນ ຈໍາກັດ ໄດ້ຈັດພິທີລົງນາມບົດບັນທຶກຊ່ວຍຈໍາການຮ່ວມມືດໍາເນີນໂຄງການ ກອງທຶນສາມັກຄີ ແລະ ພັດທະນາແນວລາວສ້າງຊາດຂຶ້ນໃນວັນທີ 21 ພຶດສະພາ ນີ້ ທີ່ ສນຊ ໄລຍະ 2 (ປີ 2025-2029); ຮ່ວມລົງນາມຄັ້ງນີ້ລະຫວ່າງທ່ານ ຄໍາໄຫຼສີປະເສີດ ກໍາມະການສູນກາງພັກ ຮອງປະທານສູນກາງແນວລາວສ້າງຊາດ ແລະ ທ່ານ ຄໍາຫຼ້າ ລໍລອນສີ ຮອງປະທານກຸ່ມບໍລິສັດພົງສະຫັວນ ຈໍາກັດ; ທ່ານ ດາວຽງສັກ ຫວ່າງວິຈິດ ຫົວໜ້າຫ້ອງການສູນກາງແນວລາວສ້າງຊາດ ແລະ ທ່ານ ພົນໂທ ຄໍາຜາຍ ຈັນສີສະໝຸດ ຕາງໜ້າກຸ່ມບໍລິສັດພົງສະຫວັນ ຈໍາກັດ; ໂດຍການເປັນກຽດເຂົ້າຮ່ວມຂອງທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກປະທານສູນກາງແນວລາວສ້າງຊາດ ພ້ອມດ້ວຍຄະນະຜູ້ບໍລິຫານຂັ້ນສູງກຸ່ມບໍລິສັດ ພົງສະຫວັນ ຈໍາກັດ ຄະນະຊີ້ນໍາ ຈັດຕັ້ງປະຕິບັດໂຄງການກອງທຶນບ້ານສາມັກຄີ ແລະ ພັດທະນາແນວລາວສ້າງຊາດຂັ້ນສູນກາງ ແລະ ບັນດາແຂວງທີ່ມີກອງທຶນ ເຂົ້າຮ່ວມເປັນສັກຂີພິຍານ. 
ການລົງນາມຄັ້ງນີ້ ເພື່ອສືບຕໍ່ຂະຫຍາຍກອງທຶນສາມັກຄີ ແລະ ພັດທະນາແນວລາວສ້າງຊາດໃນທົ່ວປະເທດ ແລະ ປັບປຸງໃຫ້ມີປະສິດທິຜົນກວ່າເກົ່າ; ເພື່ອສືບຕໍ່ເພີ່ມທະວີການຮ່ວມມືທັງສອງຝ່າຍໃນຂອບເຂດວຽກງານຊຸກຍູ້, ສົ່ງເສີມການສ້າງຕັ້ງກອງທຶນ,ການສ້າງສູນຕົວແບບກະສິກໍາ, ການສະໜອງແນວພັນພືດ, ແນວພັນສັດ, ອຸປະກອນການຜະລິດ, ການປູກ-ການລ້ຽງ, ການເກັບຊື້, ຈັດຫາຕະຫຼາດຈໍາໜ່າຍ ແລະ ອື່ນໆ ທີ່ ສນຊ ແລະ ກຸ່ມບໍລິສັດພົງສະຫວັນ ຈໍາກັດ ໄດ້ລົງນາມໃນປີ 2017  ແລະ ສືບຕໍ່ປະຕິບັດມາຈົນເຖິງປັດຈຸບັນ ໄດ້ 25 ກອງທຶນ ໃຫ້ມີໝາກຜົນຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ຂະບວນການສ້າງຄອບຄົວ ແລະ ບ້ານສາມັກຄີປອງດອງ, ລຶບລ້າງຄວາມຫຍຸ້ງຍາກໃຫ້ແກ່ປະຊາຊົນບັນດາເຜົ່າຕາມແນວທາງນະໂຍບາຍຂອງພັກ-ລັດ.
ຂ່າວ-ພາບ: ຍຸພິນທອງ